Ukuhlangabezana Ngovuyo Neli Hlabathi Lixakekileyo
UNINZI LWABANTU LUYAKWAZI UKUHLANGABEZANA NEENGCINEZELO EZIBANGELWA BUBOMI, KODWA BAMBALWA ABAHLANGABEZANA NAZO NGOVUYO. LOO NTO IFUNA UBULUMKO OBUKHETHEKILEYO.
ITHETHA ngako oku, incwadi ethi The 24-Hour Society ithi: “Kufuneka sihlakulele ubulumko ukuze sikhusele iimfuno zabantu ezingokwemvelo kweli hlabathi lezobugcisa sizakhele lona.”
Okuvuyisayo kukuba, sele bukho ubulumko obuyingenelo obufumaneka kweyona ncwadi isasazeke kakhulu ehlabathini—iLizwi likaThixo, iBhayibhile. Ekubeni iphefumlelwe nguLowo uziqonda ngokugqibeleleyo iimfuno zabantu ezingokwemvelo, iBhayibhile inemigaqo eye yavavanywa yaza yafunyaniswa iluncedo. Ukusebenzisa le migaqo kunokukunceda ukwazi ukulawula ubomi bakho, nto leyo eya kukunika umlinganiselo othile wovuyo njengoko uhlangabezana neli hlabathi lixakekileyo.—Isaya 48:18; 2 Timoti 3:16.
Le migaqo igubungela iinkalo ezintathu eziyintloko. Okokuqala, ibonisa indlela onokuhlalutya ngayo izinto ngobulumko. Okwesibini, inokukunceda ubeke izinto zokuqala kwindawo yazo. Okwesithathu, ivelisa imbono yokomoya ngobomi ephakame ngakumbi kunembono eqhelekileyo. Ngoku makhe siqwalasele ezi nkalo zintathu.
Gcina Ubomi Bulula Yaye Bungaxakekanga
Yiba nomfanekiso-ngqondweni wakho usiya kuhlala ezintenteni ukuze ubethwe ngumoya kangangeentsuku ezimbalwa. Ufuna ukuhlala tofo-tofo, ngoko uthabatha intente enkulu enayo yonke into eyimfuneko. Kwakhona utsala inqwelwana enefanitshala, izinto zokupheka, isikhenkcisi, umatshini omncinane wokuvelisa umbane, izibane, umabonwakude, nezinye izinto ezininzi, kwakunye nokutya. Noko ke, ukulungiselela zonke ezi zinto kuthabatha iiyure ezininzi! Emva koko, ekupheleni kwekhefu lakho elifutshane, usebenzisa ixesha elininzi lokuphinda upakishe ezi zinto—singasathethi ke ngokuphinda upakishe ezi zinto xa ufika ekhaya. Xa ukhumbula ufumanisa ukuba akukhange ube naxesha laneleyo lokunandipha ukubethwa kwakho ngumoya! Uyathandabuza enoba bekumele ukuba ukwenzile na konke oku.
Kwizigidi zabantu namhlanje, ubomi bufana nohambo lokuya kuhlala ezintenteni. Bachitha ixesha elininzi ngokugqith’ emgceni beqokelela baze bagcine izinto eziphathekayo ezininzi ekuthiwa kweli hlabathi bayazifuna ukuze bonwabe. Ngokwahlukileyo uYesu Kristu wathi: “Kwanaxa umntu enentabalala ubomi bakhe abuphumi kwizinto anazo.” (Luka 12:15) Ewe, umgangatho wobomi awuxhomekekanga kubutyebi bezinto eziphathekayo. Enyanisweni, ubutyebi budla ngokuba ngomnye woonobangela boxinezeleko namaxhala obomi. INtshumayeli 5:12 ithi: “Indyebo yesityebi ayisivumeli ukuba silale.”
Ngoko khawukhe uhlole nganye kwizinto onazo, uze uzibuze, ‘Ngaba ngokwenene le nto iyimfuneko, okanye igqiba nje indawo? Ngaba inento eyongezelelayo kumgangatho wobomi bam, okanye indityel’ ixesha?’ Imbula-mbethe yencwadi ethi Why Am I So Tired? ebhalwe nguLeonie McMahon ithi: “Ukuveliswa kwezixhobo ezahlukahlukeneyo, ezenzelwe ukwenza umsebenzi wekhaya ube lula, kuye kwathumela abafazi abaninzi emsebenzini ukuze bakwazi ukuzithenga baze bahlawulele ukulungiswa kwazo.”
Xa uphila ubomi obulula, uba nexesha elininzi lentsapho, abahlobo bakho kwakunye nesiqu sakho. Kubalulekile ukuba nexesha ukuze wonwabe. Ungaze ufane nabo babona sele kwaphulwe ukuba abahlobo nentsapho babaluleke gqitha—yaye babangela umdla—kunemali nezinye izinto. Ngabantu kuphela abanokukuthanda. Ukufaka imali elugcinweni, iikhompyutha, oomabonwakude nezinye izinto, nangona zinokuba nendawo yazo, aziyiyo eyona nto ibalulekileyo ebomini. Abo bazibeka phambili ezo zinto babubeka kumgangatho ophantsi ubomi babo yaye ekugqibeleni abaneliseki yaye bade bacaphuke.—1 Timoti 6:6-10.
Lilawule Ixesha Uze Ubeke Izinto Zokuqala Kwindawo Yazo
Kwezinye iimeko ukulawula ixesha kufana noqingqo-mali. Ukuba uzama ukufaka izinto ezininzi kwixeshana onalo, akuphili ngokuvisisana nexesha lakho. Ukuphila ngolo hlobo kubangela udandatheko, uxinezeleko nokudinwa. Ngoko funda ukubeka izinto zokuqala kwindawo yazo.
Okokuqala, hlolisisa ezona zinto zibalulekileyo uze uzibekele ixesha elaneleyo. KumaKristu, izilangazelelo zokomoya zisoloko zikweyona ndawo yokuqala. (Mateyu 6:31-34) Ukuba izinto ezibalulekileyo zenziwa ngobungxamo okanye kudluliswe nje usana kunina, kusoloko kusibakho iingxaki ezinzulu. Ngoko ke, kusenokufuneka ususe nantoni na etya ixesha kodwa ingeyongenelo.
Xa ubeka izinto zokuqala kwindawo yazo, khumbula ukuba kufuneka nexesha lokuba wedwa—ixesha lokucamngca okuyingenelo nokuphinda uzihlaziye. Ulindixesha iPsychology Today uthi: “Ixesha lokuba wedwa eliyingenelo liyeza eliyimfuneko kweli hlabathi lixakeke kangaka. . . . Ukuba nexesha lokuba wedwa kuyakhuthaza ebomini.” Abantu abaxakeke gqitha de bangakwazi ukucamngca basenokungabujongi ngendlela efanelekileyo ubomi.
Ukuthozama Nokuthanda Izinto Zokomoya
Ukuthozama nokuthanda izinto zokomoya zezona zinto zimbini zibalaseleyo onokuba nazo ukuze uphile ngolonwabo, uzinzile. Ukuthozama kubalulekile ngenxa yokuba kuyakunceda uphephe ukuba nemisebenzi neembopheleleko ezingekho ngqiqweni. Ukuba uthozamile, uya kukwazi ukuba mawuyeke nini ukwenza umsebenzi owongezelelekileyo okanye ezinye izinto ezinokuphazamisana nezinto ezibalulekileyo. Abantu abathozamileyo ababamoneli abanye ngezinto abanazo nabazenzayo, kodwa bayaneliseka. Ukuthozama ngokunyanisekileyo, kubonisa ukukhula ngokomoya, nto leyo ebalulekileyo ukuze sikwazi ukulawula ubomi bethu.—Mika 6:8; 1 Yohane 2:15-17.
Ukuthanda izinto zokomoya okusekelwe kulwazi oluchanileyo lweBhayibhile kukwenza ube ngumntu onengqiqo—umntu ongenakuqhathwa yindlela ngokuqhelekileyo echazwa ngayo impumelelo. Uthobela icebiso lobulumko elikweyoku-1 kwabaseKorinte 7:31: “Nabo balisebenzisayo eli hlabathi babe njengabangalisebenzisi ngokupheleleyo; kuba imeko yeli hlabathi iyatshintsha.” AmaKristu ‘ayalisebenzisa eli hlabathi’ xa efunela wona neentsapho zawo izinto eziphathekayo, kodwa akazivumeli angene zwabha kweli hlabathi. Ayazi ukuba alikhuselekanga ngokwenene, kwanokuba kungekudala liya kutshatyalaliswa, yaye impumelelo yokwenene—ukhuseleko nobomi obungunaphakade kumhlaba oyiparadesi—buxhomekeke kukuma komntu noThixo. (INdumiso 1:1-3; 37:11, 29) Ngoko thobela icebiso likaYesu, uze uhlab’ ukhangele ngokuziqwebela “ubuncwane ezulwini, apho inundu nomhlwa zingadliyo khona, nalapho amasela angaqhekeziyo ebe.”—Mateyu 6:20.
Waphephe Amaxhala Uze Ufune Uxolo Lokwenene
Njengoko le nkqubo yezinto isiya esiphelweni, uxinezeleko nezinto ezifuna ixesha lakho ngokungathandabuzekiyo ziya kwanda. Noko ke, hayi indlela ekubaluleke ngayo ukuzama ukusebenzisa esi siluleko seBhayibhile: “Musani ukuxhalela nantoni na, kodwa ezintweni zonke zaziseni izibongozo zenu kuThixo ngomthandazo nesikhungo nombulelo; yaye uxolo lukaThixo olungaphaya kokuqonda luya kuzilinda iintliziyo zenu namandla enu engqondo ngoKristu Yesu.” Uxolo olunjalo alunakufunyanwa ngumntu okholose ngezinto zeli hlabathi nongakuboniyo ukuxabiseka komthandazo.—Filipi 4:6, 7.
Kodwa, uYehova uya kwenza okungakumbi kunokukunika uxolo lwengqondo. Uya kukuncedisa uthwale imbopheleleko yakho mihla le ukuba ‘uliphosa kuye lonke ixhala lakho.’ (1 Petros 5:7; INdumiso 68:19) Ngoko ke, kububulumko ukuphulaphula uThixo mihla le ngokufunda iLizwi lakhe. Ngubani onokukunika icebiso elilunge ngakumbi kunoMdali wakho? (INdumiso 119:99, 100, 105) Ewe, amava aye abonisa ukuba abo babeka uThixo kwindawo yokuqala ebomini babo bancedwa ngokugqithiseleyo ukuba bahlangabezane ngovuyo neli hlabathi lanamhlanje lixakekileyo.—IMizekeliso 1:33; 3:5, 6.
[Amagama acatshulweyo akwiphepha 23]
Beka izinto zokuqala kwindawo yazo, kuquka ixesha lokuba wedwa nokuthanda izinto zokomoya
[Umfanekiso okwiphepha 21]
Ngaba unokubugcina bulula yaye bungaxakekanga ubomi bakho?
[Umfanekiso okwiphepha 22]
Ngaba ubeka phambili izinto okanye abantu?