Impikiswano Ngokuphathelele UMoses
ZININZI izinto adla ngokuphikisana ngazo amaYuda, amaKristu namaSilamsi. Nakuba enezo zinto angavumelani ngazo, la maqela onqulo anento enye ewadibanisayo: anentlonelo enzulu ngendoda egama linguMoses. AmaYuda amgqala “njengoyena mfundisi wamaYuda uphum’ izandla”—uyise wohlanga lwamaYuda. AmaKristu amgqala njengalowo wandulela uYesu Kristu. AmaSilamsi agqala uMoses njengomnye wabaprofeti bawo bokuqala ababebalasele.
Ngaloo ndlela, uMoses ngomnye wawona madoda awaba nempembelelo ebantwini. Sekunjalo, kwisithuba seminyaka engaphezu kwenkulungwane, bekukho impikiswano ngokuphathelele uMoses phakathi kwabaphengululi nabefundisi. Abaninzi abaphikisi into yokuba uMoses wenza imimangaliso waza wakhokela amaSirayeli ekuphumeni eYiputa kuphela kodwa bakwaphikisa nokuba kwakha kwakho umntu onjalo. Incwadi ethi Moses—A Life ebhalwe nguJonathan Kirsch iqukumbela ngelithi: “Into esinokuyithetha ngomntu obizwa ngokuba nguMoses kukuba umntu ofana nalowo kuthethwa ngaye eBhayibhileni kusenokwenzeka ukuba wakha waphila ngaxa lithile kwindawo esingayaziyo mandulo phayaa, yaye kusenokwenzeka ukuba kukho ubaxo oluthile ngokuphathelele izinto awazenzayo yaye ukutyhubela iinkulungwane inkcazelo nenkolelo ephathelele le ndoda yanda ngokuthe ngcembe de yaphumela kuloo mntu ubalaseleyo nekuphikiswana ngaye, esifunda ngaye eBhayibhileni.”
Xa uyikha nje phezulu, le ngcamango isenokuvakala njengesengqiqweni. Ngokomzekelo, abahlalutyi bathi kukho ubungqina bezinto zamandulo ezimbiweyo obubonisa ukuba abantu ekuthethwa ngabo eBhayibhileni bakha baphila, njengoKumkani uYehu wakwaSirayeli kodwa abukho ubungqina bezinto zamandulo ezimbiweyo obubonisa ukuba uMoses wakha waphila. Noko ke, abukho ubungqina bokuba uMoses wayengumntu wasentsomini. Bambi bakha babuthandabuza ubukho babanye abantu ekuthethwa ngabo eBhayibhileni, njengoKumkani uBheleshatsare waseBhabhiloni noKumkani uSargon waseAsiriya, besithi yayingabantu basentsomini—de kwafumaneka ubungqina bezinto zakudala ezimbiweyo obubonisa ukuba babekho abantu abanjalo.
Umbhali uJonathan Kirsch usikhumbuza oku: “Intsalela efumanekayo xa kumbiwa izinto zakudala eziphathelele uSirayeli ekuthethwa ngaye eBhayibhileni inqabe gqitha kangangokuba ayimangalisi yaye ingenakuphikiswa into yokuba ngaphandle kweBhayibhile akukho mthombo wumbi onobungqina bokuba uMoses wakha waphila.” Ngokutsho kwalo kaKirsch, abanye bathi akunakwenzeka ukuba uMoses abe ngumntu nje othelekelelwayo, kuba “ibali elineenkcukacha nengxoxo eninzi kangaka, nelinenkcazelo eninzi kangaka . . . , akunakwenzeka ukuba likhiw’ entloko.”
Enoba ulikholwa okanye akunjalo, kusenokwenzeka ukuba wakha waziva ezinye zeziganeko ezehlela uMoses: ukudibana kwakhe noThixo etyholweni elitshayo, iMfuduko yamaSirayeli ekuphumeni kwawo kubukhoboka baseYiputa, ukwahlukana koLwandle Olubomvu. Kodwa ngaba sikho isizathu sokukholelwa ukuba ezi zinto zenzeka ngokwenene? Okanye ngaba uMoses ngumntu nje wasentsomini? Inqaku elilandelayo liyayiphendula le mibuzo ibangel’ umdla.