Ukuzinikela Ngokuvumayo
1 Umdumisi uDavide waprofeta esithi abantu bakaYehova “baya kuzinikela ngeentliziyo”; okuthetha ukuthi, ‘njengamatsha-ntliziyo atsha ziintambo.’ (INdu. 110:3, bona umbhalo osemazantsi weNW.) Ngokuqinisekileyo oku kuyazaliseka kwintlangano esikuyo yabazalwana yehlabathi lonke. Ebudeni bonyaka ngamnye kule minyaka mine yenkonzo idluleyo, abantu bakaYehova baye banikela ngaphezu kwewaka lesigidi seeyure ekusasazeni iindaba ezilungileyo zoBukumkani. Yaye ukongezelela kumsebenzi wokushumayela nowokwenza abafundi, kukho iindlela ezininzi esinokuthi ngazo sizinikele ngokuvumayo ekuncedeni abanye.
2 Iindlela Esinokubonisa Ngazo Ukuba Ngabavumayo: Bambi ebandleni basenokufuna uncedo ukuze baye kwiintlanganiso. Kutheni ungazinikeli ngokuzithandela ukuze uhambe nabo? Abanye basenokuba bayagula, balele ngendlu, okanye balele esibhedlele. Ngaba unokubatyelela okanye ubancede ngandlel’ ithile ungacelwanga? Kusenokubakho mntu uthile okanye intsapho eswele ukhuthazo. Ngaba ukhe wacinga ngokuyimema ukuba ibe kunye nani kwisifundo senu sentsapho ngamathub’ athile? Uvulindlela okanye umvakalisi usenokuba ufuna umntu anokusebenza naye kubulungiseleli. Kutheni ungaceli ukusebenza naye enkonzweni? Ezi zezinye zeendlela esinokuthi ngazo sizinikele ngokuzithandela ekwenzeni okulungileyo kwabo bahlobene nathi elukholweni.—Gal. 6:10.
3 Abazalwana banokubonisa ukuba ngabavumayo ukusetyenziswa kwintlangano kaYehova ngokuzabalazela ukufikelela iimfaneleko zabadala okanye ezezicaka zolungiselelo. (1 Tim. 3:2-10, 12, 13; Tito 1:5-9) Njengoko siqhubeka sisanda ngokwamanani, kufuneka abazalwana abafanelekayo abavumayo ukukhokela kumsebenzi wokushumayela nokufundisa nowokwalusa amabandla.—1 Tim. 3:1.
4 Mhlawumbi abanye kuthi banokuzinikela kwinkonzo kaYehova ngomlinganiselo omkhudlwana ngokubhalisa njengoovulindlela abangabancedani ngezihlandlo ezithile. Kwakhona, ngokwenza uhlengahlengiso olungephi nolusengqiqweni kucwangciso lwethu, sisenokukwazi ukwenjenjalo ngokuqhubekayo okanye side singenele inkonzo yobuvulindlela obuthe ngxi. Ngaba iimeko zethu ziyasivumela ukuba sifudukele kummandla apho lufuneka ngamandla uncedo? Ngaba sinokuzinikela ukuze sikhonze eBheteli size ngaloo ndlela sifak’ isandla ngokuthe ngqo kwinkqubela yomsebenzi owenziwa kwihlabathi lonke? Kwakhona kuninzi okwenziwayo ekwakhiweni kweeHolo zoBukumkani, iiHolo zeeNdibano, izakhiwo zamasebe ehlabathini lonke, apho kufuneka ngamandla ukuzinikela ngokuvumayo emsebenzini. Abo baye bazinikela kule misebenzi mihle baxatyiswa kakhulu, yaye baye basikelelwa kakhulu!—Luka 6:38.
5 La ngamaxesha avuyisayo. Ngomoya wakhe, uYehova uphumeza umsebenzi omangalisayo emhlabeni esebenzisa abantu bakhe abavumayo! Nanini na uYehova, ngentlangano yakhe, esimema ukuba sibe nesabelo kumsebenzi woBukumkani owandisiweyo, senza kakuhle ukuzibuza, ‘Ngaba ndisazinikela ngokuvumayo?’ Ngoko sifanele sizihlolisise ngomthandazo iintliziyo neemeko zethu. Uzinikelo lwethu lobuthixo luya kusishukumisela ekubeni senze konke okusemandleni ethu kwinkonzo engcwele, size ngaloo ndlela sivuyise intliziyo kaYehova!—Zef. 3:17.