Okwenzeka Ehlabathini

◼ Ngowama-2007, eTshayina kwakukho “oosozigidigidi abaneedola zaseMerika abali-106, ukanti [ngowama-2006] babeli-15 kuphela, ngoxa ngowama-2002 kwakungekho nokuba abe mnye.”—ICHINA DAILY, ETSHAYINA.

◼ “Abemi baseIndiya abangabanyamekileyo abazali babo abalupheleyo banokuvalelwa entolongweni ngokomthetho welo omtsha omiselwe ngenxa yokuba kubonakala ngathi impucuko . . . ibangela abantu bangazikhathaleli izizalwana zabo ngokwahlukileyo kwindlela ekwakufudulwa kuphilwa ngayo kwelo.”—IREUTERS, EINDIYA.

◼ “Namhlanje, kwelaseNgilani inani lamaSilamsi liyalingana nelamaTshetshi.”—ITHE ECONOMIST, EBRITANI.

Imithi YaseSiberia Enezimbiwa Ezixabisekileyo

Kumahlathi aseSiberia “uyakwazi ukufumana igolide kwizikhondo zemithi ezibolileyo,” litsho njalo iphephancwadi laseRashiya iVokrug Sveta. Izazinzulu ezivela eUlan-Ude, eIrkutsk naseNovosibirsk zifumanise ukuba phantsi kwemithi yaseSiberia esoloko iluhlaza, ekhula kwiindawo ekwakulahlwa kuzo imvuthuluka yeentsimbi, kukho izimbiwa. Xa le mithi ibola ezi zimbiwa ziyavela. Kwitoni nje enye enemvuthuluka yezo ntsimbi ethatyathwe kwizikhondo ezibolileyo zale mithi, izazinzulu zaseSiberia zifumene iigram ezintlanu zeplatinum, neemiligram zegolide ezimalunga nama-200, neekhilogram ezintathu zesilivere.

Uncedo Lonyango Emingcwabeni

Abembi bamangcwaba baseOstreliya baye banikwa umatshini we-elektroniki wokuvuselela intliziyo engabethiyo (idefibrillator). Yintoni injongo yawo? ISun-Herald yaseSydney ithi kukunceda abazili abahlaselwa sisifo sentliziyo. USisenda Santos isithethi seSt. John Ambulance, eququzelela olu ncedo uthi: “Abantu bayathanda ukumelwa ziintliziyo emingcwabeni. Emngcwabeni kudla ngokubakho abantu abaninzi, abakhathazekileyo nabadla ngokufumbela kutshisa.” Lo matshini wentliziyo unemiyalelo erekhodiweyo namandla ombane yaye xa usiva ukuba intliziyo iza kuyeka ukubetha, uyayivuselela.

Uqhawulo-mtshato Lubangela Iindleko

Ukuntinga kwamanani oqhawulo-mtshato ehlabathini lonke kuchaphazela uqoqosho kuba izinto eziyimfuneko ekuphileni zisetyenziswa ngakumbi. Uhlolisiso lweProceedings of the National Academy of Sciences luthi: “Uqhawulo-mtshato lubangela ukuba kufuneke izindlu ezongezelelekileyo yaye kwikhaya ngalinye kuhlala abantu abambalwa, nto leyo ebangela ukuba izinto eziyimfuneko ekuphileni zisetyenziswe kakhulu. Ngenxa yoqhawulo-mtshato [eUnited States], ngowama-2005 kuphela, kwafuneka ukuba kongezelelwe amagumbi angama-38 ezigidi, iikilowatt-hours zombane ezingama-73 amawaka ezigidi, iilitha zamanzi ezisi-2,4 samawaka ezigidi, nto leyo ngeyingazange yenzeke ukuba izibini zazingaqhawulanga mtshato.” Ngowama-2000, iintsapho ezaba negalelo kwingxaki elolu hlobo eUnited States, zazisisi-1,6 sezigidi.

IBhayibhile Kwintloko Kanotaka

IScience Daily ithi izazinzulu zakwaSirayeli ziye zakwazi ukushicilela yonke “iTestamente Endala” ngesiHebhere kwiqhezu lesilicon “elingaphantsi kwentloko kanotaka.” Ukuze zikwazi ukwenza oku ziye zasebenzisa amasuntswana amancinane abizwa ngokuba ziigallium ions, ukuze zikopele amagama kwiqhezu legolide. UNjingalwazi u-Uri Sivan waseTechnion-Israel Institute of Technology uthi: “Ukwenziwa kwale Bhayibhile incinane kubonisa ukuba siyakwazi ukuzisebenzisa ngokunengenelo izinto ezincinane kakhulu.” Siza kutsho sikwazi “ukugcina inkcazelo kwizinto ezincinane kakhulu.”

[Inkcazelo Ngomfanekiso okwiphepha 30]

AP Photo/Ariel Schalit