Isahluko 1
Ngaba Kukho Imfihlelo Ethile Yolonwabo Lwentsapho?
1. Kutheni iintsapho ezomeleleyo zibalulekile kwibutho labantu?
INTSAPHO lelona lungiselelo lidala emhlabeni, ibe ibaluleke gqitha kwibutho labantu. Kuyo yonke imbali, iintsapho ezomeleleyo ziye zomeleza izizwe. Intsapho lelona lungiselelo lifanelekileyo lokukhulisa abantwana babe ngabantu abakhulu nabaqolileyo.
2-5. (a) Chaza indlela aziva ekhuseleke ngayo umntwana kwintsapho eyonwabileyo. (b) Ziziphi iingxaki ekuthiwa ziyenzeka kwezinye iintsapho?
2 Kwintsapho eyonwabileyo ubani uziva ekhuselekile yaye enqabisekile. Khawunqumame uze ube nomfanekiso-ngqondweni wentsapho eyonwabileyo. Kwisidlo sayo sangokuhlwa, abazali abanenkathalo bahlala nabantwana babo baze bancokole ngokwenzeke emini. Kuxhelw’ eXhukwane ebantwaneni bebalisela uyise nonina ngokwenzeke esikolweni. Ixesha elichitha kunye iphumle lihlaziya wonk’ ubani alungele usuku olulandelayo ngaphandle kwekhaya.
3 Kwintsapho eyonwabileyo, umntwana uyazi ukuba uyise nonina baya kumnyamekela xa egula, mhlawumbi batshintshisane ngokubek’ iliso kuye ubusuku bonke. Uyazi ukuba xa eneengxaki zobutsha angaya kunina okanye kuyise aye kufuna icebiso okanye ukhuthazo. Ewe, lo mntwana uziva ekhuselekile, kungakhathaliseki ukuba zingakanani na iinkathazo ajamelana nazo ngaphandle kwekhaya.
4 Xa abantwana bekhula, badla ngokutshata baze babe neentsapho zabo. Iqhalo laseMpuma lithi: “Umntu uyiqonda xa enabantwana bakhe indlela amele ababulele ngayo abazali bakhe.” Benombulelo nothando olungazenzisiyo, aba bantwana bakhulileyo bazama ukwenza iintsapho zabo zonwabe, baze banyamekele abazali babo abalupheleyo, abakuthanda gqitha ukuhlala nabazukulwana babo.
5 Mhlawumbi xa kungoku uyacinga: ‘Ndiyayithanda intsapho yam, kodwa ayifani nale ichazwe apha. Mna neqabane lam asisebenzi ngamaxesha afanayo ibe sibonana manqaphanqapha. Amaxesha amaninzi sithetha ngeengxaki zemali.’ Okanye ngaba uthi, ‘Abantwana nabazukulwana bam bahlala kwenye idolophu, yaye andifane ndibabone’? Ewe, ngenxa yezizathu ezidla ngokuba ngaphaya kwamandla azo, ubomi beentsapho ezininzi abonwabisi. Sekunjalo, zimbi ziphila ubomi bentsapho obonwabisayo. Zenza njani? Ngaba kukho imfihlelo ethile yolonwabo lwentsapho? Ewe ikho. Kodwa ngaphambi kokuba sixubushe ngayo, kukho umbuzo obalulekileyo esifanele siwuphendule.
YINTONI INTSAPHO?
6. Ziziphi iintlobo zeentsapho esiza kuxubusha ngazo kule ncwadi?
6 Kumazwe aseNtshona, iintsapho ezininzi zibunjwa ngutata, umama nabantwana. Ootatomkhulu noomakhulu basenokuzihlalela kwimizi yabo lo gama nje besakwazi ukuzihlalela. Ngoxa isenolwalamano nezizalwana ezingasondelanga, aziyombopheleleko yayo kangako. Ngokusisiseko, le yintsapho esiza kuxubusha ngayo kule ncwadi. Noko ke, zikho nezinye iintsapho ezithande ukuxhaphaka kwiminyaka yakutshanje—intsapho enomzali omnye, intsapho enomzali wesibini nentsapho enabazali abangahlali kunye ngenxa yezizathu ezahlukeneyo.
7. Yintoni intsapho eyandisiweyo?
7 Kwamanye amazwe kuxhaphake intsapho eyandisiweyo. Kolu hlobo lwentsapho, ukuba kunokwenzeka, abantwana bayaqhubeka benyamekela ootatomkhulu noomakhulu, baze badibanise kweli qhina izizalwana ezingasondelanga kubo baze bazenze imbopheleleko yabo. Ngokomzekelo, amalungu entsapho asenokuxhasa, akhulise aze ahlawulele kwanemfundo yabatshana, okanye ezinye izizalwana ezingasondelanga kwaphela kuwo. Imigaqo eza kuxutyushwa kule mpapasho iyasebenza nakwiintsapho ezandisiweyo.
INTSAPHO ICINEZELEKILE
8, 9. Ziziphi iingxaki ezikwamanye amazwe ezibonisa ukuba intsapho iyatshintsha?
8 Namhlanje intsapho iyaguquka—okubuhlungu kukuba ayiphucuki. Ungakubona kakuhle oku eIndiya, apho umfazi asenokuba uhlala nentsapho yasemzini wakhe aze asebenze ekhayeni elawulwa apho emzini. Noko ke, kule mihla kuxhaphakile ukuba abafazi bamaIndiya bafune imisebenzi ngaphandle kwekhaya. Sekunjalo kubonakala ukuba kusalindelwe benze imisebenzi abamele bayenze ngokwesithethe kwelo khaya. Kumazwe amaninzi kudla ngokubuzwa oku, Umfazi ophangelayo kulindelwe asebenze kangakanani ekhayeni xa ethelekiswa namanye amalungu entsapho?
9 Kumazwe aseMpuma, kusisithethe ukuba namaqhina awomeleleyo neentsapho ezandisiweyo. Noko ke, ngenxa yefuthe lendlela yokuphila yokuzimela geqe yaseNtshona neengxaki zoqoqosho, amaqhina ezo ntsapho zandisiweyo zesithethe akasomelelanga. Ngenxa yoko, ukunyamekela amalungu entsapho alupheleyo sele kujongwa ngabaninzi njengoxanduva kunokuba kube yimbopheleleko okanye ilungelo. Bambi abazali abalupheleyo baphathwa kakubi. Eneneni, kumazwe amaninzi namhlanje ukuphathwa kakubi nokungakhathalelwa kwabazali abalupheleyo kuxhaphakile.
10, 11. Ziziphi izibakala ezibonisa ukuba intsapho iyatshintsha kumazwe aseYurophu?
10 Ukuqhawulwa kwemitshato kuya kuthabath’ unyawo. ESpeyin ekuqaleni kweminyaka elishumi yokugqibela yenkulungwane yama-20 umtshato omnye kwesibhozo ubuqhawulwa—mininzi ngokwenene kuba kwiminyaka engama-25 ngaphambili kwakuqhawulwa omnye kweli-100. EBritani, ekuthiwa ineyona mitshato mininzi iqhawulwayo eYurophu (imitshato emine kwelishumi kulindeleke ukuba iphele), zininzi gqitha iintsapho ezinomzali omnye.
11 EJamani uninzi lubonakala luyiphose kwesinomhlwa intsapho yesithethe. Kwiminyaka yee-1990 iintsapho zaseJamani ezingama-35 ekhulwini zibunjwa ngumntu nje omnye yaye ezingama-31 ekhulwini zibunjwa ngabantu ababini. NamaFrentshi akasafane atshate, ibe nalawo atshatayo awuqhawula rhoqo yaye ngethutyana nje elifutshane kunangaphambili. Angakumbi akhetha ukuhlalisana angazibopheleli ngomtshato. Lo mkhwa wande kulo lonke ihlabathi.
12. Abantwana babandezeleka njani ngenxa yokutshintsha kwentsapho yanamhlanje?
12 Kuthekani ngabantwana? EUnited States nakwamanye amazwe, abantwana abaninzi bazalwa ngabazali abangatshatanga, abanye bazalwa ngabazali abakwishumi elivisayo. Amantombazana amaninzi akwishumi elivisayo anabantwana abanooyise abahlukeneyo. Iingxelo ezivela ehlabathini lonke zichaza ngezigidi zabantwana abayabula ezitratweni bengenamakhaya; abaninzi kubo bebhace kwimpatho-mbi ekhaya okanye belahlwe ziintsapho ezingasakwaziyo ukubaxhasa.
13. Ziziphi iingxaki ezandileyo eziphelisa ulonwabo lweentsapho?
13 Ewe, intsapho isebugxwayibeni. Ukongezelela koku sekuchaziwe, kukho nemvukelo yabakwishumi elivisayo, ukuxhatshazwa kwabantwana, amaqabane anogonyamelo, ukukhotyokiswa butywala nezinye iingxaki ezigqugqisileyo eziphelisa ulonwabo lweentsapho ezininzi. Kwinkungu nelanga yabantwana nabantu abakhulu, intsapho asiyondawo yolonwabo kwaphela.
14. (a) Ngokutsho kwabathile, ngabaphi oonobangela beengxaki zentsapho? (b) Igqwetha lenkulungwane yokuqala lathini ngehlabathi lanamhlanje, yaye ukuzaliseka kwamazwi alo kwenze ntoni kubomi bentsapho?
14 Yintoni le ifaka intsapho kobu bugxwayiba? Bambi bathi ifakwa kukuphangela kwabafazi. Abanye batyhola ukuwohloka kokuziphatha kwanamhlanje. Bakho nabanye oonobangela abachazwayo. Malunga neminyaka engamawaka amabini eyadlulayo, igqwetha elaziwayo laxela kwangaphambili ukuba intsapho iya kuthwaxwa ziingcinezelo ezininzi, xa labhala oku: “Kodwa yazi oku, ukuba ngemihla yokugqibela kuya kubakho amaxesha amanqam ekunzima ukuqhubana nawo. Kuba abantu baya kuba ngabazithandayo, abathandi bemali, abazidlayo, abanekratshi, abanyelisi, abangabathobeliyo abazali, abangenambulelo, abanganyanisekanga, bengenawo umsa wemvelo, abangayifuni kwaphela imvisiswano, abajindi, abangenakuzeyisa, iindlobongela, abangenakuthanda kulunga, abangcatshi, abaneentloko ezilukhuni, abakhukhumele yinkqayiso, abathandi beziyolo kunokuba ngabathandi bakaThixo.” (2 Timoti 3:1-4) Ngubani onokulithandabuza elokuba la mazwi ayazaliseka namhlanje? Kwihlabathi elineemeko ezinjengezi, ngaba isisimanga into yokuba intsapho ibe kobu bugxwayiba ikubo?
IMFIHLELO YOLONWABO LWENTSAPHO
15-17. Kule ncwadi, liliphi igunya esiza kulisebenzisa njengelinemfihlelo yolonwabo lwentsapho?
15 Maninzi amacebiso anikelwayo ngendlela yokufumana ubomi bentsapho obonwabisayo. ENtshona, kukho intaphane yeencwadi namaphephancwadi anamacebiso. Ingxaki ke isekubeni abacebisi abangabantu abathethi ntw’ inye, yaye icebiso elihle abalinikela namhlanje kusa sele besithi alisebenzi.
16 Ngoko, sinokulufumana phi ukhokelo lwentsapho olunokuthenjwa lwentsapho? Noko ke, ngaba ubungalindela okuthile kwincwadi eyabhalwa kwiminyaka eli-1 900 eyadlulayo? Okanye ngaba ubuya kuvakalelwa kukuba incwadi enjalo imele ukuba yaphelelwa lixesha kudala? Liyinyaniso elokuba eyona mfihlelo yolonwabo lwentsapho ikuloo ncwadi.
17 Loo ncwadi yiBhayibhile. Ngokusuka kubo bonke ubungqina obukhoyo, yaphefumlelwa nguThixo. EBhayibhileni sifumana la mazwi: “Sonke iSibhalo siphefumlelwe nguThixo kwaye siyingenelo ekufundiseni, ekohlwayeni, ekubekeni izinto ngokuthe tye, ekuqeqesheleni ebulungiseni.” (2 Timoti 3:16) Kule mpapasho siza kukukhuthaza uqwalasele indlela iBhayibhile engakunceda ngayo ‘ubeke izinto ngokuthe tye’ xa usingatha iingcinezelo neengxaki ezibhuqa iintsapho namhlanje.
18. Kutheni kusengqiqweni ukwamkela iBhayibhile njengegunya lokucebisa ngomtshato?
18 Ukuba ayingeni kakuhle kuwe into yokuba iBhayibhile inganceda iintsapho zonwabe, khawucinge ngolu hlobo: Lowo uphefumlele iBhayibhile nguMsunguli welungiselelo lomtshato. (Genesis 2:18-25) IBhayibhile ithi igama lakhe nguYehova. (INdumiso 83:18) UnguMdali ‘noBawo, lowo ebizwa ngaye yonke intsapho ezulwini nasemhlabeni.’ (Efese 3:14, 15) UYehova ebebuqwalasele ubomi bentsapho ukususela ekuqaleni kwabantu. Uyazazi iingxaki ezinokuvela ibe unikele icebiso lokuzicombulula. Kuyo yonke imbali, abo bebesebenzisa imigaqo yeBhayibhile ngokunyanisekileyo kubomi beentsapho zabo bafumene ulonwabo olungathethekiyo.
19-21. Ngawaphi amava ezi mini abonisa amandla eBhayibhile okucombulula iingxaki zomtshato?
19 Ngokomzekelo, omnye umama waseIndonesia wayelikhoboka lokungcakaza. Kangangeminyaka wayengabakhathalelanga abantwana bakhe abathathu yaye behleli nje babexambulisana nendoda yakhe. Wandula ke waqalisa ukufundisisa iBhayibhile. Ngokuthe ngcembe eli bhinqa laqalisa ukukukholelwa okuthethwa yiBhayibhile. Xa lasebenzisa isiluleko sayo, laba ngumfazi olungileyo. Imigudu yalo, esekelwe kwimigaqo yeBhayibhile, yazisa ulonwabo kwintsapho yalo iphela.
20 Omnye umama waseSpeyin uthi: “Saqala ukuba neengxaki ezinkulu xa sasinonyaka omnye kuphela sitshatile.” Yena nomyeni wakhe babahlukile kwizinto ezininzi, ibe babengafane bathethe ngaphandle kokuba bayaxabana. Nangona babenentombazana eselula, bagqiba kwelokuba bahlukane ngokwasemthethweni. Noko ke, ngaphambi kokuba kwenzeke oko, bakhuthazwa ukuba bafunde iBhayibhile. Bafunda ngesiluleko sayo kumadoda namabhinqa atshatileyo baza baqalisa ukusisebenzisa. Kungentsuku zatywala, babesebenxibelelana ngoxolo ibe intsapho yabo encinane yayimanyene yonwabile.
21 IBhayibhile iyabanceda nabantu abakhulileyo. Ngokomzekelo, qwalasela la mava esibini esithile saseJapan. Indoda yaloo mzi yayinomsindo okhawulezayo yaye maxa wambi ibe nogonyamelo. Okokuqala, iintombi zesi sibini zaqalisa ukufundisisa iBhayibhile, nangona abazali bazo babengayifuni loo nto. Emva koko, indoda yalandela iintombi zayo, kodwa umfazi engafuni nokuva. Noko ke, ekuhambeni kweminyaka, waphawula imiphumo emihle ebangelwa yiBhayibhile kwintsapho yakhe. Iintombi zakhe zazimphethe kakuhle, yaye umyeni wakhe enobubele. Olo tshintsho lwenza eli bhinqa lafuna ukufunda iBhayibhile nalo, ibe yaba nemiphumo emihle nakulo. Eli bhinqa likhulileyo lihlala lisithi: “Saba sisibini esitshatileyo ngokwenene.”
22, 23. IBhayibhile izinceda njani zonke iindidi zabantu zonwabe kubomi bazo bentsapho?
22 Le mbinana iphakathi kwendimbane enkulu yabo bafumene imfihlelo yolonwabo lwentsapho. Baye basamkela isiluleko seBhayibhile baza basisebenzisa. Liyinyaniso elokuba njengaye wonk’ ubani baphila kwihlabathi elinogonyamelo, elinokuziphatha okubi, elinemeko yezoqoqosho enkenenkene. Ngaphezu koko, abafezekanga, kodwa bayonwatyiswa kukuzama ukwenza ukuthanda koMsunguli welungiselelo lentsapho. Kunjengokuba iBhayibhile isitsho, uYehova uThixo ‘ungokufundisa okungakuncedayo, akunyathelise ngendlela oya kuhamba ngayo.’—Isaya 48:17.
23 Nangona iBhayibhile yabhalwa kwiminyaka ephantse ibe ngamawaka amabini eyadlulayo, isiluleko sayo asiphelelwanga lixesha. Ngapha koko, yayibhalelwe bonke abantu. IBhayibhile asiyoncwadi yaseMerika okanye yaseNtshona. UYehova “wazenza ngokuphuma kumntu omnye zonke iintlanga zabantu,” ibe Yena uyakwazi ukubunjwa kwabantu bonke. (IZenzo 17:26) Imigaqo yeBhayibhile iluncedo kumntu wonke. Ukuba uyayisebenzisa, nawe uya kuyazi imfihlelo yolonwabo lwentsapho.
UNGAYIPHENDULA LE MIBUZO?
Kwenzeka ntoni entsatsheni namhlanje?—2 Timoti 3:1-4.
Ngubani owasungula ilungiselelo lentsapho?—Efese 3:14, 15.
Yintoni imfihlelo yolonwabo lwentsapho?—Isaya 48:17.
[Umfanekiso ozalise iphepha, kwiphepha 4]