Isifundo 5
Yintoni Injongo KaThixo Ngomhlaba?
Kwakutheni ukuze uYehova adale umhlaba? (1, 2)
Kutheni umhlaba ungeyoparadisi ngoku? (3)
Kuya kwenzeka ntoni kubantu abangendawo? (4)
Kwixesha elizayo, yintoni uYesu aya kuyenzela abagulayo? abalupheleyo? abafileyo? (5, 6)
Ukuze uzuze kwiintsikelelo zexesha elizayo, yintoni ofanele uyenze? (7)
1. UYehova wawudala lo mhlaba ukuze abantu bakunandiphe ukuphila kuwo ngonaphakade. Wayefuna ukuba ngamaxesha onke umhlaba umiwe ngabantu abangamalungisa, abonwabileyo. (INdumiso 115:16; Isaya 45:18) Umhlaba awusokuze utshatyalaliswe; uya kuhlala ngonaphakade.—INdumiso 104:5; INtshumayeli 1:4.
2. Ngaphambi kokuba uThixo enze umntu, wakhetha ummandla omnye omncinane womhlaba waza wawenza iparadisi entle. Wawubiza ngokuba ngumyezo wase-Eden. Kulapho wayibeka khona indoda nomfazi wokuqala, uAdam noEva. Injongo kaThixo ngabo yayikukuba babe nabantwana baze bawuzalise umhlaba. Ngokuthe ngcembe ngebabewenze wonke umhlaba wayiparadisi.—Genesis 1:28; 2:8, 15.
3. UAdam noEva bona ngokuthi ngabom bophule umthetho kaThixo. Ngoko uYehova wabagxotha emyezweni wase-Eden. Iparadisi yaphela. (Genesis 3:1-6, 23) Kodwa uYehova akayilibalanga injongo yakhe ngalo mhlaba. Uthembisa ukuba uya kuwenza ube yiparadisi, apho abantu baya kuhlala khona ngonaphakade. Uya kukwenza njani oku?—INdumiso 37:29.
4. Ngaphambi kokuba lo mhlaba ube yiparadisi, abantu abangendawo bamele bashenxiswe. (INdumiso 37:38) Oku kuya kwenzeka ngeArmagedon, imfazwe kaThixo yokuphelisa ubungendawo. Emva koko, uSathana uya kukhonkxwa iminyaka eli-1 000. Oku kuthetha ukuba akukho bantu bangendawo baya kusala emhlabeni ukuze bawonakalise. Kuphela ngabantu bakaThixo abaya kusinda.—ISityhilelo 16:14, 16; 20:1-3.
5. Uya kwandula ke uYesu Kristu alawule njengoKumkani phezu kwalo mhlaba iminyaka eli-1 000. (ISityhilelo 20:6) Ngokuthe ngcembe uya kusishenxisa isono ezingqondweni nasemizimbeni yethu. Siya kuba ngabantu abafezekileyo kwanjengokuba uAdam noEva babefezekile ngaphambi kokuba bone. Ngoko akusayi kuphinda kubekho kugula, ukwaluphala nokufa. Abantu abagulayo baya kuphiliswa, yaye abantu abadala baya kuphinda babe batsha.—Yobhi 33:25; Isaya 33:24; ISityhilelo 21:3, 4.
6. Ebudeni boLawulo lukaYesu Lweminyaka Eliwaka, abantu abathembekileyo baya kusebenza ukuze baguqule umhlaba ube yiparadisi. (Luka 23:43) Kwakhona, izigidi zabafileyo ziya kuvuselwa ebomini njengabantu emhlabeni. (IZenzo 24:15) Ukuba ziyakwenza oko uThixo akufunayo kuzo, ziya kuqhubeka ziphila emhlabeni ngonaphakade. Ukuba akunjalo, ziya kutshatyalaliswa ngonaphakade.—Yohane 5:28, 29; ISityhilelo 20:11-15.
7. Ngaloo ndlela injongo kaThixo yantlandlolo ngomhlaba iya kuphumelela. Ngaba ungathanda ukuzuza kwezi ntsikelelo zexesha elizayo? Ukuba kunjalo, kufuneka uqhubeke ufunda ngoYehova uze uthobele oko akufunayo. Ukuya kwiintlanganiso eziqhutyelwa kwiHolo yoBukumkani yasekuhlaleni yamaNgqina kaYehova kuya kukunceda ukuze wenjenjalo.—Isaya 11:9; Hebhere 10:24, 25.
[Umfanekiso okwiphepha 10]
Iparadisi iphelile
[Imifanekiso ekwiphepha 11]
Emva kweArmagedon, umhlaba uya kwenziwa iparadisi