Amaxhoba Amsulwa Angabantwana Abaxhatshazwayo

UEILENEa uthi, “Sendiza kugqiba iminyaka engama-40 ubudala. Kwaye nakubeni ingxaki yam yenzeka kwiminyaka engaphezu kwama-30 edluleyo, isandikhathaza. Ndiba nomsindo, ndiziva ndinetyala, yaye ndineengxaki zomtshato! Abantu bayafuna ukubonakalisa uvelwano, kodwa abakwazi.” Iyintoni ingxaki kaEilene? Waba lixhoba lokuxhatshazwa ngokwesini esengumntwana, yaye imiphumo iye yabonakala ingapheli kuye.

Ngokuqinisekileyo uEilene akayedwa. Uhlolisiso lubonisa ukuba inani elikhwankqisayo lamabhinqa​—⁠namadoda⁠—​liye laphathwa kakubi ngale ndlela.b Ngoko, ngokuqinisekileyo ekubeni kungaselonyathelo linqabileyo lehambo etenxileyo, ukuxhatshazwa kwabantwana ngokwesini kusisibetho esisasazekileyo, esinwenwela kuwo onke amaqela ezentlalo, ezoqoqosho, ezonqulo nawobuzwe.

Ngethamsanqa, inkoliso yamadoda nabafazi ayiyicingi nokuyicinga into yokuphatha kakubi umntwana ngale ndlela. Kodwa imbinana enobungozi inolu tyekelo lungekho ngqiqweni. Yaye ngokwahlukileyo koko kuthethwa ngabangenalwazi, bambalwa abantu ababonakala bengazinzanga engqondweni, abanotyekelo lokubulala nabangoongqikana nje esithubeni abaxhaphaza abantwana. Inkoliso yabo ngabantu abaye bahlakulela inkangeleko yangaphandle yokuphila kakuhle. Banelisa inkanuko yabo egqwethekileyo ngokuhlasela abantwana abangenakuzinceda, ababathembileyo nabangenakuzikhusela​—⁠ngokuqhelekileyo aba ngabantwana babo abangamantombazana.c Ekuhleni, basenokubonakala bebaphethe ngobubele nangothando. Xa bebodwa, bayabasongela, babadlakazelise, yaye babahlazise ngokubahlasela ngeendlela ezingcolileyo zesini.

Kuyavunywa ukuba kunzima ukuyiqonda into yokuba izinto ezimanyumnyezi ngolo hlobo zinokwenzeka kumakhaya amaninzi kangaka abonakala ephucukile. Phofu ke, nakumaxesha okubhalwa kweBhayibhile abantwana babesetyenziselwa “ukwanelisa ngelo xesha . . . inkanuko yesini.” (The International Critical Commentary; thelekisa uYoweli 3:⁠3.) IBhayibhile yakuxela kwangaphambili oku: “Ke, kwazi oku, ukuba ngemihla yokugqibela kuya kufika amaxesha anomngcipheko. Kuba abantu baya kuba ngabazithandayo . . . abangenabubele [“abangenaluthando lwemvelo olusuk’ entliziyweni,” NW] . . . abangenakuzeyisa, izibhoja, abangenakuthanda kulunga.” Ngoko ke, akufanele kusimangalise ukubona ukuxhatshazwa kwabantwana kusenzeka ngomlinganiselo omkhulu namhlanje.​—⁠2 Timoti 3:​1, 3, 13.

Ukuxhatshazwa ngokwesini ebuntwaneni kusenokungashiyi ziva emzimbeni. Yaye asingabo bonke abantu abaxhatshazwayo besebancinane ababonakalayo ukuba basentlungwini. Kodwa kunjengokuba umzekeliso wakudala wathi: “Nasekuhlekeni intliziyo inomvandedwa.” (IMizekeliso 14:13) Ewe, amaxhoba amaninzi aneziva ezendeleyo ezingokweemvakalelo​—⁠amanxeba angabonakaliyo nanobuzaza ngaphakathi. Noko ke, kutheni ukuxhatshazwa ngoxa usengumntwana kubangela umonakalo onjalo kwabanye? Kutheni le nto ukuhamba kwexesha kukodwa kungasoloko kuwapholisa amanxeba ako? Ekubeni le iyingxaki enkulu siyanyanzeleka ukuba sithethe ngayo. Liyinyaniso elokuba okunye koko kuza kufundwa ngako kusenokungathandeki​—⁠oku koba njalo ngokukodwa ukuba wakhe walixhoba lokuxhatshazwa usengumntwana. Kodwa qiniseka ukuba likho ithemba, unako ukuchacha.

[Imibhalo esemazantsi]