Abantu Abaselula Bayabuza . . .

Ngaba Ndifanele Ndizibukele Iividiyo Zomculo?

“Kumnandi ukubukela iividiyo zomculo. Ezinye zifana nemifanekiso eshukumayo edlala ixesha elifutshane. Kubaliswa ibali elithile, yaye ndiwuthanda kakhulu umngqungqo owenziwa kuzo.”—UCasey.

“Ziyakunceda ufunde umculo omtsha. Utsho wazi iingoma ezintsha eziphambili ezingaphezu kwama-40. Kwakhona, iividiyo zomculo zikufundisa indlela yokuncokola.”—UJosh.

“Iinkcukacha zevidiyo zindinceda kakhulu—ndiyakwazi ukubona ukuba ngubani lo uculayo, unxibe ntoni, ndiyakwazi nokubona indlela enza ngayo izinto. Zonke ezi nkcukacha zindinceda ndiqonde intsingiselo yamazwi engoma.”—UKimberly.

“Ndithanda ukubukela iingoma ezintsha zamaqela omculo endiwathandayo. Eyona nto ndiyithandayo kukubukela ubugcisa obusetyenziswayo xa kusenziwa ividiyo. Yaye ezinye iividiyo ziyahlekisa. Kodwa kufuneka ulumke.”—USam.

KUSENOKWENZEKA ukuba nawe uyakuthanda ukubukela iividiyo zomculo. Ukuqala kwazo ukudlala kumabonwakude, zazingenabugocigoci buninzi yaye zazibiza imali encinane. Kodwa kwathi kwakubonakala ukuba ziyathandwa ngabantu yaye zenza iingeniso eninzi kwezomculo, kwafakwa ubugocigoci beenkcukacha ngokukhawuleza. Namhlanje yeyona nto ithandwayo kwezomculo yaye zithandwa kakhulu lulutsha. Kwamanye amazwe kukho izikhululo zikamabonwakude ezibonisa iividiyo zomculo kuphela!

Kodwa kutheni olunye ulutsha olufana noSam okhankanywe kweli nqaku lusithi kufuneka ulumke? Ngaba mhlawumbi kungenxa yokuba ezinye iividiyo zinokuba nempembelelo embi kuwe—mhlawumbi zonakalise ingqondo nemilinganiselo yakho yokuziphatha okanye zide zonakalise nolwalamano lwakho noMdali wakho? Mhlawumbi unokuthi umntu uyazibaxa izinto xa ebuza ngolo hlobo. Kodwa khawucinge, ukuba ubusiya kuqubha echibini okanye elwandle uze ubone iibhodi ezinesilumkiso esithi kuyingozi ukuqubha apho, ngaba ibiya kuba bubulumko ukuzibetha ngoyaba izilumkiso ezinjalo? Nakanye. Ngoko ke, kuya kuba bubulumko ukuqwalasela izilumkiso ngokuphathelele iividiyo zomculo.

Iingozi

Kufuneka uqonde ukuba oko ukubukelayo noko ukuphulaphulayo kunokuba nempembelelo kuwe! IBhayibhile ithi ukumkani wokuqala wakwaSirayeli, uSawule wayencedwa kukuphulaphula umculo—wayezithuthuzela ngawo. (1 Samuweli 16:14-23) Ngaba umculo unokuba nayo impembelelo engakhiyo? Incwadi ethi Rock and Roll—Its History and Stylistic Development ithi: “Umntu akanakuthi umculo unempembelelo enamandla kwezinye iimeko, kodwa ungabi nampembelelo kwaphela kwezinye. Ukuba siyaqonda ukuba umculo werock unempembelelo entle (njengoko unjalo), simele sivume ukuba unayo nembi (njengoko unjalo). Umntu ozingomb’ isifuba athi ‘Ndiyawuphulaphula umculo, kodwa awunampembelelo kum’ usisidenge okanye uvalekile.”

Ngokuphindaphindiweyo, iBhayibhile ithetha ngendlela iliso elinempembelelo ngayo kwiingqondo neentliziyo zethu. (IMizekeliso 27:20; 1 Yohane 2:16) Ngoko, ngokwenza iividiyo zomculo zibe yimifanekiso eshukumayo, abenzi beevidiyo babangela ukuba umculo ube nempembelelo ngakumbi kwabo baphulaphuleyo. Ziziphi izinto ezidla ngokusetyenziswa kule mifanekiso?

Ngokutsho kolunye uhlolisiso, kwiividiyo zomculo werock ezimalunga nama-57 ekhulwini kuboniswa imifanekiso yogonyamelo. Kwezimalunga nama-76 ekhulwini kuboniswa imifanekiso yeentlobano zesini. Olunye uhlolisiso olusandul’ ukwenziwa lubonisa ukuba kwiividiyo (ezibalisa ibali elithile) ezimalunga nama-75 ekhulwini, kuboniswa imifanekiso yesini, yaye kwezingaphezu kwesiqingatha kuboniswa ugonyamelo, ngokufuthi ugonyamelo olwenziwa kumabhinqa. Ngoko ke, ngaba ukubukela iividiyo ezinjalo kunokuba yingozi ngokwenene kuwe? Elinye iphephancwadi lithi “uhlolisiso oluye lwenziwa lubonisa ukuba iividiyo zomculo zinokuba nempembelelo kwindlela abakwishumi elivisayo abakugqala ngayo ukuba neentlobano zesini ngaphambi kwexesha okanye iintlobano zesini eziyingozi.” Yaye akukho mntu unokulikhanyela elokuba njengoko iimvumi zanamhlanje zizama ukugqwesa kunezinye, iividiyo zomculo zizama ukubonisa zonke iinkcukacha.

Enye ingcaphephe kwezemfundo yathi: “Abantu abaninzi bathi umculo abawuphulaphulayo—nabawubukela kwiividiyo zomculo—unempembelelo efanayo nomculo wamandulo . . . Kodwa kubonakala ngathi iimvumi ezingenantlonelo zibalaselisa ukungcola nobungendawo ukuze kuthengwe amacwecwe omculo.” Yaye iphephancwadi iChicago lithi ngabo babukela ijelo elithile elidlala iividiyo zomculo: “Babukela ungcelele lwemifanekiso engamanyala.”

Iphephancwadi iChicago lithetha ngevidiyo yomculo ebonisa “umfana ohleli kwikhawuntara ekwindawo yokutyela ejingisa intloko. Kuvela inxeba elibi entanyeni ize intloko yakhe iye kuwa.” Kuthiwa kwenye ividiyo kukho indoda ekhulula ihambe ze, emva koko ixobule inyama nezihlunu zayo. Ezinye izinto ezimanyumnyezi eziboniswa kwezi vidiyo kunzima nokuzibalisa.

Kanti abanye basenokukugxeka oku ngelithi, ezi vidiyo kuthethwa ngazo apha ziividiyo ezigabadeleyo yaye inkoliso yazo ayimbi kangako. Bambi basenokude bathi ngokokubona kwabo, akukho nto ihlasimlis’ umzimba okanye imanyumnyezi kwiividiyo zomculo. Kodwa ngaba oko akuthethi ukuba ukubukela ezi vidiyo ngokuphindaphindiweyo kuzenze buthuntu izazela zabo bantu? Umfana ogama linguCasey okhankanywe ekuqaleni, uyavuma: “Ukuba akuyikhethi into oyibukelayo, usenokude uziqhele izinto ezazikade zikothusa. Ungakuqondi wena oko, ufuna ukubukela ezinye izinto ezinik’ umdla yaye uyaziqhela ezo zazifudula zikothusa.”

Unokuba yintoni umphumo? Usenokungakwazi ukwenza izigqibo ezisengqiqweni. Ngenxa yokuba iingqondo zethu zinokuphenjelelwa lula zizinto ezingakhiyo, iBhayibhile isibongoza ukuba ‘silondoloze ubulumko bobuqili namandla okucinga.’ (IMizekeliso 3:21; 5:2) Omnye umphumo obuhlungu kukonakaliswa kobuhlobo bakho noYehova uThixo. Ngaba leyo asinto iyeyona ibalulekileyo kuwe? Ngoko ke, kufuneka ubulondoloze obo buhlobo ngokuphepha naluphi na uhlobo lokuzonwabisa olungafanelekanga. Unokukwenza njani oku?

Ukuzikhusela

Okokuqala, yiqonde into yokuba kuphosakele ukubukela izinto ezibonisa oko kugatywa ngokuphandle yiBhayibhile. (INdumiso 11:5; Galati 5:19-21; ISityhilelo 21:8) Xa ividiyo izukisa izinto ‘ezingabafanelanga abantu abangcwele’ umele uzimisele ukuyeka ukuyibukela. (Efese 5:3, 4) Kuyavunywa ukuba, ukutshintshela kwelinye ijelo—okanye ukumcima umabonwakude—kusenokungabi lula xa kudlala ividiyo ebangel’ umdla. Ngoko kufuneka uthandaze njengomdumisi owabhala la mazwi: “Dlulisa amehlo am angaboni oko kungento yanto.”—INdumiso 119:37.

Usenokukuphepha ukubukela iividiyo ezimanyumnyezi njengezo sithethe ngazo ngaphambilana. Noko ke, ezinye iividiyo zisenokungaqondakali. Umfanekiso obonisa isini usenokuthi gqi uze uphinde usithele ngokukhawuleza. Ngendlela echuliweyo nengacacanga kusenokusetyenziswa amazwi nemifanekiso ekhuthaza ukungcola. Sekunjalo, ukuba isazela sakho siyakukhathaza emva kokubukela ividiyo ethile, kusenokwenzeka ukuba loo vidiyo ayifanele ibukelwe ngamaKristu. Ngoko, yintoni enokukunceda ekwenzeni isigqibo xa ungaqinisekanga enoba kufanelekile kusini na ukuyibukela loo vidiyo?

Kakade ke, isigqibo sokubukela kwakho iividiyo zomculo sinokwenziwa nguwe nabazali bakho, yaye bona banembopheleleko yokwenza isigqibo ngoko umele ukubukele okanye ungakubukeli. (Efese 6:1, 2) Kodwa ukuba abazali bakho bayakuvumela ukuba ubukele iividiyo zomculo, akumele wenze isigqibo ngokusekelwe kwindlela ovakalelwa ngayo. AmaHebhere 5:14 asikhuthaza ukuba ‘siqeqeshe amandla ethu okuqonda’ ukuze sikwazi ‘ukwahlula okulungileyo nokubi.’ Amandla ethu okuqonda aqeqeshwa ngokufundisisa imigaqo yeBhayibhile, esinceda sikwazi ukwahlula okulungileyo nokubi ngokwembono kaYehova. Xa ucamngca ngaloo migaqo yeBhayibhile, uya kukwazi ukuyibona into eyingozi kwimpilo yakho yokomoya, kwanaxa kungekho mthetho ungqalileyo weBhayibhile ngokuphathelele umbandela othile.

Ngoko ke, yiyiphi imigaqo yeBhayibhile engqalileyo enokukunceda ngokuphathelele ukubukela iividiyo zomculo? Oku kuya kuxutyushwa kwixa elizayo.

[Amagama acatshulweyo akwiphepha 20]

“Umntu ozingomb’ isifuba athi ‘Ndiyawuphulaphula umculo, kodwa awunampembelelo kum’ usisidenge okanye uvalekile.”

[Imifanekiso ekwiphepha 21]

Ngaba ngokwenene unokubukela into engcolileyo ize ingabi nampembelelo kuwe?