IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w98 9/1 iphe. 19-21
  • Qiniseka Ukuba Ubeka Izinto Zokuqala Kwindawo Yokuqala!

No video available for this selection.

Sorry, there was an error loading the video.

  • Qiniseka Ukuba Ubeka Izinto Zokuqala Kwindawo Yokuqala!
  • IMboniselo Evakalisa UBukumkani BukaYehova
  • Imixholwana
  • Amanqaku Afanayo
  • Yiyiphi Efanele Ize Kuqala?
  • Qhubekani Nifuna Kuqala UBukumkani
  • Indlela Abanye Abazibeka Ngayo Izinto Zokuqala Kwindawo Yokuqala Namhlanje
  • Ceba Kusengaphambili!
  • Ndingalifumana Njani Ixesha Lokwenza Umsebenzi Wam Wesikolo Owenzelwa Ekhaya?
    Vukani!—2004
  • Ndingawugqiba Njani Umsebenzi Wam Wesikolo?
    Ulutsha Luyabuza
  • Ukubakho Kwiintlanganiso—Imbopheleleko Enzulu
    Ubulungiseleli Bethu BoBukumkani—1994
  • Ukuya Rhoqo Ezintlanganweni—Kumele Kube Kwindawo Yokuqala
    Ubulungiseleli Bethu BoBukumkani—2004
Khangela Okunye
IMboniselo Evakalisa UBukumkani BukaYehova
w98 9/1 iphe. 19-21

Qiniseka Ukuba Ubeka Izinto Zokuqala Kwindawo Yokuqala!

Bubusuku bentlanganiso, kodwa unomsebenzi omele uwenze. Yiyiphi oya kuyibeka kwindawo yokuqala?

UNGUMYENI nobawo. Njengoko usuku olude nolunzima lomsebenzi luphela, uqalisa ukucinga ngocwangciso lwangokuhlwa lweentlanganiso zebandla. Ukuba umka kwangoko emsebenzini, uya kuba nethutyana nje elaneleyo lokuhlamba, unxibe uze ugxabhagxabhise ukutya ngaphambi kokuba uye ezintlanganisweni. Ngequbuliso, kuza umqeshi wakho akucele ukuba usebenze ixesha elongezelelekileyo. Ukuthembisa ngomvuzo oncumisayo. Uyayifuna imali.

Okanye ungumfazi nomama. Njengoko ulungiselela isidlo sangokuhlwa, uphawula imfumba yempahla engolulwanga, yimbi kuyo ifuneka ngomso. Uyazibuza, ‘Ukuba ndiya ezintlanganisweni ngokuhlwa nje, ndiza kulifumana nini ixesha lokuyolula?’ Ukusebenza kwakho ixesha elizeleyo kutshanje, kukwenza ubone indlela ekunzima ngayo ukunyamekela imisebenzi yasekhaya ngoxa uzama ukuziphilisa.

Okanye ungumfundi. Egumbini lakho, idesika iyintaba yimfumba yomsebenzi wesikolo owenzelwa ekhaya. Inkoliso yawo wawuyinikwe kudala, kodwa wayibekela amangomso, yaye ngoku ufunwa wonke ngokungxamisekileyo. Ucinga ngokucela abazali bakho bakuvumele uhlale ekhaya ungayi ezintlanganisweni ukuze ukwazi ukugqiba lo msebenzi wakho wesikolo.

Yiyiphi wena oya kuyibeka kwindawo yokuqala: ngumsebenzi wokuziphilisa owongezelelekileyo, kukolula impahla, ngumsebenzi wesikolo owenzelwa ekhaya okanye yintlanganiso yebandla? Kwizinto zokomoya, kuthetha ukuthini ukubeka izinto zokuqala kwindawo yokuqala? Ithini imbono kaYehova?

Yiyiphi Efanele Ize Kuqala?

Kungekudala nje emva kokuba amaSirayeli efumene iMithetho Elishumi, kwafunyanwa indoda ethile itheza ngeSabatha. UMthetho wawukwalela ngokungqongqo oku. (Numeri 15:32-34; Duteronomi 5:12-15) Wawuya kuligweba njani elo tyala? Ngaba wawuya kuyixolela loo ndoda, usithi ngapha koko, yayingasebenzeli ukuphila ubomi obutofotofo yayisenzela nje izinto eziyimfuneko entsatsheni yayo? Ngaba wawuya kuma ngelithi zininzi izihlandlo zokugcina iSabatha ngonyaka yaye sinye isihlandlo esiphosileyo, mhlawumbi ngenxa yokungacebi kusengaphambili, ngoko inokusuka nje ixolelwe?

UYehova walijonga njengelinzulu elo tyala. IBhayibhile isichazela oku: “Wathi uYehova kuMoses, Makabulawe afe loo mntu.” (Numeri 15:35) Kwakutheni ukuze uYehova abe ngqongqo kangako ngoko kwenziwa yiloo ndoda?

Abantu babeneentsuku ezintandathu zokutheza kuquka ukulungiselela iimfuno zabo eziphathelele ukutya, impahla nekhusi. Usuku lwesixhenxe lwalufanele lube lolweentswelo zabo zokomoya. Ngoxa kwakungaphosakalanga ukutheza, kwakuphosakele ukusebenzisa ixesha elalifanele ukubekelwa bucala ukuze kunqulwe uYehova. Nangona amaKristu engekho phantsi koMthetho kaMoses, ngaba esi siganeko asisifundisi isifundo ngokucwangcisela kakuhle izinto eziza kuqala namhlanje?—Filipi 1:10.

Emva kokuchitha iminyaka engama-40 entlango, amaSirayeli ayesele ekulungele ukungena kwiLizwe Ledinga. Wambi ayekruqukile kukutya imana eyayivela kuThixo entlango yaye ngokungathandabuzekiyo ayelangazelela ukutya into eyahlukileyo. Ukuze awancede ahlale enembono efanelekileyo njengoko ayengena kwilizwe “elibaleka amasi nobusi,” uYehova wawakhumbuza ukuba: “Akaphili ngasonka sodwa umntu; umntu lo yena uphila ngento yonke ephuma emlonyeni kaYehova.”—Eksodus 3:8; Duteronomi 8:3.

AmaSirayeli ayefanele azibhokoxe ukuze afumane “amasi nobusi.” Kwakukho imikhosi ayefanele ayoyise, akhe izindlu, atyale amasimi. Sekunjalo, uYehova wayalela abantu ukuba suku ngalunye babekele bucala ixesha lokucamngca ngezinto zokomoya. Babemele bafundise abantwana babo iindlela zikaThixo. UYehova wathi: ‘Niyifundise [imithetho yam] oonyana benu, nithethe ngayo ekuhlaleni kwenu ezindlwini zenu, nasekuhambeni kwenu ngendlela, nasekulaleni kwenu, nasekuvukeni kwenu.’—Duteronomi 11:19.

Izihlandlo ezithathu ngonyaka yonke into eyindoda engumSirayeli neliguquka eselizweni yayalelwa ukuba ibonakale phambi koYehova. Ziqonda ukuba intsapho iphela inokungenelwa ngokomoya kwiimfundiso ezinjalo, iintloko-ntsapho ezininzi zazihamba nabafazi nabantwana bazo. Kodwa ngubani owayeza kukhusela imizi namasimi azo ekuhlaselweni lutshaba ngoxa intsapho ingekho? UYehova wathembisa wathi: “Linganqwenelwa nangubani ilizwe lakho, ekunyukeni kwakho usiya kubonakala ebusweni bukaYehova uThixo wakho, izihlandlo ezithathu ngomnyaka.” (Eksodus 34:24) AmaSirayeli kwakufuneka abe nokholo ukuze ayithembe into yokuba xa ebeka izilangazelelo zokomoya kwindawo yokuqala, akanakuphulukana nezinto eziphathekayo. Ngaba uYehova wangqineka enyanisekile kumazwi akhe? Ngokuqinisekileyo kwaba njalo!

Qhubekani Nifuna Kuqala UBukumkani

UYesu wafundisa abalandeli bakhe ukuba babeke izinto zokomoya ngaphambi kwayo yonke enye into. KwiNtshumayelo yaseNtabeni, wacebisa abaphulaphuli bakhe wathi: “Ningaze nixhale nize nithi, ‘Siza kudla ntoni na?’ okanye, ‘Siza kusela ntoni na?’ okanye, ‘Siza kunxiba ntoni na?’ Qhubekani . . . nifuna kuqala ubukumkani nobulungisa bakhe, yaye zonke ezinye izinto ziya kongezelelwa kuni.” (Mateyu 6:31, 33) Kungekudala nje emva kokufa kukaYesu, amaKristu awayesandul’ ukubhaptizwa asisebenzisa eso siluleko. Amaninzi ayengamaYuda okanye eguqukele ebuYudeni awayeye eYerusalem ukuze abhiyozele umthendeleko wePentekoste ngowama-33 C.E. Ngoxa ayelapho, kwenzeka into eyayingalindelekanga. Eva aza amkela iindaba ezilungileyo ezingoYesu Kristu. Enomnqweno wokufunda okungakumbi ngolu kholo lutsha, ahlala eYerusalem. Aphelelwa yimiphako, kodwa akazange abalaselise ubutofotofo bezinto eziphathekayo. Ayemfumene uMesiya! Abazalwana bawo abangamaKristu babesabelana nawo ngezinto eziphathekayo ababenazo ukuze bonke baqhubeke “bezinikela emfundisweni yabapostile . . . nasemithandazweni.”—IZenzo 2:42.

Ekuhambeni kwexesha, wambi amaKristu ayilibala imfuneko yobudlelane obuthe rhoqo ezintlanganisweni. (Hebhere 10:23-25) Mhlawumbi awela ekuthandeni izinto eziphathekayo, etyeshela izinto zokomoya ngoxa ezama ukuqinisekisa ukunqabiseka kwemali yawo neentsapho zawo. Emva kokubongoza abazalwana bakhe ukuba bangazityesheli iintlanganiso, umpostile uPawulos wabhala: “Uhlobo lwenu lobomi malube lolukhululekileyo kuthando lwemali, ngoxa nanelisekile zizinto ezikhoyo. Kuba uthe: ‘Andiyi kuze nangayiphi na indlela ndikushiye, ndingayi kuze nangayiphi na indlela ndikutyeshele.’”—Hebhere 13:5.

Isiluleko sikaPawulos sasifike ngexesha. Malunga neminyaka emihlanu emva kokuba uPawulos ebhale ileta yakhe eya kumaHebhere, umkhosi wamaRoma kaCestius Gallus wayingqinga iYerusalem. AmaKristu athembekileyo asikhumbula isilumkiso sikaYesu esithi: “Xa nibona [oku] . . . , umntu ophezu kwendlu makangehli, okanye angene ngaphakathi ukuze athabathe nantoni na endlwini yakhe; ibe umntu osentsimini makangabuyeli kwizinto ezisemva ukuze athabathe isambatho sakhe sangaphandle.” (Marko 13:14-16) Ayesazi ukuba ukusinda kwawo kwakungaxhomekekanga, ekunqabisekeni kwengqesho yawo okanye ixabiso lezinto eziphathekayo awayenazo, kodwa ekuthobeleni kwawo umyalelo kaYesu. Lawo asithobelayo isiluleko sikaPawulos aze abeka izilangazelelo zokomoya kwindawo yokuqala, ngokungathandabuzekiyo kwaba lula ukuba ashiye amakhaya, imisebenzi, impahla nobutyebi bawo aze asabele ezintabeni kunokuba enzayo nawaphi na awayengakhululekanga kuthando lwemali.

Indlela Abanye Abazibeka Ngayo Izinto Zokuqala Kwindawo Yokuqala Namhlanje

AmaKristu athembekileyo namhlanje ayakuxabisa ukunxulumana rhoqo nabazalwana bawo, yaye amaninzi ancama okuthile ukuze abekho kwiintlanganiso. Kwiindawo ezithile, ekuphela komsebenzi ofumanekayo ngowamaxesha ahlukahlukeneyo. Omnye umzalwana usebenzela abo asebenza nabo ebusuku ngeMigqibelo, xesha elo inkoliso yabantu kwindawo yakhe elisebenzisela ukuzihlaziya, ukuba nje baza kusebenza endaweni yakhe ngobusuku beentlanganiso. Abanye abazalwana abasebenza ngamaxesha ahlukahlukeneyo baya kwiintlanganiso zamabandla akufutshane ukuba umsebenzi wabo awubavumeli baye kwawabo. Phantse babe abaphoswa ziintlanganiso ngale ndlela. Umntu othile owayesandul’ ukuba nomdla eKhanada wakuqonda ukuxabiseka kweSikolo Sobulungiseleli Sobuthixo neNtlanganiso Yenkonzo, kodwa umsebenzi wakhe wawungamvumeli ukuba abekho. Ngenxa yoko, wahlawula omnye asebenza naye ukuba avale isikhewu sakhe khon’ ukuze akwazi ukubakho kwezi ntlanganiso zibalulekileyo.

Abaninzi abanezifo ezinganyangekiyo abafane baphoswe ziintlanganiso. Baphulaphula ucwangciso besekhaya ngonxibelelwano lomnxeba okanye ikhasethi erekhodiweyo xa bengakwazi ukubakho kwiHolo yoBukumkani. Babonakalisa uxabiso oluhle ngamalungiselelo kaYehova okomoya awanikela ‘ngekhoboka lakhe elithembekileyo neliyingqondi’! (Mateyu 24:45) AmaKristu anyamekela abazali bawo abalupheleyo akuxabisa ngokwenene ukuba umzalwana okanye udade uthembisa ukusala nabazali bawo ukuze abo banyamekela abanye bakwazi ukuya kwiintlanganiso zebandla.

Ceba Kusengaphambili!

Abazali abazixhalabelayo iintswelo zabo zokomoya, banceda abantwana babo bazixabise iintlanganiso zamaKristu. Bafanele baqinisekise ukuba abantwana babo bawenza kwangoko umsebenzi wabo wesikolo owenzelwa ekhaya xa bewunikiwe, kunokuwulinda de ube yintaba. Ngobusuku beentlanganiso abantwana abaphozisi maseko ukwenza umsebenzi wabo wesikolo owenzelwa ekhaya xa bevela esikolweni. Izinto zokuzonwabisa nezinye izinto azivunyelwa ukuba ziphazamisane neentlanganiso zebandla.

Njengomyeni nobawo, ngaba ukubeka kwindawo yokuqala ukubakho kwiintlanganiso zebandla? Njengomfazi nomama, ngaba uceba kusengaphambili ukuze ukwazi ukuba nexesha lokuya ezintlanganisweni? Njengokwishumi elivisayo, ngaba umsebenzi wakho wesikolo owenzelwa ekhaya uza kuqala kuneentlanganiso okanye iintlanganiso ziza kuqala kunomsebenzi wesikolo owenzelwa ekhaya?

Intlanganiso yebandla lilungiselelo lothando likaYehova. Sifanele senze wonke umgudu ukuze sibe nenxaxheba kwelo lungiselelo. UYehova uya kunisikelela ngendlela engathethekiyo ukuba nibeka izinto zokuqala kwindawo yokuqala!

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share