Iindaba Zikamabonwakude—Zingakanani Ezizezokwenene?
Emva kokuba abakhi-mkhanya bezosasazo behlalutye imibandela egutyungelwayo kusasazo lweendaba zikamabonwakude izihlandlo ezili-102 kwiidolophu ezingama-52 zaseUnited States, bafumanisa ukuba ngumlinganiselo wama-41,3 kuphela ekhulwini oqulethe iindaba kwezo nkqubo. Yintoni enye equlethwe ngaloo majelo eendaba?
Ngokomlinganiselo, ixesha elilingana nama-30,4 ekhulwini kwixesha leendaba zikamabonwakude, liqulethe ezorhwebo. Enyanisweni, kufunyaniswe ukuba amanye amajelo achitha ixesha elingakumbi kwezorhwebo kunasezindabeni. Ukongezelela koko, ingxelo yolo hlalutyo ibonisa ukuba ixesha leendaba lisoloko linengxelo nje yezinto eziyimfungumfungu.a Ngaphantsi komxholo othi “Imfungumfungu,” le ngxelo inaba ithi “ixesha elininzi losasazo lichithwa kwimfitshi-mfitshi, ekuboniseni amabali aza kubakho, nasekuboniseni iindaba ‘ezibaxiweyo’ okanye ezobudenge kwanezinto ezinokuthanani nemibhiyozo.” Umzekelo wamanye amabali ayimfungumfungu ngulo: “Ukhuphiswano Lwamayilo,” “Intatheli Yeendaba Ithabathe Uhambo ‘Oluxhomisa Amehlo’ Kuloliwe Wokudlala,” nelithi “Liyanda Inani Labantu Abathenga Inyhobhanyhobha Ezivenkileni.”
Ngawaphi awona mabali aba ziindaba zokwenene? Amabali olwaphulo-mthetho ngawona abalaseleyo kwiindaba zikamabonwakude, kuchithwa umlinganiselo wexesha elingama-26,9 ekhulwini kusasazwa wona ezindabeni. “‘Ukuba iindaba ziphathelele ukuphalala kwegazi, ezo iba zezona ziphambili’ ezindabeni zikamabonwakude . . . Nangona uye wehla umlinganiselo wolwaphulo-mthetho kwiminyaka edluleyo kwelo laseUnited States, kodwa oko akunjalo kwiindaba zikamabonwakude.” Kutheni kunjalo? Ngokutsho kwababhali bolo hlolisiso, “iziganeko zolwaphulo-mthetho ziyathandwa yaye abantu banikela ingqalelo kuzo.”
Emva kolwaphulo-mthetho kupapashwa umbandela weentlekele, njengomlilo, ukungqubana kweenqwelo-mafutha, izikhukula, nokuqhushumba kwezinto (ixesha elingange-12,2 ekhulwini kwelo leendaba), kuze kulandele ezemidlalo (ixesha elingange-11,4 ekhulwini). Kwandula ke kulandele ezempilo (ixesha elingange-10,1 ekhulwini), eziphathelele urhulumente (ixesha elingange-8,7 ekhulwini), nezoqoqosho (ixesha elingange-8,5 ekhulwini). Iingxubusho ezifana nemfundo, ubume bendalo, ubugcisa nenzululwazi kuchithwa ixesha elincinane kuzo (elingange-1,3 ukusa kwisi-3,6 ekhulwini). Kwelinye icala, kulo lonke elo xesha leendaba elingange-10 ekhulwini lichithwa kwiingxelo zemozulu. Aba baphengululi bagqabaza besithi: “Imozulu iyathandwa ezindabeni zikamabonwakude ngokuba yinto bonke abantu abasoloko bethetha ngayo.” Bongezelela besithi: “Naluphi na uhlobo lwemozulu, nokuba intle okanye imbi, ishushu okanye iyabanda, kumanzi okanye libalele, lunokudla ixesha elininzi leendaba.”
Iindaba ezimnandi zezokuba, le ngxelo yachaza ukuba kukho inani elandayo leentatheli nabakhi-mkhanya ababonayo ukuba kukho utshintsho olumele lwenziwe. Noko ke, olu hlolisiso luyavuma ukuba olo tshintsho alunakwenzeka ngokulula kuba “amandla ezorhwebo nokubawa kuko okugqibayo ngoko kumele kupapashwe ezindabeni.”
[Umbhalo osemazantsi]
a Ingxelo ethi Izinto Abangenamdla Kuzo Abantu—Iindaba Zikamabonwakude Wasekuhlaleni EMerika sisihlandlo sesine sokuhlolwa koko kuqhubekayo ezindabeni zeli lizwe rhoqo ngonyaka. Siyihlanganiselwe nguGqr. Paul Klite, uGqr. Robert A. Bardwell, noJason Salzman, beRocky Mountain Media Watch.