Ngaba Abantu Abahamba Ngenqwelo-moya Basakhuselekile?
IINQWELO-MOYA ezinkulu ezine ziyaqweqwediswa. Ezine ziyawa zintlitheke. Izakhiwo zodumo ziyatshabalala. Ngokuphindaphindiweyo, umabonwakude usasaza umfanekiso wenqwelo-moya enkulu i-767 intlitheka kwesinye isakhiwo seTwin Towers.
Uhlaselo lwangoSeptemba 11 2001, lwaba kukuqalisa kwexesha lokoyika ingqumbo yabanqolobi. Iinqwelo-moya zokukhwela abantu zaguquka zaba zizixhobo zokubulala, yaye ezinye zaguquka zaba ziibhombu ezinobungozi.
Ngenxa yoko, ngoku abantu bayoyika ukuhamba ngeenqwelo-moya: Abo babekade beziva bekhuselekile, sele besoyika ukuhlaselwa ngabanqolobi. Ukongezelela koko, emva koSeptemba 11, ziye zanda iziganeko zokuwa kweenqwelo-moya ezingenakuthanani nobunqolobi, nto leyo ebangele abantu abaninzi boyika ngakumbi ukuhamba ngenqwelo-moya.
Yinyaniso ukuba, izigidi zabantu abasehlabathini azinayo imali yokuhamba ngenqwelo-moya. Noko ke, abanye kufuneka bahambe ngenqwelo-moya mihla le. Abo kufuneka bahambe rhoqo ngenxa yomsebenzi wabo, abanakukuphepha ukuhamba ngenqwelo-moya. Kudla ngokufuneka ukuba abavangeli basemazweni nabalungiseleli abangamaKristu bathabathe uhambo olude ngenqwelo-moya xa bevela kwizabelo zabo. Maxa wambi, namahlwempu kudla ngokunyanzeleka ahambe ngenqwelo-moya xa kufuneka afumane unyango olungxamisekileyo. Kwakhona amawaka abaqhubi beenqwelo-moya nabo basebenza kwiinqwelo-moya baxhomekeke kuzo ukuze bafumane isonka.
Inkoliso yabantu abahamba ngenqwelo-moya ekusenokwenzeka ukuba nayo iyoyika, kufuneka iqale ithuthuzele amaqabane ayo axhalabileyo nabantwana bayo aboyikayo ngaphambi kokuba ihambe. Njengoko zisanda iingxaki kwizikhululo zeenqwelo-moya ezazikade zinocwangco, abahambi bayazibuza enoba kuseyeyona ndlela ikhuselekileyo kusini na ukuhamba ngenqwelo-moya.
Ukuze aqwalasele loo mibandela, uVukani! uye waqhagamshelana neengcali zokhuseleko, abasebenzi kwizikhululo zeenqwelo-moya, amagosa eenqwelo-moya ezilayisha abantu nabo banyamekela iinqwelo-moya. Kubonakala ukuba bonke bayavumelana ngoku: Nangona ukuhamba ngenqwelo-moya kuseyeyona ndlela ikhuselekileyo yokuhamba, ezi zisongelo zitsha zifuna ukuba kuthatyathwe amanyathelo amatsha okwandisa ukhuseleko lwabantu abahamba ngenqwelo-moya.
Kumanqaku alandelayo kuza kuxutyushwa ngeengxaki ezikhoyo noko unokukwenza ukuze ukhuseleke ngakumbi yaye ukunandiphe ukuhamba ngenqwelo-moya.