Abazalwana Abamanyeneyo

KANGANGEMINYAKA ephantse ibe yi-1 500, uYehova uThixo waqhubana nohlanga lwamaSirayeli njengabantu ababizwa ngegama lakhe. Emva koko “waqalisa ukubakhetha ezintlangeni abantu abaza kubizwa ngegama lakhe.” (IZe. 15:14) Abantu ababizwa ngegama likaYehova babeza kuba ngamangqina akhe, bacinge yaye benze into enye kungakhathaliseki ukuba baphi na emhlabeni. Oku kuhlanganiswa kwabantu ababizwa ngegama likaThixo kwakuza kuphumela ekubeni kwenziwe into uYesu awayithuma abalandeli bakhe, esithi: “Ngoko ke, hambani niyokubenza abafundi abantu beentlanga zonke, nibabhaptize egameni likaTata neloNyana nelomoya oyingcwele, nibafundise ukuba benze yonke into endiniyalele yona.”—Mat. 28:19, 20.

² Xa ubuzinikela kuYehova yaye ubhaptizwa, uye waba ngumfundi kaYesu Kristu. Ngoku ungomnye wabazalwana abangamaKristu abamanyeneyo kweli hlabathi, abangavumiyo ukwahlukaniswa bubuhlanga, ubuzwe okanye imigangatho eyahlukeneyo yezoqoqosho. (INdu. 133:1) Ngenxa yoko, uyabathanda kwaye uyabahlonipha abazalwana okunye nabo ebandleni. Abanye babo basenokuba ngabelinye ibala okanye uhlanga, okanye banemfundo nomgangatho woqoqosho owahlukileyo. Simanyene ibe siyathandana singabazalwana, ngendlela eyodlulayo indlela abathandana ngayo abantu basekuhlaleni, abakhonza kunye okanye abazalanayo.​—Marko 10:29, 30; Kol. 3:14; 1 Pet. 1:22.

UKUTSHINTSHA INDLELA OBUCINGA NGAYO

³ Ukuba kukho abathile abakufumanisa kunzima ukwahlukana nokucalula abantu ngebala, ikhethe lepolitiki, lentlalo okanye elinye ikhethe elendeleyo, mabacinge ngamaKristu angamaYuda exesha labapostile, ekwafuneka ukuba ahlukane nokucalula abantu bezinye iintlanga. Xa uPetros wayalelwa ukuba aye kwindlu yegosa elingumRoma, uKorneli, ngobubele uYehova wamnceda ukuze awulungele loo msebenzi.​—IZe. isahlu. 10.

⁴ Embonweni, uPetros wayalelwa ukuba axhele aze atye izilwanyana ezithile ezazingcolile kumaYuda. Xa uPetros walayo, ilizwi elivela ezulwini lathi kuye: “Sukuthi zingcolile izinto uThixo azicocileyo.” (IZe. 10:15) Kukungenelela kukaThixo okwanceda uPetros ukuba alungise indlela acinga ngayo yaye awulungele umsebenzi awayeza kuwunikwa, ukuya kutyelela indoda yeentlanga. Kodwa xa wayethobela ulwalathiso lukaYehova, uPetros wachazela abo babehlanganisene oku: “Niyazi kakuhle ukuba akukho semthethweni ngomYuda ukuba ahlale okanye andwendwele umntu wolunye uhlanga, kodwa uThixo undibonisile ukuba akukho mntu ndimele ndithi akacocekanga. Ngoko khange ndale xa bendibizwa.” (IZe. 10:28, 29) Emva koko, uPetros wabubona ubungqina bokuba uYehova wayekholiswa nguKorneli nendlu yakhe.

⁵ USawule waseTarso, umFarisi owayefunde wada wayityekeza, kwafuneka athobeke aze abe nobuhlobo nabantu ngaphambili ekwakungamkelekanga ekuhlaleni ukuba abenze abahlobo bakhe. Kwada kwafuneka ukuba afumane ulwalathiso kubo. (IZe. 4:13; Gal. 1:13-20; Fil. 3:4-11) Sinokuluthelekelela utshintsho olumele ukuba lwenzeka kwindlela ababecinga ngayo abantu abafana noSergiyo Pawulos, uDiyonisiyo, uDamari, uFilemon, uOnesimo nabanye xa babesamkela iindaba ezilungileyo yaye besiba ngabafundi bakaYesu Kristu.​—IZe. 13:6-12; 17:22, 33, 34; Flm. 8-20.

UKUHLALA SIMANYENE EHLABATHINI LONKE

⁶ Alithandabuzeki elokuba uthando lwabazalwana noodade abakwibandla okulo lukuncedile ukuba usondele kuYehova nakwintlangano yakhe. Ulubonile uthando nomanyano lokwenene abaziwa ngalo abafundi bakaYesu Kristu, owathi: “Ndininika umyalelo omtsha, wokuba nithandane. Nimele nithandane ngale ndlela nam ndinithande ngayo. Bonke baza kutsho bazi ukuba ningabafundi bam, ukuba niyathandana.” (Yoh. 13:34, 35) Uye wamthanda kakhulu uYehova nentlangano yakhe xa ubona ukuba ukuthandwa kwibandla okulo kubonisa indlela abathandana ngayo abantu bakaYehova ehlabathini lonke. Uzibonela ngawakho inzaliseko yesiprofeto seBhayibhile sokuqokelelwa kwabantu kwimihla yokugqibela ukuze bakhonze uYehova ngoxolo nangomanyano.​—Mik. 4:1-5.

⁷ Ngenxa yezinto ezininzi ezibangela abantu bangavani namhlanje, ngubani obenokuyiphupha kwaukuyiphupha into yokumanyanisa abantu ‘abaphuma kuzo zonke iintlanga nezizwe nezizwana neelwimi’? (ISityhi. 7:9) Khawucinge nje ngomahluko okhoyo phakathi kwabantu abathanda iteknoloji nabantu abasathanda ukwenza izinto ngendlela yakudala. Khawujonge nje ukungavani kwabantu bebala elinye nabohlanga olunye kuba nje behamba iicawa ezahlukeneyo. Ngenxa yomoya wokuthanda ilizwe oya usiba namandla, ukungaboni ngasonye kwiipolitiki kuya kukhula. Uthi wakucinga ngomahluko omkhulu kwezoqoqosho nezinye izinto ezininzi ezibangela ukuba abantu bangavani, uqonde ukuba ukumanyanisa abantu bazo zonke iintlanga, iilwimi, amaqela nemigangatho yobomi, ngothando olungapheliyo noxolo, ngummangaliso onokwenziwa nguThixo uSomandla kuphela.—Zek. 4:6.

⁸ Olu manyano sithetha ngalo apha lolokwenene, kwaye xa usiba liNgqina LikaYehova elizinikeleyo laza labhaptizwa, uba yinxalenye yalo. Indlela olukunceda ngayo olo manyano ibangela ukuba uzimisele ukulugcina. Sinokulugcina ngokuthobela amazwi kampostile uPawulos afumaneka kumaGalati 6:10, athi: “Lisekhona nje ithuba, masibenzele izinto ezintle bonke abantu, ngokukodwa abo sikhonza nabo.” Sithobela nesi siluleko sithi: “Ningenzi nantoni na nikhuphisana okanye niqhayisa, kodwa nithobeke, nibajonga abanye njengababhetele kunani, ningacingeli kuphela iziqu zenu, kodwa nibacingele nabanye.” (Fil. 2:3, 4) Ukuba nje sinokuziqeqesha ukuze sijonge abazalwana noodade wethu ngendlela uYehova abajonga ngayo, kungekhona ngendlela ababonakala ngayo emehlweni ethu, siza kuqhubeka siphila nabo ngoxolo nangolonwabo.​—Efe. 4:23, 24.

UKUKHATHALELANA

⁹ Njengoko umpostile uPawulos wazekelisayo, abantu abasebandleni abacalulani kodwa bakhathalelene. (1 Kor. 12:14-26) Sisenokuba sihlala kude nabanye abazalwana abasehlabathini, kodwa ke sibakhathalele. Ukuba abanye abazalwana bethu bayatshutshiswa, sonke siyakhathazeka. Ukuba abanye bayasokola okanye bathwaxwa ziintlekele okanye iimfazwe okanye iingxwabangxwaba zasekuhlaleni, siye sikhangele iindlela zokubaqinisa ukholo, nokubanceda ngezinto eziphathekayo.​—2 Kor. 1:8-11.

¹⁰ Sonke sifanele sibathandazele yonke imihla abazalwana bethu. Kukho abazalwana abahendelwa ukwenza izinto ezimbi. Iingxaki zabanye abazalwana bethu zisenokuba zaziwa ngumntu wonke. Ukanti abanye bachaswa ngabantu abasebenza nabo nangamalungu eentsapho zabo, ibe abanye basenokungayazi loo nto. (Mat. 10:35, 36; 1 Tes. 2:14) Zonke ezo zinto ziyasixhalabisa kuba simanyene sonke ehlabathini. (1 Pet. 5:9) Phakathi kwethu kukho abo basebenza nzima enkonzweni kaYehova, abakhokelayo kumsebenzi wokushumayela nasemabandleni. Kuphinde kubekho abo banembopheleleko yokuvelela umsebenzi owenziwa ehlabathini. Bebonke kufuneka sibathandazele, nto leyo ebonisa ukuba sinomdla wokwenene kubazalwana bethu kwaye siyabathanda, kwanaxa singenakwenza nto ukuze sibancede.​—Efe. 1:16; 1 Tes. 1:2, 3; 5:25.

¹¹ Ekubeni kule mihla yokugqibela ihlabathi lizaliswe ziziphithiphithi, abantu bakaYehova bamele bakulungele ukuncedana. Ngamanye amaxesha, iintlekele ezifana neenyikima nezikhukula, zifuna ukuba kwenziwe amaphulo okunceda kuze kuqokelelwe izinto eziphathekayo ezininzi ukuze kuncedwe ngazo. AmaKristu exesha labapostile amisela umzekelo omhle kule nkalo. Bekhumbula isiluleko sikaYesu, abafundi bakwa-Antiyokhwe bakuvuyela ukuthumela izipho zezinto eziphathekayo kubazalwana belakwaYuda ababebhuqwa yindlala. (IZe. 11:27-30; 20:35) Ekuhambeni kwexesha umpostile uPawulos wakhuthaza abazalwana baseKorinte ukuba nabo bancede ukuze yonke into ihambe ngocwangco. (2 Kor. 9:1-15) Kule mihla, xa abazalwana bethwaxwa ziingxaki ezininzi yaye befuna ukuncedwa ngezinto eziphathekayo, intlangano namanye amaKristu ikhawuleza ithumele loo nto ifunekayo.

SAHLULELWE UKWENZA UKUTHANDA KUKAYEHOVA

¹² Ubuzalwana bethu obumanyeneyo obusehlabathini bulungelelene ukuze kwenziwe ukuthanda kukaYehova. Sithethanje, uYehova ufuna ukuba kushunyayelwe iindaba ezilungileyo ezingoBukumkani emhlabeni wonke, ziviwe zizo zonke iintlanga. (Mat. 24:14) UYehova ufuna ukuba, xa siqhubeka sisenza lo msebenzi, siziphathe ngendlela evisisana nemilinganiselo yakhe ephakamileyo yokuziphatha. (1 Pet. 1:14-16) Sifanele sikulungele ukuthobelana size sihambisele phambili iindaba ezilungileyo. (Efe. 5:21) Eli asiloxesha lokwenza izinto ezifunwa sithi, kodwa lelokubeka uBukumkani BukaThixo kwindawo yokuqala ebomini bethu ngendlela ekungazange kwenzeke ngayo ngaphambili. (Mat. 6:33) Ukuhlala siyikhumbula le nto nokusebenzisana nabanye ngenxa yeendaba ezilungileyo kuyasivuyisa yaye kusenza saneliseke size sifumane iintsikelelo ngonaphakade.

¹³ Thina maNgqina KaYehova sahluke ngokwenene, asifani nabanye abantu kuba sicocekile, kwaye sikukhuthalele ukukhonza uThixo wethu. (Tito 2:14) Ukukhonza uYehova kusenza sahluke. Asaneli kusebenzisana nje nabazalwana bethu emhlabeni wonke, kodwa sithetha ulwimi olunye lwenyaniso kwaye sonke siphila ngokuvisisana nayo. Le nto uYehova wayichaza kwakudala, esebenzisa umprofeti wakhe uZefaniya, wathi: “Ndiza kulutshintsha ulwimi lwezizwana ndilwenze lusulungeke, ukuze zonke zibize egameni likaYehova, zimkhonze zimanyene.”​—Zef. 3:9.

¹⁴ Emva koko uYehova waphefumlela uZefaniya ukuba athethe ngabazalwana abamanyeneyo abasehlabathini namhlanje, athi: “Abo bashiyekileyo bakwaSirayeli, abazukwenza nto ingalunganga; Abazukuthetha buxoki, kungazukufunyanwa lulwimi luqhathayo emilonyeni yabo. Baza kutya balale, ibe akukho mntu uza kuboyikisa.” (Zef. 3:13) Ekubeni siye saliqonda iLizwi LikaYehova lenyaniso, saza sazitshintsha iingqondo zethu, savisisanisa indlela esiphila ngayo nemilinganiselo kaYehova, siyakwazi ukusebenza ngomanyano. Senza izinto ezibonakala zingenakwenzeka kwabo bajonga izinto ngeliso lenyama. Ngenene, singabantu bakaThixo abahluke ngokupheleleyo kwaye siyamzukisa kuwo wonke umhlaba.—Mika 2:12.