Ukuba Sesichengeni Sokufa
“Maxa wambi ndiye ndiphuphe ndinemilenze yam yomibini kwakhona. . . . Kwiminyaka eyadlulayo, xa ndandisemncinane, ndaya kudlala nabahlobo bam kufutshane nendlu yakuthi. Kanye ngelo xesha kwatsho isithonga, ‘BHUM’. . . Umlenze wam wasekunene wavuthuluka wonke.”—NguSong Kosal, one-12 leminyaka, eKhambodiya.
Suku ngalunye, ngumlinganiselo wabantu abamalunga nama-70 abenzakaliswa okanye babulawe zizigcayiseli. Inkoliso yamaxhoba asingomajoni. Kunoko, iba ngabemi—amadoda alusa iinkomo, amabhinqa aya kukha amanzi nabantwana abazidlalelayo. Ngokomzekelo, uRukia oneminyaka esibhozo ubudala, okwiphepha lethu elingaphandle, wenzakaliswa sisigcayiseli esabulala abantakwabo abathathu noninakazi.
Isigcayiseli sinokuhlala sisebenza kangangeminyaka engaphezu kwama-50 emva kokutyalwa kwaso. Ngaloo ndlela, iDefense Monitor ithi “kuphela kwesixhobo esikhoyo esibulala abantu abangakumbi emva kokuba luphelile ungquzulwano kunaxa kusiliwa.” Akukho bani waziyo ukuba zingaphi izigcayiseli ezityalwe ehlabathini lonke. Kuqhelekile ukuva uqikelelo lwezinokuba zizigidi ezingama-60 ubuncinane. Liyinyaniso lona elokuba, zininzi izigcayiseli ezincothulwayo. Noko ke, kutshanje ngowe-1997, iZizwe Ezimanyeneyo zanikela ingxelo yokuba “kwisigcayiseli ngasinye esincothulwayo, kutyalwa ezingama-20. Ngowe-1994, kwancothulwa ezimalunga ne-100 000, ngoxa kwatyalwa ezingakumbi ezizizigidi ezi-2.”
Kutheni amazwe amaninzi angoophuma silwe namhlanje ekhetha ukusebenzisa izigcayiseli njengezona zixhobo zibhetele? Zingakanani iindleko zazo kuqoqosho nasentlalweni? Zibachaphazela njani abo basinda kuzo? Ngaba isijikelezi-langa sethu siya kuze singabi nazo izigcayiseli?
[Inkcazelo Ngemifanekiso ekwiphepha 3]
© ICRC/David Higgs
Copyright Nic Dunlop/Panos Pictures