IBhayibhile Inokukunceda Ufumane Ulonwabo
NANGONA ingeyoncwadi yezonyango, iBhayibhile iyathetha ngendlela enokuchatshazelwa ngayo impilo kabani yindlela avakalelwa ngayo. IBhayibhile ithi: “Intliziyo evuyayo iyaphilisa, kodwa umoya oxhwalekileyo womisa amathambo. Kwakhona sifunda oku: “Ngaba uzibonakalise udimazekile ngomhla wokubandezeleka? Uya kuphelelwa ngamandla.” (IMizekeliso 17:22; 24:10) Ukudimazeka kunokusenza siphelelwe ngamandla, sibe buthathaka size singene engozini esingenamdla wakuzikhupha okanye wakuncedwa kuyo.
Ukudimazeka kunokuchaphazela nemeko yomntu yokomoya. Abantu abavakalelwa kukuba abanto yanto badla ngokucinga ukuba abanakuze babe nolwalamano oluhle noThixo kwaye engenakuze akholiswe ngabo. USimone, okhankanywe kwinqaku elandulelayo, wayethandabuza ukuba ‘uThixo unokukholiswa nguye.’ Noko ke, xa sifunda iLizwi likaThixo, iBhayibhile, sifumanisa ukuba uThixo uyakholiswa ngabo bazabalazela ukumkholisa.
UThixo Uyakhathala
IBhayibhile isixelela ukuba “uYehova usondele kwabo baphuke intliziyo; yaye abo bamoya utyumkileyo uyabasindisa.” UThixo akayideli “intliziyo eyaphukileyo netyumkileyo,” kodwa uthembisa “ukuvuselela umoya wabo bathobekileyo nokuvuselela intliziyo yabo batyumkileyo.”—INdumiso 34:18; 51:17; Isaya 57:15.
Ngesinye isihlandlo uNyana kaThixo, uYesu, wayibona ibalulekile into yokuba acacisele abafundi bakhe ukuba uThixo ubona okulungileyo kubakhonzi bakhe. Esenza umzekeliso wathi uThixo uyabona xa ungqatyana ewela emhlabeni—into abantu abaninzi abanokuyigqala njengengabalulekanga. Wabalaselisa nento yokuba uThixo wazi ezona nkcukacha zincinane ngabantu, kwanenani leenwele zentloko yabo. UYesu waqukumbela umzekeliso wakhe ngala mazwi: “Ngoko ke musani ukoyika: nixabiseke ngaphezu koongqatyana abaninzi.” (Mateyu 10:29-31)a UYesu wabonisa ukuba kungakhathaliseki ukuba abantu bavakalelwa njani ngeziqu zabo, abantu abanokholo baxabisekile emehlweni kaThixo. Eneneni, umpostile uPetros usikhumbuza ukuba “uThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.”—IZenzo 10:34, 35.
Yiba Nembono Elungeleleneyo
ILizwi likaThixo lisibongoza ukuba sibe nembono elungeleleneyo ngendlela esizijonga ngayo. Ephefumlelwe umpostile uPawulos wabhala: “Ngobubele obungasifanelanga endabunikwayo ndixelela wonk’ ubani apho phakathi kwenu ukuba angazicingeli ngaphezu koko amelwe kukuzicingela ngako; kodwa makacinge khon’ ukuze abe nengqondo ephilileyo, ngamnye njengoko uThixo amabele umlinganiselo wokholo.”—Roma 12:3.
Ngokuqinisekileyo, asimele sizicingele gqitha de sizikhukhumalise; okanye sizijongele phantsi de sicinge ukuba asinto yanto. Kunoko, simele sihlakulele ukuba nembono elungeleleneyo ngathi, size sikhumbule amandla esinawo nokusikelwa kwethu umda. Elinye ibhinqa elingumKristu likuchaza ngale ndlela oku: “Andingomntu mbi; kodwa sekunjalo andiyongelosi. Ndineempawu ezintle nezimbi njengomntu wonke.”
Kakade ke, akulula ukuba nembono elungelelene ngolo hlobo. Kunokufuneka umgudu omkhulu ukuze siyeke ukuba nembono engakhiyo ngathi esiye saba nayo kangangeminyaka. Sekunjalo, ngoncedo lukaThixo sinokubutshintsha ubuntu bethu nendlela esibujonga ngayo ubomi. Eneneni, yiloo nto kanye iLizwi likaThixo elisibongoza ukuba siyenze. Sifunda oku: “Nibulahle ubuntu obudala obuvisisana nehambo yenu yangaphambili nobonakaliswe yiminqweno yabo ekhohlisayo; kodwa mawahlaziyeke amandla engqondo yenu, nambathe ubuntu obutsha obadalwa ngokokuthanda kukaThixo ngobulungisa bokwenyaniso nokunyaniseka.”—Efese 4:22-24.
Ngokwenza umgudu wokuguqula ‘amandla engqondo yethu,’ oko kukuthi olona tyekelo lwengqondo yethu, sinokubuphucula ubuntu bethu siyeke ukuhlala sizigxeka size sibe nembono efanelekileyo ngathi. ULena, okhankanywe kwinqaku elandulelayo, waqonda ukuba de ahlukane nengcamango yokuba akukho mntu unokumthanda okanye amncede, ayikho into enokuguqula indlela avakalelwa ngayo ngesiqu sakhe. Sisiphi isiluleko seBhayibhile esanceda uLena, uSimone nabanye ukuba benze olo tshintsho?
Imigaqo YeBhayibhile Enceda Abantu Bonwabe
“Umthwalo wakho wulahlele kuYehova, yaye yena wokuxhasa.” (INdumiso 55:22) Okokuqala, umthandazo unokusinceda sifumane uvuyo lokwenene. USimone uthi: “Nanini na ndiziva ndidimazekile, ndiye ndicele uncedo kuYehova. Ngazo zonke ezo zihlandlo ndiye ndiyive indlela andomeleza nandikhokela ngayo.” Xa umdumisi esibongoza ukuba silahlele umthwalo wethu kuYehova, eneneni usikhumbuza ukuba uYehova akasikhathalelanga nje kuphela kodwa ukwasijonga njengabantu afanele abancede aze abaxhase. Ngobusuku bePasika yowama-33 C.E., abafundi bakaYesu babebuhlungu ngenxa yoko uYesu wakuthethayo esithi uza kubashiya kungekudala. UYesu wababongoza ukuba bathandaze kuYise, waza wongezelela esithi: “Celani, niya kwamkela, ukuze uvuyo lwenu luzaliswe.”—Yohane 16:23, 24.
“Kunoyolo ngakumbi ukupha kunokwamkela.” (IZenzo 20:35) Njengoko uYesu wafundisayo, ukupha yeyona nto yenza ubani onwabe ngokwenene. Ukusebenzisa le nyaniso yeBhayibhile kusenza sikwazi ukunikel’ ingqalelo kwiintswelo zabanye kunezethu. Xa sinceda abanye size sibone uxabiso abanalo, sitsho sizive sanelisekile. ULena uthi ukusoloko esabelana nabamelwane bakhe ngeendaba ezilungileyo eziseBhayibhileni kumnceda ngeendlela ezimbini. Uthi: “Okokuqala, kundinika ulonwabo nolwaneliseko uYesu awathetha ngalo. Okwesibini, abanye baye basabele kakuhle, nto leyo endenza ndonwabe.” Ukuba sizinikela ngesisa, siya kubona indlela ayinyaniso ngayo amazwi akwiMizekeliso 11:25 athi: “Oseza abanye ngesisa naye uya kusezwa ngesisa.”
“Yonke imihla yoxhwalekileyo mibi; kodwa onentliziyo echwayitileyo uba netheko rhoqo.” (IMizekeliso 15:15) Sonke sinokwenza ukhetho kwindlela esizijonga ngayo thina, nesizijonga ngayo iimeko zethu. Sisenokufana nomntu ojonga yonke into ngendlela engakhiyo aze azive exhwalekile, okanye sinokukhetha ukucinga ngendlela eyakhayo, sizive ‘sichwayitile entliziyweni,’ size sonwabe ngokungathi sisethekweni. USimone uthi: “Ndizama ukuhlala ndinesimo sengqondo esakhayo kangangoko kunokwenzeka. Ndiye ndihlale ndixakekile ndifundisisa, ndisentsimini kwaye ndithandaza ngokuzingisileyo. Ndizama nokusoloko ndikunye nabantu abanesimo sengqondo esakhayo nokunceda abanye.” Isimo sengqondo esinjalo sibangela uvuyo lokwenene, kwananjengokuba iBhayibhile isibongoza: “Yibani nemihlali ngoYehova nivuye, nina bangamalungisa; nimemelele ngovuyo, nonke nina baneentliziyo ezithe tye.”—INdumiso 32:11.
“Iqabane lokwenyaniso lithanda ngamaxesha onke, yaye lingumzalwana ozalelwe ixesha lokubandezeleka.” (IMizekeliso 17:17) Ukuzityand’ igila kwisalamane okanye kumhlobo okanye kumcebisi onokuthenjwa kunokusinceda sikwazi ukulwa nokudimazeka ngaphambi kokuba kusongamele. Ukuthetha nabanye kunokusinceda sibone izinto ngendlela elungeleleneyo. USimone uyavuma esithi: “Ukuthetha ngendlela ovakalelwa ngayo kuluncedo gqitha. Ufanele uxelele umntu othile ngendlela ovakalelwa ngayo. Amaxesha amaninzi into efunekayo kukuthulula nje isifuba sakho.” Ukwenza njalo kuya kukunceda ubone ubunyaniso bomzekeliso othi: “Inyameko yokuxhalaba esentliziyweni yendoda iya kuyibangela ukuba iqubude, kodwa ilizwi elilungileyo liyenza ibe nemihlali.”—IMizekeliso 12:25.
Oko Unokukwenza
Apha siye saqwalasela imbinana nje kwintaphane yemigaqo yeBhayibhile enokukunceda woyise iimvakalelo ezidimazayo uze ufumane ulonwabo lokwenene. Ukuba ungomnye wabo baziva bengento yanto, sikukhuthaza ukuba ulihlolisise ngenyameko iLizwi likaThixo, iBhayibhile. Funda ukuvakalelwa ngendlela esengqiqweni nelungeleleneyo ngawe nangololwamano lwakho noThixo. Sinethemba lokuba xa ukhokelwa liLizwi likaThixo, uya kukwazi ukufumana ulonwabo lokwenene kuko konke okwenzayo.
[Umbhalo osemazantsi]
a Esi Sibhalo sixutyushwa ngokweenkcukacha kwiphepha lama-22 ukusa kwiphepha lama-23.
[Umfanekiso okwiphepha 7]
Ukusebenzisa imigaqo yeBhayibhile kubangela ulonwabo