“Ubunokuba Nguvulindlela Ophum’ Izandla!”
1. Omnye udade wavakalelwa njani ngobuvulindlela bakhe?
1 “Awukho omnye umsebenzi obunokundanelisa okanye undiphathele iingenelo zokomoya ukodlula lo.” Watsho uKathe B. Palm. Wachitha amashumi eminyaka enguvulindlela eshumayela elityhutyha lonke elaseChile, kuMzantsi Merika. Ngenxa yobomi obunomvuzo babo bakwinkonzo yexesha elizeleyo, mhlawumbi kukho umntu owakha wathi kuwe: “Ubunokuba nguvulindlela ophum’ izandla!”
2. Chaza ukuba kutheni ulwaneliseko lufumaneka ekwenzeni izinto zokomoya.
2 Ubomi Obanelisayo: Umzekelo wethu, uYesu, wafumana ukuhlaziyeka kwenene ekwenzeni ukuthanda kukaYise. (Yoh. 4:34) Ngoko ke, ngokunyaniseka uYesu wafundisa abafundi bakhe ukuba ulwaneliseko lwenene lufumaneka ekwenzeni imisebenzi enokuthanani nonqulo lukaYehova. Siyavuya xa sisenza umsebenzi ozisa inkoliseko kuYehova. Ukongezelela, njengoko sinikela ngexesha, amandla, nezinto zethu ukuze sincede abanye, sivuya nangakumbi.—IZe. 20:31, 35.
3. Luluphi uvuyo esiba nalo ngokuchitha ixesha elingakumbi kubulungiseleli?
3 Okukhona sichitha ixesha elingakumbi entsimini, kokukhona sisiba namathuba angakumbi okufumana uvuyo lokuqhuba izifundo zeBhayibhile. Kwanakwiimeko apho abaninimzi abaninzi bebonakala bechasa, sisenokufumanisa ukuba intsimi yethu inemveliso kunokuba besicinga njengoko sisiba namava nobuchule kubulungiseleli. Oovulindlela banokusebenzisa imfundo abayifumana kwiSikolo Senkonzo Yobuvulindlela emva kokuba bengoovulindlela kangangonyaka. (2 Tim. 2:15) Njengoko sizingisa, siya kuba sityala imbewu yenyaniso eya kuvelisa isiqhamo kamva.—INtshu. 11:6.
4. Ulutsha oluza kugqiba isikolo lufanele lucinge ngantoni?
4 Lutsha: Njengoko nigqibezela imfundo yenu esisiseko, ngaba nikhe nacinga ngekamva lenu? Ukuza kuthi ga ngoku, ucwangciso lwenu belulawulwa ngumsebenzi wenu wesikolo. Niza kulisebenzisa njani ixesha eninalo nakuba nigqibile esikolweni? Endaweni yokuzama impangelo, kutheni ningacingi ngokuzibekela usukelo lokuba ngoovulindlela abathe ngxi? Ubuchule eniza kubufunda—ukushumayela kubantu abahlukeneyo, ukoyisa imiqobo ethile ebomini benu, ukuhlakulela ukuzeyisa, nokufunda ubuchule bokufundisa—buya kuninceda ebomini.
5. Abazali nebandla linokubukhuthaza njani ubuvulindlela?
5 Bazali, ngaba nenza konke okusemandleni enu ukunceda abantwana benu bathathe inkonzo yexesha elizeleyo? Izinto enizithethayo nomzekelo wenu omhle ungenza lukhulu ukubanceda babeke izilangazelelo zoBukumkani kuqala. (Mat. 6:33) URay, owaqalisa ukuba nguvulindlela emva kokuba egqibe isikolo uthi: “Umama wayesoloko esithi ubuvulindlela bubangela ubomi obanelisayo.” Bonke ebandleni banokukhuthaza inkonzo yobuvulindlela ngendlela abathetha ngayo nangenxaso yabo. UJose, waseSpeyin, uthi: “Ibandla lam laliwugqala umsebenzi wobuvulindlela njengowona msebenzi ubalulekileyo ulutsha olunokuwenza. Amagqabaza noxabiso lwalo ngenkonzo yobuvulindlela kunye noncedo lwabo zenza kwalula ukuba ndibe nguvulindlela.”
6. Sinokwenza ntoni ukuba ngoku asikunqweneli ukuba ngoovulindlela?
6 Ukweyisa Imiqobo: Kodwa kuthekani ukuba uthi, ‘Andikunqweneli ukuba nguvulindlela’? Ukuba yindlela ovakalelwa ngayo le, thandaza kuYehova uthi, ‘Andazi ukuba ubuvulindlela buya kundilungela mna, kodwa ndifuna ukukholisa wena.’ (INdu. 62:8; IMize. 23:26) Emva koko khangela ulwalathiso kwiLizwi nakwintlangano yakhe. Oovulindlela abathe ngxi abaninzi baqalisa ‘ukubungcamla’ ubuvulindlela ngokuthatha ubuvulindlela babancedani, kwaye uvuyo abalufumanayo lwabashukumisela ukuba babe kwinkonzo yexesha elizeleyo.—INdu. 34:8.
7. Sinokukweyisa njani ukungaqiniseki ukuba sinokuzifikelela kusini na iiyure ezingama-70 ezifunekayo?
7 Kuthekani ke ukuba akuqinisekanga ukuba ungazifikelela iiyure ezingama-70 ezifunekayo? Kutheni ungathethi noovulindlela abaneemeko ezifanayo nezakho? (IMize. 15:22) Emva koko bhala amacwangciso aliqela onokukhetha kuwo. Usenokufumanisa ukuba ukuzongela ixesha lobulungiseleli kwizinto ezingabalulekanga kulula kunokuba ubucinga.—Efe. 5:15, 16.
8. Kutheni sifanele sihlole iimeko zethu rhoqo?
8 Hlola Iimeko Zakho Kwakhona: Iimeko zomntu ziyatshintsha. Kuhle ukuhlola imeko yakho rhoqo. Ngokomzekelo, ngaba sele uza kuthatha umhlala-phantsi? URandy, owathath’ umhlala-phantsi ngaphambi kwexesha, uthi: “Esi sigqibo siye sandinika ithuba lokuba nguvulindlela nenkosikazi yam, kwaye sisinike ithuba lokuba sifudukele apho kufuneka abalungiseleli abangakumbi. Ndiye ndafumana intlaninge yeentsikelelo ngesigqibo sam, kodwa eyona ntsikelelo izigqitha zonke sisazela esicocekileyo.”
9. Yintoni izibini ezitshatileyo ezifanele zicinge ngayo?
9 Ezinye izibini ezitshatileyo ziye zafumanisa ukuba emva kokuba zihlole iimeko zazo akukho mfuneko yokuba zisebenze ixesha elizeleyo. Ewe kona, oku kusenokuthetha ukuba intsapho yenze lula ubomi bayo, kodwa ayiyi kuzisola. UJohn, onomfazi osandul’ ukuyeka emsebenzini ukuze andise ubulungiseleli bakhe, uthi: “Akukho nto ivuyisa njengokwazi ukuba ebudeni bemini umfazi wam uxakeke zizinto zokomoya.”
10. Yintoni eshukumisa amaKristu ukuba abe ngoovulindlela?
10 Ukubonisa Uthando Nokholo: UYehova uye wenza umsebenzi wokushumayela wangowona ubalulekileyo esinokuwenza. Le nkqubo yezinto iza kutshatyalaliswa kungekudala, kwaye ngabo babiza igama likaYehova kuphela abaya kusindiswa. (Roma 10:13) Intliziyo ezaliswe kukumthanda nakukuxabisa oko asenzele kona iya kusishukumisela ukuba sithobele uthumo oluvela kuNyana wakhe lokuba sishumayele ngenzondelelo. (Mat. 28:19, 20; 1 Yoh. 5:3) Ukongezelela koko, ukuba nokholo lokuba ngenene siphila kwimihla yokugqibela kuya kusishukumisela ukuba senze konke okusemandleni kubulungiseleli ngoku kusekho ixesha, kunokuba sisebenzise ihlabathi ngokupheleleyo.—1 Kor. 7:29-31.
11. Sifanele sivakalelwe njani ukuba umntu uthi besiya kuba ngoovulindlela abaphum’ izandla?
11 Ukuba nguvulindlela asikokuchitha nje iiyure entsimini; kukubonisa uzinikelo lwethu kuThixo. Ngoko ukuba kukho umntu othi kuwe ubunokuba nguvulindlela ophum’ izandla, uyakuncoma loo mntu. Yicingisise ngomthandazo into yokuba nguvulindlela kunye nabo benza le nkonzo yanelisayo.
[Amagama acatshulweyo akwiphepha 4]
Bazali, ngaba nenza konke okusemandleni enu ukunceda abantwana benu bathathe inkonzo yexesha elizeleyo?
[Amagama acatshulweyo akwiphepha 5]
UYehova uye wenza umsebenzi wokushumayela wangowona ubalulekileyo esinokuwenza.