Indlela Amalungu Entsapho Asebenzisana Ngayo Ukuze Abe Nenxaxheba Ngokuzeleyo—Kwisifundo SeBhayibhile
1 Inyaniso yongeza injongo nentsingiselo yokwenene kubomi bentsapho, kodwa impumelelo ekukhonzeni uYehova ayizenzekeli. Kufun’ ixesha nomgudu ukwakha intsapho eyomeleleyo ngokomoya. Kukho imfuneko enkulu yokuba amalungu entsapho abambisane kulo mzamo. Eli nqaku lokuqala longcelele oluneenxalenye ezintathu liza kugxininisa kwindlela iintsapho ezingasebenzisana ngayo ekwakheni imikhwa emihle yofundisiso.
2 Ngokufunda IBhayibhile Yonke Imihla: IMizekeliso 24:5 ithi “nendoda enokwazi ibonakalisa amandla amakhulu.” Olu lwazi luzuzeka ngokufunda iLizwi likaThixo rhoqo lunika ubani amandla okumelana neentlaselo zikaSathana kwimeko yakhe yokomoya. (INdu. 1:1, 2) Ngaba iBhayibhile niyifunda kunye yonke imihla njengentsapho? Ucwangciso LweSikolo Sobulungiseleli Sobuthixo lwenze “uCwangciso Olongezelelekileyo Lokufundwa KweBhayibhile” lweveki nganye yonyaka. Ukululandela kufuneka imizuzu elishumi kuphela kwixesha lentsapho suku ngalunye. Khethani ixesha elifanelekileyo, njengexesha lesidlo sakusasa, emva kwesidlo sangokuhlwa, okanye ngaphambi kokuba kulalwe, ukuze nifunde iBhayibhile nize nihlolisise itekisi yosuku kwincwadana ethi Ukuhlolisisa IZibhalo Imihla Ngemihla. Oku kwenzeni inxalenye yocwangciso lwentsapho yenu imihla ngemihla.
3 Ngokufundisisa Kunye Veki Nganye: Isifundo seBhayibhile sentsapho sifanele sibe yimbalasane yeveki yentsapho. Lungu ngalinye lentsapho lifanele lisixhase ngokuba nenxaxheba ngehlombe esifundweni. Intloko-ntsapho iya kuhlolisisa iintswelo zentsapho xa ikhetha umbandela oza kufundisiswa nosuku, ixesha, nobude besifundo. Isifundo sentsapho masibekwe kwindawo yokuqala kucwangciso lweveki. Musani ukuvumela izinto ezingabalulekanga ziphazamise.—Fil. 1:10, 11.
4 Ubawo owayedla ngokufumana iminxeba yezoshishino ekhayeni lakhe wayewukhupha umnxeba xa kuqhutywa isifundo sentsapho. Xa kufika abantu beze kuthenga, babemenywa ukuba bathelele esifundweni kungenjalo balinde side siqukunjelwe. Lo bawo wayegqibe kwelokuba kungabikho nto iphazamisana nesifundo sentsapho. Oku kwabetheleleka ebantwaneni bakhe, yaye ishishini lakhe, laliqhuba kakuhle kakhulu.
5 Hayi indlela ekukuhle ngayo xa amalungu entsapho esebenzisana kwizinto zokomoya! Ukuthembeka kwimigudu yethu ukuze sibe nenxaxheba ezeleyo kwisifundo sentsapho seBhayibhile kuya kuzisa intsikelelo kaYehova.—INdu. 1:3.