Ngaba Uzixabisa Ngokwenene Iintsikelelo ZikaYehova?
UKENICHI indoda esele iqinile, watyelela ikhemisti ukuze afumane iyeza kuba wayekhathazwa nje ngumkhuhlane. Xa waliselayo elo yeza, waba nerhashalala namadyungu-dyungu kuwo wonke umzimba. Akumangalisi ke ngoko ukuba, uKenichi waqalisa ukuthandabuza enoba loo sokhemisti wayenikele ingqalelo epheleleyo koko wayekufuna.
Bambi basenokucinga ngoYehova uThixo ngendlela efanayo naleyo uKenichi wayecinge ngayo ngosokhemisti. Bayathandabuza enoba uThixo ongusomandla uYehova, unomdla wokwenene kuthi ngokwabantu ngabanye. Nangona beqonda ukuba uThixo ulungile, abeyisekanga kwelokuba ukhathalele ngamnye wethu. Oku kuyinyaniso ngakumbi xa izinto zingabahambeli kakuhle okanye xa ukubambelela kwabo kwimigaqo yeBhayibhile kulandelwa ziingxaki ezinzima. Ngenxa yokuswela ukuqonda babona iingxaki zabo zifana nerhashalala namadyungu-dyungu awayengawalindelanga uKenichi, ngokungathi ngandlel’ ithile zibangelwa nguThixo.—IMizekeliso 19:3.
UYehova akamele athelekiswe nabantu abangafezekanga. Abantu banolwazi nobuchule obulinganiselweyo. Abakwazi ukuziqonda ngokupheleleyo iimfuno zokwenene zabanye, njengokuba wenzayo nosokhemisti kaKenichi. Ngokwahlukileyo koko, ayikho into esitheleyo emehlweni kaYehova. Ngokufuthi uYehova uyasinceda singaqondanga okanye singakwazi oko ngenxa yokuba sinotyekelo lokugxininisa koko singenako nolokuzibetha ngoyaba iintsikelelo esinazo. Kunokuba sikhawuleze sigxeke uYehova ngenxa yeengxaki esijamelana nazo, sifanele sizame ukuqonda iintsikelelo esizinandiphayo ezivela kuYehova.
Ngokutsho kweWebster’s Ninth New Collegiate Dictionary, “intsikelelo” inokuchazwa “njengento eyongezelela kulonwabo nakwintlalo-ntle.” Ngaba uyaqonda ukuba oku kuyinyaniso ngokukodwa ngeentsikelelo ezivela kuYehova?
Akanakuthelekiswa Nanto Njengomlungiseleli
Xa umfazi esithi umyeni wakhe ungoyena mlungiseleli, ngokuqhelekileyo uthetha ukuba uzanelisa ngokwaneleyo iimfuno zentsapho yakhe, uyilungiselela ukudla okwaneleyo, ikhusi neempahla esenzela ulonwabo nentlalo-ntle yentsapho. Ulunge kangakanani uYehova njengoMlungiseleli wethu? Khawuqwalasele isijikelezi-langa sethu esinguMhlaba, ikhaya lomntu. Umi kwisithuba esinokuba ziikhilomitha ezili-150 000 000 ukususela elangeni, umgama oyilungeleyo imozulu eneqondo lobushushu eliphakathi okwenza abantu bakwazi ukuphila apha emhlabeni. Iqondo elingu-23,5 lokuthambeka kwelizwe lonke lakhiwe ngokugqibeleleyo, ngenxa yoko oko kuphumela kumaxesha onyaka anegalelo kwizivuno eziyintabalala. Ngenxa yoko, umhlaba wondla abantu abangaphezu kwamawaka amahlanu ezigidi. Ngokwenene uYehova nguMlungiseleli omangalisayo!
Ngaphezu koko, iBhayibhile iyasiqinisekisa ukuba uYehova unomdla wokwenene kuthi nakwintlalo-ntle yethu. Khawufan’ ucinge, uYehova wazi nganye inkwenkwezi kwezingamawaka ezigidi ngamagama azo, yaye akukho nenye esemhlabeni angayaziyo. (Isaya 40:26; Mateyu 10:29-31) Hayi indlela ekumele ukuba ubakhathalela ngayo abantu abamthandayo nabathengwa ngegazi elixabisekileyo loNyana wakhe oyintanda, uYesu Kristu! (IZenzo 20:28) Kaloku indoda esisilumko yathi: “Intsikelelo kaYehova, yiyo etyebisayo, imbulaleko ayongezi nento kuyo.”—IMizekeliso 10:22.
Iintsikelelo Ezisityebisayo
Sinento exabiseke kakhulu esimele siyivuyele ngokwenene. Yintoni leyo? IBhayibhile iyichaza ngokuthi: “Ulungile kum umyalelo womlomo wakho, ngaphezu kwamawaka egolide nesilivere.” (INdumiso 119:72; IMizekeliso 8:10) Njengokuba igolide inexabiso eliphezulu kangako, umthetho kaYehova unqweneleka ngakumbi. Ulwazi oluchanileyo lomthetho wakhe kuquka ingqiqo nokuqonda okunikelwa nguYehova kubantu abanxanelwe inyaniso ngokunyaniseka zizinto ezimele zixatyiswe. Zisixhobisela ekubeni sizikhusele, sikwazi ukujamelana neemeko ezinzima, ukusingatha iingxaki ngokuphumelelayo, ngaloo ndlela siyoneliseka size sonwabe.
Oku kuyinyaniso nangabo baselula. Qwalasela indlela enye intombazana eselula eyahlangabezana ngayo neengxaki zayo ngokulandela umthetho kaYehova. Le ntombazana, uAkemi, ihlala kufuphi naseTokyo. Uyise nonina basebenzisa imigaqo yeBhayibhile ekuyiqeqesheni yaye ngamazwi nangomzekelo bayinceda intombazana yabo ukuba ibe nothando ngoYehova nangommelwane. Bebona iingxaki esenokujamelana nazo esikolweni, bazama ukuyilungiselela ngeyona ndlela ilungileyo. Noko ke, xa uAkemi wangena kwisikolo sabaqalayo, abanye awayefunda nabo bambona ‘njengowahlukileyo’ ngenxa yokuba wayethandaza ngaphambi kokuba atye yaye ngokuthembeka wayengabandakanyeki kweminye imibandela engeyoyazibhalo. Kungekudala waba sisisulu seqela labaxhaphazi elalimxinanisela xa kuphuma isikolo lize limqhwabe, limjije iingalo lize lenze intlekisa ngaye.
UAkemi oselula akazange aziphindezele, engazange oyikiswe nangabo babemthuthumbisa. Kunoko, wazama ukusebenzisa oko wayekufundile. Ngenxa yehambo entle nenkalipho awayenayo, wahlonelwa luninzi lwabantwana awayefunda nabo. Bawusa kumfundisi-ntsapho loo mbandela, yaye ukususela ngaloo mini, uAkemi akazange aphinde axhatshazwe esikolweni.
Yintoni eyanceda uAkemi wakwazi ukusingatha loo ngxaki inzima ngokuphumelelayo? Lulwazi oluchanileyo, ukuqonda nobulumko obuvela kuYehova nobo wayebufundiswe ngabazali bakhe. Wayeqhelene nendlela uYesu awanyamezela ngayo, yaye oko kwamshukumisela ekubeni alandele umzekelo wakhe. IBhayibhile yamnceda waqonda ukuba bambi benza izinto ezingalunganga ngenxa yokungazi, yaye oko kwamenza wakucaphukela oko kubi kwakusenziwa ngabo baxhaphazi ngoxa engabacaphukeli bona ngokwabo abantu.—Luka 23:34; Roma 12:9, 17-21.
Kakade ke, akukho bazali banokuvuya xa bebona umntwana wabo egculelwa yaye exhatshazwa. Sekunjalo, yiba nomfanekiso-ngqondweni wendlela abavuya ngayo abazali baka-Akemi xa beva iinkcukacha zoko kwenzekayo. Abantwana abanjalo bayintsikelelo evela kuYehova ngokwenene.—INdumiso 127:3; 1 Petros 1:6, 7.
Ukulindela KuYehova Ngomonde
Noko ke, ngaphambi kokufumana intsikelelo kaYehova, maxa wambi umele ulindele kuye. UYehova uyayazi imeko okuyo yaye unikela uncedo lwento yonke xa iya kuba yingenelo kuwe. (INdumiso 145:16; INtshumayeli 3:1; Yakobi 1:17) Usenokuba uyazithanda iziqhamo, kodwa ubuya kucinga ntoni ngomntu okunika isiqhamo ngaphambi kokuba silungele ukudliwa? Enoba yiapile, iorenji okanye enye into, ubuya kunqwenela ukuba isiqhamo sakho sivuthwe, sibe namanzi yaye sibe nencasa. Ngokufanayo, uYehova unikela oko ukufunayo ngexesha elifanelekileyo—kungekhona ngaphambi kwexesha yaye kungekhona emva kwexesha.
Khumbula amava kaYosefu. Nangona wayengenatyala, wazifumana ekwintolongo ephantsi komhlaba eYiputa. Ibanjwa awayekunye nalo, elalingumngcamli kaFaro, lalinethemba lokuba liza kukhululwa lize lizise kwingqalelo kaFaro ityala likaYosefu. Kodwa emva kokukhululwa kwalo lamlibala uYosefu. Kubonakala ngathi uYosefu wayelahliwe. Noko ke, emva kweminyaka emibini, ekugqibeleni wakhululwa entolongweni waza wenziwa umlawuli wesibini eYiputa. Kunokuba aphelelwe ngumonde, uYosefu walindela kuYehova. Ngenxa yoku, wasikelelwa nto leyo eyathetha ukusindiswa kwamaSirayeli namaYiputa.—Genesis 39:1–41:57.
UMasashi wayengumdala kwibandla elikumantla eJapan. Wayengekho kwintolongo ephantsi komhlaba, kodwa kwafuneka alindele kuYehova. Ngoba? Ukususela ekubeni iSikolo Sokuqeqesha Abalungiseleli, isikolo sokuqeqesha abalungiseleli abangamaKristu abafanelekayo, sasekwayo eJapan, wazibekela usukelo oluqinisekileyo lokuya kuso. Wazingisa ethandazela eli lungelo. Owayenguvulindlela naye wamenywa ukuba aye, kodwa phezu kwawo nje umnqweno wakhe wokwenene, uMasashi akazange amenywe. Wadana gqitha.
Sekunjalo, wathabatha amanyathelo okuhlangabezana neemvakalelo zakhe. Wafundisisa iBhayibhile neempapasho ezipapashwe yiWatch Tower Society, egxininisa ngakumbi kwimixholo ethetha ngokuthobeka nokulawula iimvakalelo zikabani. Wayilungisa indlela awayecinga ngayo yaye ngaloo ndlela wafumana ulwaneliseko olungakumbi emsebenzini wakhe. Emva koko, xa wayengasenalo nethemba, wafumana isimemo sokuya esikolweni.
Ekubeni wayesele ehlakulele iimpawu ezinjengomonde nokuthobeka, wangenelwa ngakumbi esikolweni. Kamva, uMasashi wafumana ilungelo lokukhonza abazalwana bakhe njengomveleli ohambahambayo. Ewe, uYehova wayekwazi oko wayekufuna uMasashi yaye wamnika kanye ngexesha elifanelekileyo ukuze kufeze okona kulungileyo.
Funa Iintsikelelo Zakhe
Ngenxa yoko, uYehova akafani nalo sokhemisti. Nangona sisenokungayiqondi inkathalo nenkxalabo kaYehova, ububele bakhe ububonisa ngeendlela ngeendlela—maxa wambi ngeendlela ezisilungela ngakumbi. Ngoko qhubeka ufuna iintsikelelo zakhe. Khumbula ukuba sele unezizathu ezininzi zokuba nombulelo. Uye wasikelelwa ngelungiselelo elisisiseko lokuqhubeka uphila emhlabeni. Uye wanikwa ulwazi ngoYehova nangeendlela zakhe ezigqibeleleyo. Uye wanikwa ingqiqo. Yaye uye wazuza ukuqonda. Zonke ezi zinto zifaka isandla kwintlalo-ntle nakulonwabo lwakho.
Ukuze ufumane intsikelelo engakumbi kaYehova, qhubeka ufundisisa iBhayibhile rhoqo. Mbongoze uYehova ukuba akuncede uqonde iimfundiso zakhe ezinjengegolide ezikwiLizwi lakhe eliphefumlelweyo. Ziya kukutyebisa ngokomoya, ukuze ungasweli nto. Ewe, ziya kuthetha ulonwabo nolwaneliseko lwakho ngoku nakubomi obungenasiphelo kwihlabathi elitsha elizayo.—Yohane 10:10; 1 Timoti 4:8, 9.
[Umfanekiso okwiphepha 23]
Intsikelelo kaYehova ixabiseke ngakumbi kunegolide