Imibuzo Evela Kubafundi

AmaKristu amele akujonge nzulu kangakanani ukuganana?

Ukuganana kubangela ulonwabo, kodwa kukwangumbandela onzulu. Akakho umKristu oqolileyo omele akuthabathe lula ukuganana, ecinga ukuba unokusuka nje akuphelise. Ixesha lokuganana ikwalithuba lokuba eso sibini siqhelane ngakumbi ngaphambi kokuba sitshate.

Xa sixubusha lo mbandela, kufuneka siqonde ukuba amasiko asekuhlaleni abandakanyekayo emtshatweni, amanyathelo akhokelela kuwo, ahluka kakhulu ngokwahlukana kweendawo namaxesha. EBhayibhileni sinomzekelo woku.

Iintombi ezimbini zikaLote ‘ezazingazani nandoda,’ ngandlela ithile zaziganelwe kumadoda amabini asekuhlaleni. ‘Abayeni beentombi zikaLote babeya kuzeka iintombi zakhe,’ sekunjalo iBhayibhile ayisichazeli isizathu okanye indlela ekwenziwa ngayo oko kuganana. Ngaba ezo ntombi zazisele zikhulile? Ngaba zaba nenxaxheba ekukhetheni abo zaziza kutshata nabo? Ngaba zaganwa ngenyathelo elithile lasekuhleni? Asazi. (Genesis 19:​8-14) Siyazi ukuba uYakobi wenza isivumelwano noyise kaRakeli sokutshata uRakeli emva kokumsebenzela iminyaka esixhenxe. Nangona uYakobi wayethetha ngoRakeli ‘njengomkam,’ babengenantlobano zesini ebudeni baloo minyaka. (Genesis 29:​18-21) Njengomnye umzekelo, ngaphambi kokuba atshate intombi kaSawule, uDavide kwakufuneka oyise amaFilisti. Akufeza oko kwakufunwa nguSawule, uDavide wayenokukwazi ukutshata loo ntombi, uMikali. (1 Samuweli 18:​20-28) Ezo ndlela “zokuganana” zazahlukile enye kwenye kwanakwiindlela eziqhelekileyo namhlanje kumazwe amaninzi.

UMthetho kaMoses wawunemimiselo ephathelele umtshato nokuganana. Ngokomzekelo, indoda yayinokuba nabafazi abangaphezu komnye; yayinokuwuqhawula umtshato ngezizathu ezahlukahlukeneyo, nangona kubonakala ukuba umfazi wayengenako. (Eksodus 22:​16, 17; Duteronomi 24:​1-⁠4) Indoda eye yakhohlisa intombi engaganwanga kwakufuneka iyitshate ukuba uyise uyavuma, yaye yayingenakuwuqhawula umtshato nayo. (Duteronomi 22:​28, 29) Eminye imithetho yayisebenza emtshatweni, njengaxa kwakungafanelekanga ukuba neentlobano zesini. (Levitikus 12:​2, 5; 15:​24; 18:​19) Yiyiphi imimiselo eyayiphathelele ukuganana?

Ibhinqa eliganiweyo elingumSirayeli lalijongwa ngendlela eyahlukileyo emthethweni kunelo lingaganwanga; kwezinye iimeko laligqalwa njengelitshatileyo. (Duteronomi 22:​23-29; Mateyu 1:​18, 19) AmaSirayeli ayengenakuganwa okanye atshate nesalamane esithile. Ngokuqhelekileyo aba babezizalamane, kodwa kumbi ukugana nokutshata kwakusalelwa ngenxa yamalungelo elifa. (Levitikus 18:​6-20; bona IMboniselo kaOktobha 1, 1978, iphepha 19-22.) Kucacile ukuba abakhonzi bakaThixo babengayi kukuthabatha lula ukuganana.

AmaSirayeli ayephantsi kwayo yonke loo mimiselo yoMthetho, kodwa amaKristu akakho phantsi kwaloo Mthetho, kuquka nemimiselo yawo ephathelele ukuganana okanye ukutshata. (Roma 7:​4, 6; Efese 2:​15; Hebhere 8:​6, 13) Enyanisweni, uYesu wafundisa ukuba umgaqo wamaKristu ophathelele umtshato wahlukile kulowo woMthetho. (Mateyu 19:​3-⁠9) Sekunjalo, akazange abuthabathe lula ubunzulu bomtshato, kwanobo bokuganana. Ngoko ke, kunzulu kangakanani ukuganana kwamaKristu?

Kumazwe amaninzi abantu bayazikhethela abo baya kutshata nabo. Xa indoda nebhinqa bethembisene ukutshata, bagqalwa njengabaganeneyo. Ngokuqhelekileyo, akudli ngokufuneka amanyathelo athile ukuze babe baganene. Kuyavunywa ukuba, kwezinye iindawo iqhelekile into yokuba indoda imnxibise umsesane lowo uya kuba ngumfazi wayo ukubonakalisa ukuganana kwabo. Okanye kulisiko ukuxelela izalamane nabahlobo ngoko kuganana, njengakwisidlo sentsapho okanye kwimbutho encinane. Ezi ziindlela abakhetha ngazo abantu, asiyomimiselo yeZibhalo. Kona ukuganana sisivumelwano esenziwe ngabo babini.a

UmKristu akafanele angxamele ukuthandana ngaphambi komtshato, ukuganana, okanye ukutshata. Sipapasha uncwadi olusekelwe eBhayibhileni olunokunceda abangatshatanga bagqibe enoba kububulumko kusini na ukuqalisa ukuthandana ngaphambi komtshato okanye ukuthabatha amanyathelo okuganana okanye ukutshata.b Eyona ngongoma kwesi siluleko kukuba umtshato wamaKristu uhlala ngokungapheliyo.​—⁠Genesis 2:​24; Marko 10:​6-⁠9.

AmaKristu amabini afanele azane kakuhle ngaphambi kokuba acinge ngokuganana. Ngamnye unokuzibuza, ‘Ngaba ngokwenene ndiqinisekile ngemeko yokomoya nokuzinikela kwakhe kuThixo? Ngaba ndicinga ukuba ndingamkhonza uThixo nalo mntu ubomi bam bonke? Ngaba sazana ngokwaneleyo ubuntu bethu? Ngaba ndiqinisekile ukuba siya kuhlala sifanelene ngokungapheliyo? Ngaba sizazi kakuhle izenzo zomnye zangaphambili neemeko akuzo ngoku?’

Akuba eganene amaKristu amabini, kulungile ngawo kwanabanye ukulindela ukuba kuza kulandela umtshato. UYesu walumkisa wathi: “Ke ilizwi lenu elithi Ewe malithethe uEwe, uHayi wenu, athethe uHayi.” (Mateyu 5:​37) AmaKristu agananayo amele azimisele koko. Noko ke, kwimeko engafane yenzeke, umKristu oganeneyo usenokufumanisa ukuba kukho umbandela onzulu ongazange uchazwe okanye owafihlwayo ngaphambi kokuba baganane. Isenokuba ngumbandela obalulekileyo ophathelele ihambo yomnye yangaphambili, nokuba lulwaphulo-mthetho okanye izenzo zokuziphatha okubi. Loo mKristu ofumanise oku umele enze isigqibo ngento aza kuyenza. Mhlawumbi abo babini baya kuwuxubusha kakuhle lo mbandela baze bavumelane ngokuqhubeka nokuganana kwabo. Okanye ngamxhelo-mnye basenokugqiba ekubeni bakuphelise oko kuganana. Nangona ukwenjenjalo kusenokuba ngumbandela wangasese​—⁠ungeyonto abanye abanokufaka iimpumlo zabo kuyo, bezama ukuhlaba amadlala, okanye bayigwebe​—⁠sisigqibo esinzulu kakhulu. Kwelinye icala, lowo uye wafumanisa loo mbandela unzulu, ngokobuqu usenokuvakalelwa kukuba kunyanzelekile ukuba akuphelise oko kuganana, kwanokuba omnye usafuna ukuqhubeka nako.​—⁠Bona “Imibuzo Evela Kubafundi” kwiMboniselo kaDisemba 15, 1975.

Kulungile ukuba imicimbi enjalo iconjululwe ngaphambi kokuba kutshatwe. UYesu wathi ekuphela kwesizathu esingokweZibhalo sokuba ubani aqhawule umtshato aze aphinde atshate yipor·neiʹa, ukuziphatha okubi kwesini okunzulu kwelinye iqabane lomtshato. (Mateyu 5:​32; 19:⁠9) Akazange athi umtshato osemthethweni unokuqhawulwa ukuba omnye ufumanisa ingxaki enzulu okanye ububi obabenziwe ngaphambi komtshato.

Ngokomzekelo, ngomhla kaYesu kwakunokwenzeka ukuba umntu abe neqhenqa. Ukuba umyeni ongumYuda ufumanisa ukuba iqabane lakhe lalineqhenqa (nokuba lalikwazi okanye lingakwazi oko) xa lalitshata naye, ngaba wayenesizathu sokuqhawula umtshato? UmYuda ophantsi koMthetho wayesenokuwuqhawula umtshato nalo, kodwa uYesu akazange athi oku kufanelekile kubalandeli bakhe. Khawucinge ngezinye zeemeko zanamhlanje. Indoda enegcushuwa, amadyunguza kumalungu okuzala, nentsholongwane iHIV, okanye ezinye izifo ezinzulu ezosulelayo isenokuba yatshata ingakuchazanga oko. Kusenokwenzeka ukuba yosulelwa ngenxa yokuziphatha okubi ngokwesini ngaphambi okanye ebudeni bokuganana kwayo. Ukufumanisa komfazi kamva ngeso sifo okanye ukuziphatha okubi kwayo kwangaphambili (kwanokungazali okanye ukungabi namandla ngokwesini) akusiguquli isibakala sokuba ngoku batshatile. Izenzo ezibi zangaphambi komtshato azisosizathu singokweZibhalo sokuqhawula umtshato ukuba uye wosulelwa zizifo ezithile okanye kwanokuba yena uye wafihla ukumithiswa kwakhe yenye indoda xa bebetshata. Ngoku batshatile yaye baye bazibophelela ngokwabo omnye komnye.

Kuyavunywa kona ukuba, azixhaphakanga iimeko ezimbi ngolo hlobo, kodwa le mizekelo imele igxininise ingongoma esisiseko yokuba: Ukuganana akufanele kuthatyathwe lula. Ngaphambi nasebudeni bokuganana, amaKristu amele azabalazele ukwazana kakuhle. Afanele anyaniseke koko omnye afuna ukukwazi okanye anelungelo lokukwazi. (Ngokusemthethweni kwamanye amazwe kufuneka izibini zixilongwe ngaphambi kokuba zitshate. Abanye basenokuzifunela ngokwabo ukuxilongwa.) Ngaloo ndlela uvuyo nokubaluleka kokuganana kuya kuba nenjongo ebekekileyo njengoko aba babini besingisa kuvuyo olungakumbi kumtshato wokwenene.​—⁠IMizekeliso 5:​18, 19; Efese 5:​33.

[Imibhalo esemazantsi]