Indlela Inyaniso Esikhulula Ngayo
1 Ngesinye isihlandlo, uYesu wathi kumaYuda awayekholelwa kuye: “Niya kuyazi inyaniso, yaye inyaniso iya kunikhulula.” (Yoh. 8:32) Wayethetha ngenkululeko ewodlula lee amalungelo abantu aqhelekileyo, inkululeko enokufunyanwa nguye wonk’ ubani—abazizityebi okanye abangamahlwempu, abafundileyo nabangafundanga. UYesu wafundisa inyaniso eyayiza kukhulula abantu esonweni nasekufeni. Njengoko uYesu wachazayo, “wonke umenzi wesono ulikhoboka lesono.” (Yoh. 8:34) Hayi indlela esililangazelela ngayo ixesha laxa bonke abantu abathobelayo ‘beya kukhululwa ekukhotyokisweni kukonakala baze babe nenkululeko ezukileyo yabantwana bakaThixo’!—Roma 8:21.
2 Inyaniso engoYesu nendima yakhe kwinjongo kaThixo iyasikhulula. Iquka ukwazi ngedini lentlawulelo awalinikela ngenxa yethu. (Roma 3:24) Kwanangoku, ukwamkela nokuzithoba kwinyaniso yeBhayibhile kusenza sikhululeke ngomlinganiselo othile kuloyiko, ekuphelelweni lithemba, nakuyo yonke imikhwa eyingozi.
3 Ukukhululeka Kuloyiko Nasekuphelelweni Lithemba: Asifanele siphelelwe lithemba ngenxa yeemeko zehlabathi kuba siyasazi isizathu sokuba ubungendawo bubekho kwaye siyazi ukuba kungekudala buza kushenxiswa emhlabeni. (INdu. 37:10, 11; 2 Tim. 3:1; ISityhi. 12:12) Ukongezelela koko, inyaniso iyasikhulula kwiimfundiso zobuxoki ngemeko yabafi. Siyazi ukuba abafi abanakusenza nto, abathuthunjiswa ngonaphakade, nokuba uThixo akathabathi bantu ngokubabulala aze ababizele kuye kwelemimoya.—INtshu. 9:5; IZe. 24:15.
4 Le nyaniso yalondoloza enye indoda nomfazi wayo xa umntwana wabo wafa kwingozi. Lo mama wathi: “Kukho isikhewu ebomini bethu esingayi kuvaleka de simbone kwakhona unyana wethu eluvukweni. Kodwa siyazi ukuba intlungu yethu yeyexeshana nje.”
5 Ukukhululeka Kwimikhwa Eyingozi: Inyaniso yeBhayibhile inokuyitshintsha indlela umntu acinga ngayo kunye nobuntu bakhe, ibe loo nto inokumkhulula kwiingxaki ezinokuphepheka. (Efe. 4:20-24) Ukunyaniseka nokukhuthala kunokusinceda silwe nobuhlwempu. (IMize. 13:4) Ukuba nomoya wokuzincama kuyaluphucula ulwalamano lwethu nabanye. (Kol. 3:13, 14) Ukuhlonela ubuntloko bamaKristu kuyazinciphisa iingxaki zentsapho. (Efe. 5:33–6:1) Ukuphepha ubunxila, ukuziphatha okubi ngokwesini, ukutshaya nokukhotyokiswa ziziyobisi kusigcina sisempilweni.—IMize. 7:21-23; 23:29, 30; 2 Kor. 7:1.
6 Omnye umfana woyiswa kukuqhawula amakhamandela eziyobisi kangangeminyaka elithoba. Ngeny’ imini wadibana nomvakalisi owayeshumayela esitratweni. Walwamkela uncwadi, ibe kwenziwa amalungiselelo okuba atyelelwe ekhayeni lakhe. Kwaqaliswa isifundo seBhayibhile. Kwiinyanga ezimbini kamva le ndoda yayeka ngokupheleleyo ukusebenzisa iziyobisi, ibe emva kokufundelwa iinyanga ezisibhozo, yabhaptizwa. Umkhuluwa wayo kunye nomfazi wakhe baqalisa ukufundisisa iBhayibhile xa befumanisa ukuba uye wakwazi ukubhungca kuloo makhamandela eziyobisi.
7 Nceda Abanye Bafumane Inkululeko: Abo banexesha elide bekhotyokiswa ziimfundiso zobuxoki basenokukufumanisa kunzima ukuyiqonda inkululeko efumaneka kwiLizwi likaThixo. Kusenokufuneka ukuzimisela kunye nokulungiselela kulowo ubafundisayo ukuze akwazi ukufikelela iintliziyo zabo. (2 Tim. 4:2, 5) Ngoku asiloxesha lokurhuq’ iinyawo kumsebenzi esiwenzayo ‘wokubhengeza inkululeko kwabo bathinjiweyo.’ (Isa. 61:1) Inkululeko yamaKristu ixabiseke kakhulu. Ukuyifumana kuthetha ubomi obungunaphakade.—1 Tim. 4:16.