Ngaphambi Kokuba Ushumayele, Kunokufuneka Ukhangele
1. Kutheni izabelo zentsimi zamabandla akwiindawo ekuthethwa iilwimi ezininzi zisahlulwa ngolwimi?
1 NgePentekoste yowama-33 C.E., emva kokuba abafundi bakaYesu befumene umoya oyingcwele “baqala ukuthetha ngeelwimi ezahlukileyo” kubantu ababelapho ababevela kwiindawo ezikude. (IZenzo 2:4) Ngenxa yoko, kwabhaptizwa abantu abamalunga nama-3 000. Okubangel’ umdla kukuba, inkoliso yabantu ababelapho babekwazi ukuthetha isiHebhere okanye isiGrike. Nakuba kunjalo, uYehova wakhetha ukuba bashunyayezwe isigidimi soBukumkani ngeelwimi zabo zomthonyama. Ngokungathandabuzekiyo esinye sezizathu kukuba, abantu bayaziphulaphula iindaba ezilungileyo xa beshunyayezwa ngolwimi lwabo. Ngenxa yoko, namhlanje izabelo zentsimi kwimimandla eneelwimi ezahlukeneyo zahlulwa ngokweelwimi. (Ulungelelwano, iphe. 107, isiqe. 2-3) Amaqela athetha iilwimi zasemzini akazifumani izabelo zentsimi, kodwa ashumayela kwabo bathetha ulwimi lwabo kwintsimi yebandla abakulo nakweyamanye amabandla.
2. (a) Liyintoni iphulo lokukhangela abantu abathetha olunye ulwimi, yaye kuphi apho linokuba yimfuneko khona? (b) Anokuncedana njani amabandla xa esebenza intsimi eneelwimi ezahlukeneyo? (c) Sifanele senze ntoni xa sidibana nomntu onomdla othetha olunye ulwimi?
2 Ukuba uhlala kwindawo ethetha ulwimi olunye kunokuba lula ukusuka nje uye kwindlu ngendlu. Noko ke, imeko iyahluka ukuba uhlala kwindawo ekuthethwa iilwimi ezininzi kuyo. Amabandla athetha ezinye iilwimi asenokuba ashumayela kwakulo ntsimi. Ngoxa ibandla linokuninceda ngeenkcukacha zabantu abathetha ulwimi lwenu entsimini, yimbopheleleko yebandla okanye iqela lenu ukufumana abantu abathetha ulwimi lwenu. (Funda ibhokisi ethi “Ncedanani.”) Ngenxa yoko, kunokufuneka uncedise kwiphulo lokukhangela abantu abathetha ulwimi oluthile. Linokwenziwa njani eli phulo?
3. Inokukhethwa njani indawo eliza kukhangela kuyo ibandla okanye iqela yaye lingakanani ixesha elinokuchithwa kulo msebenzi?
3 Ukulungelelanisa Iphulo Lokukhangela: Ixesha elichithwa kwiphulo lokukhangela abantu abathetha olunye ulwimi lixhomekeka kwiimeko zelo bandla. Ngokomzekelo, bangaphi abantu abathetha olu lwimi ekuhlaleni? Bangaphi abavakalisi abahlala apho? Zingaphi iiadresi esele linazo ibandla okanye iqela? Akuyomfuneko ukuba ibandla likhangele kwindawo nganye kodwa linokukhangela kwiindawo ezihlala abantu abaninzi kwiintsimi yalo nakwezo zingekho kude kakhulu. Kuhle ukuba nephulo elilungelelaniswe kakuhle ukuze abantu abaninzi bakwazi ukufumana ithuba lokubiza egameni likaYehova.—Rom. 10:13, 14.
4. (a) Linokulungelelaniswa njani iphulo lokukhangela abantu? (b) Ziziphi ezinye iindlela onokuzisebenzisa ukuze ufumane abantu abathetha ulwimi lwakho?
4 Ukuze kungagangathwa ndawonye xa kusenziwa eli phulo, iqumrhu labadala, ngokukodwa umveleli wenkonzo, ufanele aliququzelele aze alongamele. (1 Kor. 9:26) Kumaqela athetha ulwimi lwasemzini, iqumrhu labadala lebandla elixhasa elo qela linokukhetha umzalwana ofanelekayo ukuba akhokele eli phulo, kungakuhle xa enokuba ngumdala okanye isicaka solungiselelo. Amabandla namaqela amaninzi anephulo elilungelelaniswe kakuhle lokukhangela abantu, asebenzisa incwadi yefowuni okanye i-Intanethi ukuze afumane amagama axhaphakileyo abantu abathetha olo lwimi. Emva koko, baye babafowunele okanye babatyelele ukuze baqiniseke ngeeadresi ezimele ziqukwe kwintsimi yabo. Ukuba inokwenzeka loo nto, iqumrhu labadala lebandla elixhasa iqela linokulungiselela ukuba lonke ibandla lincedise kweli phulo ngamaxesha athile.—Funda ibhokisi ethi “Indlela Yokufumana Abantu Abathetha Ulwimi Lwakho.”
5. (a) Ngawaphi amanye amacebiso anokusetyenziswa ngabavakalisi abakhangela abantu abathetha olunye ulwimi? (b) Yintoni esifanele siyithethe xa sikhangela abantu?
5 Sifanele sibe nosukelo sihlandlo ngasinye sisenza lo msebenzi wokukhangela. Ekubeni lo msebenzi uyinxalenye yobulungiseleli, sifanele sinxibe njengaxa sisiya entsimini. Abaninzi baye bafumanisa ukuba ukuziqhelisela iintshumayelo abaza kuzisebenzisa baze bathethe olo lwimi ngoxa bekhangela kuyabanceda bahlale benehlombe baze baphucule nendlela abaluthetha ngayo olo lwimi. Sinokulibala ixesha esilichitha sikhangela kodwa asinakulibala esilichithe sisenza iimaphu zentsimi okanye uludwe lweeadresi. Xa sifumene umntu othetha olo lwimi, sifanele sizame ukumshumayeza size sikhawuleze sazise umveleli wenkonzo okanye omnye umzalwana amkhethileyo ukuze iingxelo zentsimi zihlale zisexesheni. Ufanele achazelwe enoba loo mntu ebenomdla okanye engenawo. Nangona iphulo lokukhangela abantu abathetha olunye ulwimi libalulekile, sifanele silungelelane sizenze zonke iinxalenye zobulungiseleli.—Funda ibhokisi ethi “Oko Ufanele Ukuthethe Xa Ukweli Phulo.”
6. Luluphi ucelomngeni olubakho xa kukhangelwa abantu abangevayo?
6 Ukukhangela Abangevayo: Ukukhangela abantu abangevayo kulucelomngeni yaye kufuneka uzingise. Umntu ongevayo awunakumazi ngokufumana igama lakhe, ngokubona inkangeleko yakhe okanye ngendlela anxibe ngayo. Ukongezelela koko, intsapho kunye nabahlobo bakhe ngelizama ukumkhusela basenokungavumi ukubanika iinkcukacha abavakalisi xa bezicela. La macebiso alandelayo okukhangela abangevayo anokuba luncedo naxa kukhangelwa abantu abakwaziyo ukuthetha.
7. (a) Banokukhangelwa njani abantu abangevayo? (b) Sinokuzithoba njani izibilini zomninimzi?
7 Amabandla namaqela eNtetho Yezandla ayaphumelela kweli phulo lokukhangela abantu. Usenokudibana nomninimzi obone ummelwane, umntu asebenza naye okanye umntu afunda naye osebenzisa intetho yezandla. Usenokuba ubone uphawu lwendlela olubonisa abamelwane ukuba kukho abantwana abazizithulu. Mhlawumbi unesalamane esingevayo. Ukhumbule ukuba xa umtyelela usenokurhanelwa. Noko ke usenokuzithoba izibilini zomninimzi ngokuba nobuhlobo obunyanisekileyo uze ubethe koomofu uchaza isizathu sotyelelo lwakho. Abanye baye bafumana imiphumo emihle ngokuphatha iBhayibhile okanye iiDVD xa bekhangela abantu abangevayo. Baye bathi banqwenela ukuthetha nabantu abangevayo ngethemba eliseBhayibhileni. Ukuba umninimzi umadolw’ anzima ukukunceda, usenokuvuma ukwamkela ikhadi elineadresi yakho, isimemo ukuze asinike isalamane okanye umhlobo ongevayo.
8. Ibandla elikufutshane linokulinceda njani ibandla lentetho yezandla?
8 Kanye okanye kabini ngonyaka, ibandla lentetho yezandla linokumema ibandla elikufutshane elithetha ulwimi olwahlukileyo ukuba libancedise ekukhangeleni abantu abangevayo kwintsimi yabo. Intlanganiso yenkonzo eqhutywa libandla lentetho yezandla inokuquka imiyalelo yendlela yokwenza lo msebenzi kunye nomboniso. Iqela elihamba ngemoto enye linokuba nomvakalisi webandla lentetho yezandla lize linikwe nemaphu ebonisa indawo abaza kukhangela kuyo.
9. Banokukhangelwa njani abantu abangevayo kwiindawo ababutha kuzo okanye kwiindawo ezinikela iinkonzo zikawonke-wonke?
9 Kunokukhangelwa kwanakwiindawo ababutha kuzo abantu abangevayo okanye kwiindawo ezinikela iinkonzo zikawonke-wonke. Abavakalisi bafanele banxibe ngendlela efanelekileyo. Kungakuhle uncokole nomntu omnye okanye ababini kunokuba uthethe nalo lonke iqela. Ukuba niyevana ngencoko, ninokunikana iinkcukacha.
10. Abavakalisi banokubakhangela njani abantu abangevayo kwiindawo zamashishini?
10 Enye indlela kukusebenzisa iimaphu ezibonisa amashishini uze uwatyelele ngexesha elifanelekileyo. Enye imaphu inokuquka iindawo zokutha ipetroli. Enye inokuba neendawo zokuhlamba impahla, iindawo zokutyela, iihotele okanye amanye amashishini. Ukuba imaphu nganye ineentlobo ezifanayo zamashishini, abavakalisi banokusebenzisa intshayelelo efanayo ukuze bazuze amava nobuchule. Ngokomzekelo, ekubeni iihotele ziye zamkele nabantu abangevayo, sisenokuchaza ngomsebenzi wethu kumntu owamkela iindwendwe. Sinokumshiyela iqela lezinto ebesizilungiselele eziquka iDVD kunye nesimemo esichaza ngeentlanganiso zethu ukuze anike abangevayo abatyelela le hotele. Kwamanye amashishini sinokubuza ukuba abanabo na abasebenzi okanye abathengi abasebenzisa intetho yezandla. Ukuba kukho isikolo sabantu abangevayo kwintsimi yenu, sinokubanika ezinye zeeDVD zethu baze bazibeke elayibrari.
11. Kutheni iphulo lokukhangela abantu liyinxalenye ebalulekileyo yomsebenzi wethu?
11 Umsebenzi Obalulekileyo: Kunokuba yindinisa ukukhangela abantu abathetha ulwimi lwakho. Ukongezelela, abanye abantu abazinzanga basoloko befuduka, nto leyo eyenza kube nzima ukuba neengxelo zentsimi ezisexesheni. Nakuba kunjalo, kwiindawo ezininzi ukukhangela abantu kuyinxalenye ebalulekileyo yomsebenzi wethu. UYehova osinike umsebenzi wokushumayela akanamkhethe. (IZenzo 10:34) ‘Uthanda ukuba zonke iintlobo zabantu zisindiswe zize zifikelele elwazini oluchanileyo lwenyaniso.’ (1 Tim. 2:3, 4) Ngenxa yoko, ngamana singasebenzisana noYehova kunye nabazalwana ukuze sifumane abantu bazo zonke iilwimi ‘abanentliziyo entle nelungileyo.’—Luka 8:15.
[Ibhokisi ekwiphepha 3]
Ncedanani
Ukuba ibandla okanye iqela lifuna abantu elinokushumayela kubo abathetha ulwimi lwabo, umveleli wenkonzo unokuqhagamshelana nabadala bamabandla akufutshane athetha olunye ulwimi. Kunokuba bhetele ukuqhagamshelana nebandla elingekho kude kakhulu okanye elinabantu abaliqela abathetha olo lwimi. Amabandla ekuqhagamshelenwe nawo anokuchazela abavakalisi ukuba xa befumana umntu othetha olo lwimi, bafanele babhale iadresi baze bayinike umveleli wenkonzo aze yena ayidlulisele kwibandla okanye iqela elicela uncedo. Abaveleli benkonzo bamabandla abanenxaxheba banokuqulunqa indlela yokushumayela intsimi eneelwimi ezininzi baze abantu abanomdla babathumele kwibandla okanye iqela elifanelekileyo.
Ukuba abavakalisi bafumana umntu onomdla abe ethetha olunye ulwimi (okanye umntu ongevayo), bafanele bakhawuleze babhale iinkcukacha zakhe kwifomu ethi Nceda Ubuyele (S-43) baze bayinike unobhala webandla. Loo nto iya kwenza akhawuleze ancedwe loo mntu.—Funda km 5/11 iphe. 3.
[Ibhokisi ekwiphepha 4]
Indlela Yokufumana Abantu Abathetha Ulwimi Lwakho
• Buza kwabanye—izifundo zeBhayibhile, kwizalamane, kwabo usebenza nabo njalo njalo.
• Sebenzisa incwadi yefowuni ukuze ufumane amagama axhaphakileyo ngolo lwimi. Uludwe lweenombolo zefowuni oludwelisa amagama abantu ngokweeadresi zabo lunokufumaneka kwi-Intanethi okanye kwiinkampani zefowuni.
• Usenokuphanda kwiindawo ezinikela inkonzo kawonke-wonke njengelayibrari, iiofisi zakwarhulumente kunye nakumaziko emfundo.
• Ungahlola izaziso kumaphephandaba achaza izinto ezenziwa ngabantu abathetha ulwimi lwasemzini.
• Yiya kwiivenkile nakumashishini asetyenziswa ngabantu abathetha ulwimi lwasemzini.
• Unokucela imvume kwabo basemagunyeni ukuba ubeke itafile enoncwadi kwishishini, kwiyunivesithi okanye kwindawo ekukhwelelwa kuyo izithuthi zikawonke-wonke ngabantu abathetha olo lwimi.
• Ukuba umthetho welizwe lakho uyakuvumela unokuthenga inkqubo yekhompyutha ekwaziyo ukuphanda ngeendawo zikawonke-wonke zeIntanethi.
[Ibhokisi ekwiphepha 5]
Oko Ufanele Ukuthethe Xa Ukweli Phulo
Ukuba nobuhlobo, ukunyaniseka nokungqala, kuyawachitha amathandabuzo. Kusoloko kukuhle ukumbonisa uncwadi ngolwimi lwakhe kuqala.
Emva kokuba umbulisile unokuthi: “Sikhangela abantu abathetha ․․․․․ ukuze sithethe nabo ngethemba eliseBhayibhileni. Ngaba ukhona umntu omaziyo esinokuthetha naye?”
Xa ukhangela abantu abangevayo unokuthi: “Molweni. Kukho into endicela ukunibonisa yona? [Usebenzisa umatshini odlala ividiyo ophathwayo okanye ismartphone, mdlalele ivesi yeBhayibhile ekwenye yeempapasho zentetho yezandla.] Sineevidiyo eziliqela esizidlala simahla ezenzelwe ukunceda abantu abangevayo bazi uThixo. Ngaba ukhona umntu ongevayo omaziyo osebenzisa intetho yezandla?” Ukuba umninimzi akakwazi ukukhumbula umntu onjalo, kungakuhle ukumkhumbuza ngeendawo ekunokwenzeka ukuba ukhe wababona kuzo njengasemsebenzini, esikolweni okanye apha ekuhlaleni.