Imigudu Yokukhiqa IVatican KwiZizwe Ezimanyeneyo
IZIKO leendaba eliseRoma i-Inter Press Service (IPS) lanikela ingxelo yokuba “umanyano lwehlabathi lonke lwemibutho engeyoyaburhulumente (non-governmental organisations [NGOs]) engaphezu kwama-70 luye lwaphum’ iphulo ehlabathini lonke ngelokukhiqa iVatican kwiZizwe Ezimanyeneyo.” Sithethanje, iVatican ibukele nje isong’ izandla, okanye ayiselolungu, lentlangano yeZizwe Ezimanyeneyo. Ibinje ke imeko yeVatican ukususela ngowe-1964.
Kutheni eli qela lemibutho engeyoyaburhulumente, elithe ekupheleni kuka-Aprili wonyaka odluleyo lafikelela kwi-100 ehlabathini lonke, lingayifuni iVatican kwiZizwe Ezimanyeneyo? Le mibutho ingeyoyaseburhulumenteni ithi kungenxa yokuba iVatican iligunya lonqulo kungekhona urhulumente wezobupolitika. UFrances Kissling ongumongameli weCatholics for a Free Choice, waxelela i-IPS ukuba olu manyano alulwi nelungelo leVatican lokuvakalisa izimvo zayo, kodwa “eyona nto ingunomji yeyokuba ithi isakugqiba ukungabi ngorhulumente ibe kunye noorhulumente.”
UAnika Rahman, ongumalathisi weInternational Programmes at the Centre for Reproductive Law and Policy, uyavumelana noko. I-IPS yamcaphula esithi “ukuba iZizwe Ezimanyeneyo ziliphatha iBhunga looPopu njengelizwe elinamalungelo apheleleyo ngenxa yegunya lalo lonqulo, eli qumrhu lehlabathi lonke liya kubangela nezinye iinkonzo zifune into efanayo.” Wongezelela ngelithi: “Ukuze kuqinisekiswe ukuba iZizwe Ezimanyeneyo aziphakamisi naluphi na unqulo ngokukhethekileyo, iintlangano zonqulo ezinjengeCawa yamaRoma Katolika azifanele zivunyelwe ukuba zibe nenxaxheba kule ngqungquthela njengamazwe angengomalungu ayo.”
Kuthekani ngebango lokuba iVatican ingurhulumente yaye ilifanele iqhuzu elinandiphayo ngoku? UNkszn. Kissling wathi kudliwano-ndlebe: “Loo nto iyadida yaye iyalahlekisa. Lilonke sithi le yindlela eyayisetyenziswa ngenkulungwane ye-15 ukuchaza urhulumente yaye, enyanisweni iBhunga looPopu liqumrhu elilawula unqulo.” Walek’ umsundulo esithi ibinzana elithi “Vatican” nelithi “iBhunga looPopu” omabini “azizifanokuthi zebinzana elithi iCawa yamaRoma Katolika.”
Into ebangela ukuba imibutho engeyoyaburhulumente ilicaphukele iqhuzu elibanjwe yiVatican ngoku kwiZizwe Ezimanyeneyo, yimbono yayo kwimibandela engabemi. Ngokomzekelo, iVatican iye yasebenzisa iingqungquthela zeZizwe Ezimanyeneyo ezinjengeInternational Conference on Population and Development eyayiseCairo ngowe-1994 neWomen’s Conference eyayiseBeijing, ngowe-1995, ukuze ivakalise iimbono zayo ngoqingqo-nzala. I-IPS ithi: “Ekubeni iZizwe Ezimanyeneyo zithabatha izigqibo zazo ngokuxhomekeke kwisininzi, abantu abathanda impikiswano njengeVatican baye baphazamisana nothethathethwano ngemibandela ephathelele abemi, uqingqo-nzala, amalungelo amabhinqa nokunyanyekelwa kwenzala.”
Ngokutsho kukaNkszn. Kissling, “eyona nto ifunekayo kukuba iVatican ingene kwimibutho engeyoyaburhulumente—kanye njengeminye imibutho engeyoyaburhulumente emela amaSilamsi, amaHindu, amaBhuda, amaBahai neminye imibutho yonqulo.” Olu manyano lufuna uSosiba-jikelele weZizwe Ezimanyeneyo, uKofi Annan, kwakunye ke neNgqungquthela yeZizwe Ezimanyeneyo ukuba iphinde ihlaziye isikhundla seVatican phakathi kweyona mibutho yezobupolitika mikhulu ehlabathini.
[Imifanekiso ekwiphepha 31]
Igosa leVatican lithetha kwiZizwe Ezimanyeneyo
[Inkcazelo]
UN/DPI Photo by Sophie Paris
UN photo 143-936/J. Isaac