Ukumanyana KweYurophu—Kubaluleke Ngantoni? — IWatchtower LAYBRARI EKWI-INTANETHI

Ukumanyana KweYurophu—Kubaluleke Ngantoni?

KWAKUDUBULA iziciko zechampagne. Kwakutshawuziswa izithatha zemililo nje, esibhakabhakeni. Kwakusuke kwathini? Ngaba kwakubhiyozelwa iwaka leminyaka elitsha? Akunjalo, esi isiganeko sasibaluleke ngakumbi kunokutshintsha nje kwamanani kwiikhalenda zehlabathi. Kwakungomhla kaJanuwari 1, 1999. Ngolo suku kwasekwa ngokusemthethweni imali entsha—uhlobo lwemali ebizwa ngokuba yieuroa—imali efanayo eza kusetyenziswa ngamazwe akwiEuropean Union (EU).

Uninzi lwabemi baseYurophu lwakubona ukwenziwa kwemali efanayo njengesona senzo siyimbali kumalinge akudala okumanyanisa iYurophu. Iphephandaba lesiDatshi iDe Telegraaf lakothulel’ umnqwazi ukwenziwa kwe-euro ‘njengesithsaba sokumanyana kweYurophu.’ Enyanisweni, emva kwamaphupha amashumi eminyaka, uthethathethwano nokulibaziseka, umanyano lweYurophu luthembisa ngakumbi kunanini na ngaphambili.

Ewe kona, abantu abangahlali eYurophu basenokungasiboni isizathu sokuba oku kuthathelwe phezulu kangaka. Ubukho be-euro nemigudu yokumanyanisa iYurophu isenokubonakala ingabuchaphazeli nganto ubomi babo bemihla ngemihla. Noko ke, ukumanyana kweYurophu kungabangela okona kubambisana kukhulu kwezoqoqosho. Ngoko ke kunganzima ukuba kutyeshelwe ukumanyana kweYurophu—kungakhathaliseki ukuba ubani uhlala phi na.

Ngokomzekelo, kutshanje, uSekela Nobhala waseUnited States uMarc Grossman waxelela izihlwele kuMntla Merika esithi: “Impumelelo yethu inokuthanani neYurophu.” Kutheni esitsho? Phakathi kwezizathu awazikhankanyayo sesokuba “msebenzi ngamnye kwabali-12 abasebenza kwimizi-mveliso yaseUnited States, ukwelinye lamashishini angama-4 000 akwelo laseUnited States abanini bawo abangabaseYurophu.” Kuye kwanikelwa nengxelo yokuba, le mali intsha yaseYurophu isenokulichaphazela ixabiso lezinto ezivela kwamanye amazwe—kwanamaxabiso ezindlu ekubanjiswa ngazo—kumazwe akude naseYurophu.

Namazwe asakhulayo asenokuzuza. Njani? Olunye uhlolisiso lubonisa ukuba: “Ukuthatyathelw’ indawo kwemali eyahlukahlukeneyo yaseYurophu yieuro kuya kulenza lube lula unxulumano lwezorhwebo oluphakathi kwamazwe asakhulayo ne-EU.” Ukongezelela koko, abanye bacingela ukuba amashishini aseJapan nawaseUnited States arhweba eYurophu aya kufumana inzuzo. Xa kusetyenziswa ieuro, akuyi kubakho kuhla nokunyuka kwamaxabiso abangelwa lutshintshiselwano ngemali oluphakathi kwamazwe aseYurophu. Ukushishina eYurophu kunokuhamba kakuhle ngakumbi ngokwezoqoqosho.

Ukuba uceba ukutyelela eYurophu, ngandlel’ ithile usenokuxhamla kwiingenelo zokumanyana kweYurophu. Kungekudala uya kube ukwazi ukuthenga izinto neenkonzo ezithile ezikumazwe ahlukeneyo aseYurophu ngemali efanayo, ieuro, ephantse ibe nexabiso elilingana neledola yaseUnited States. Iya kube ingasekho into yokuba abakhenkethi babe bexakaniswe kukuphatha imali eyahlukahlukeneyo iguldens, ifrancs, ilire, ideutsche marks, neecalculator ezincinane.

Noko ke, inyathelo leYurophu lokwenza ilizwekazi elimanyeneyo libangela enye into enqweneleka ngakumbi—ithemba. Khawufan’ ucinge nje, kumashumi eminyaka adluleyo iYurophu yayithe zwabha kwimfazwe. Xa ukujonga ngaloo ndlela oku, ukumanyana kweYurophu kusesona siganeko simangalisayo. Kwihlabathi lonke abantu bakwakhel’ umkhanya oku.

Abaninzi bacinga into yokuba mhlawumbi kunokwenzeka ukuba emva kwako konke oku ihlabathi lonke limanyane. Ngokwenene eli lithemba elibangel’ umdla! Ngaba amanyathelo eYurophu okuzama ukumanyana asondeza abantu kumanyano lwehlabathi? Ngaphambi kokuba sixubushe loo mbuzo, kufuneka siqwalasele ngokunyanisekileyo ukumanyana kweYurophu. Yiyiphi imiqobo ekusafuneka ishenxisiwe kwindlela esa kolu manyano?

[Umbhalo osemazantsi]

a Ieuro enye=R6

[Ibhokisi/Isicangca esikwiphepha 12]

NGABA OKU KUKWENZIWA KOMANYANO?

Ingcamango yokumanyana kweYurophu asiyonto intsha kwaphela. Umanyano lwalukho ukusa kumlinganiselo othile ebudeni bolawulo loBukhosi beRoma, obabuphantsi kolawulo lukaCharlemagne ngoko, lwaza kamva lwakho phantsi kukaNapoléon I. Kwezo meko umanyano lwalusekelwe kumkhosi noloyiso. Noko ke, emva kweMfazwe Yehlabathi II amazwe aliqela athi adlakazwa yimfazwe avakalelwa kukuba kufuneka uxolo lusekelwe kwintsebenziswano. La mazwe ayenethemba lokuba loo ntsebenziswano yayiza kukhokelela kungekuphela nje ekubuyiseleni ezoqoqosho kwimeko entle kodwa nasekupheliseni imfazwe. Nanga amanye amanyathelo ayimbali aye akhokelela kule meko yanamhlanje:

• 1948 Yaba ngamakhulu eenkokeli zezobupolitika zaseYurophu ezazihlanganisene eHague, eNetherlands, zaza zenza isifungo esithi: “Asinakuze siphinde silwe sodwa kwakhona.”

• 1950 IFransi neJamani zaqalisa ukusebenzisana ukuze zikhusele ushishino lwazo ngamalahle nesinyithi. Amazwe angakumbi azibandakanya, kwaza oku kwakhokelela ekubeni kusekwe iEuropean Coal and Steel Community (ECSC). Le ECSC yaqalisa ukusebenza ngowe-1952 yaye yayiquka iBelgium, iFransi, i-Itali, iLuxembourg, iNetherlands neNtshona Jamani.

• 1957 Amalungu amathandathu e-ECSC aseka ezinye iintlangano ezimbini: iEuropean Economic Community (EEC) ne-European Atomic Energy Community (Euratom).

• 1967 I-EEC yadibana ne-ECSC ne-Euratom ukuze ziseke iEuropean Community (EC).

• 1973 I-EC yavumela ukuba iDenmark, i-Ireland neUnited Kingdom zingene.

• 1981 IGrisi yazibandakanya kwiEC.

• 1986 IPortugal neSpeyin zazibandakanya kwiEC.

• 1990 I-EC yandiswa ngakumbi xa iMpuma neNtshona Jamani zathi zadibana, yaza loo nto yabangela ukuba elo lizwe lalisakuba yiMpuma Jamani lingene kuloo ntlangano.

• 1993 Imigudu yokufuna uqoqosho olunamandla nokumanyana kwezobupolitika phakathi kwamalungu e-EC yakhokelela ekusekweni kwe-European Union (EU).

• 2000 I-EU ibunjwa ngamazwe ali-15 angamalungu kuyo—iBelgium, iDenmark, iFinland, iFransi, iGrisi, i-Ireland, i-Itali, iJamani, iLuxembourg, iNetherlands, iOstriya, iPortugal, iSpeyin, iSweden neUnited Kingdom.

[Umfanekiso okwiphepha 11]

Ieuro iza kuthabathel’ indawo imali eninzi eyahlukahlukeneyo yaseYurophu

[Inkcazelo Ngomfanekiso okwiphepha 11]