Xa Umntwana Engakhulanga Ngendlela Efanelekileyo

“Ukukhula komntwana ngendlela efanelekileyo lelona lungelo labantwana lisisiseko.”—“IThe Hurried Child.”

MHLAWUMBI uya kuvuma ukuba bonke abantwana bafanele banandiphe ilungelo lokukhula ngendlela efanelekileyo nangokukhululekileyo ukusa kumlinganiselo othile. Sekunjalo, kulusizi ukuthi abantwana abaninzi abangamakhwenkwe nabangamantombazana abakufumani oko. Khawucinge nje ngamawaka okanye izigidi zezinto ezidla ngokunqwenelwa ngabantwana, abaye baphulukane nazo xa besiba ngamaxhoba emfazwe. Kwakhona, cinga ngabantwana abaphulukana novuyo lokuba ngabantwana ngenxa yokwenziwa amakhoboka okanye ngenxa yokuxhatshazwa.

Inkoliso yethu ayikwazi ukuyithelekelela indlela avakalelwa ngayo umntwana xa kunyanzeleka ukuba ahlale esitratweni kuba eziva enqabisekile xa elapho kunaxa esekhaya. Kanye ngexesha abafanele bafumane ngalo uthando nenkuselo, abo bantwana kufuneka bafunde indlela yokuzikhusela kubantu abakhohlakeleyo abafuna ukubaxhaphaza. Kula maxesha anzima siphila kuwo, abantwana abakwazi ukukhula ngendlela efanelekileyo.

“Ndinqwenela Ukuba Ngumntwana Kwakhona”

UCarmen, oneminyaka engama-22 ubudala, wakhula kabuhlungu.a Kwanyanzeleka ukuba yena nodadewabo bahlale esitratweni bebaleka uyise owayebaxhaphaza nonina owayengabakhathalelanga. Nakuba le ndlela ayephila ngayo la mantombazana yayiyingozi, akwazi ukuphepha iingxaki ezidla ngokwehlela abantwana abaninzi ababaleke ekhaya.

Sekunjalo, uCarmen usebuhlungu nangoku ngendlela awakhula ngayo, kuba akazikhumbuli ephathwa njengomntwana. Uthi: “Ndaba lusana emva koko ndaba neminyaka engama-22 ubudala. Ngoku nditshatile yaye ndinomntwana, kodwa ndinqwenela ukwenza izinto ezenziwa ngamantombazana aselula, njengokudlala oonopopi. Ndinqwenela ukuthandwa nokwangiwa ngabazali. Ndinqwenela ukuba ngumntwana kwakhona.”

Baninzi abantwana abakhula kabuhlungu njengoCarmen nodadewabo. Bahlala ezitratweni, yaye ngaloo ndlela babandezwa ilungelo lokukhula ngendlela efanelekileyo. Abaninzi kwaba bantwana babandakanyeka kwizenzo zolwaphulo-mthetho ukuze bakwazi ukuphila. Iingxelo ezivela kwimithombo yeendaba zibonisa ukuba abantwana babandakanyeka kwizenzo zolwaphulo-mthetho beselula ngeyona ndlela. Eyona nto iyenza ibe mbi nangakumbi le meko nantsi: Amantombazana amaninzi afumana abantwana esekwishumi elivisayo—eneneni, esengabantwana nawo.

Ingxaki Yoluntu Engaqondakaliyo

Akumangalisi ukuba, abantwana abaninzi begqibela ngokukhuliswa ngabanye abantu. Elinye inqaku lomhleli elalikwiphephandaba iWeekend Australian lathi: “Kukho enye ingxaki engaqondakaliyo kubantwana abangakhuliswa ngabazali babo. Abantwana abaninzi abaphuma kwiintsapho eziqhekekileyo abanyanyekelwa kakuhle.” Eli phephandaba lathi: “Abanye abantwana abakhuliswa ngabantu abangengobazali babo bahlala iinyanga, kwaneminyaka bengatyelelwa ngoonontlalo-ntle, ngoxa abanye bephuma kweli khaya baye kwelinye, bengafumani khaya lisisigxina.”

Kuthiwa enye intwazana eneminyaka eli-13 ubudala yahlala kumakhaya awahlukahlukeneyo angama-97 kwisithuba seminyaka emithathu—kwamanye aloo makhaya yayihlala ubusuku nje obunye. Ithi yayikhathazeka gqitha yile meko iziva ingamkelekanga yaye inganqabisekanga. Abantwana abaninzi abafana nale ntwazana, baye babandezwa ilungelo lokukhula ngendlela efanelekileyo.

Ngoko akumangalisi ukuba, abanolwazi ngalo mbandela besithi iyanda ingxaki yabantwana ababandezwa ilungelo lokukhula ngendlela efanelekileyo. Ukuba ungumzali, xa ufunda la mava alusizi unokuzigqala njengosikelelekileyo kuba uye wakwazi ukwakhela abantwana bakho ikhaya wakwazi nokubalungiselela izinto eziyimfuneko ebomini. Kodwa kukho nenye ingozi. Kwihlabathi lanamhlanje, abantwana abaninzi abaphulukani ngokupheleleyo nelungelo lokukhula ngendlela efanelekileyo. Maxa wambi banyanzelwa ukuba bakhule ngokukhawuleza. Kwenzeka njani oko, yaye kuba nayiphi imiphumo?

[Umbhalo osemazantsi]