Ngubani Owayenza Kuqala?
UMNTU wokuqala ukubonisa abantu iselfowuni yaba nguGqr. Martin Cooper ngowe-1973. Yayinebhetri, unomathotholo kwakunye nekhompyutha encinane. Abantu baseNew York basala bebamb’ ongezantsi xa babona lo kaCooper efowuna ngoxa ehamba esitratweni. Kodwa eyona nto yamncedayo enze le fowuni, kukuthi ngowe-1800, uAlessandro Volta aqale enze ibhetri enokuthenjwa. Ngaphezu koko, kwakusele kwenziwe ifowuni ngowe-1876, kwenziwa unomathotholo ngowe-1895 kwaza kwenziwa ikhompyutha ngowe-1946. Kodwa eyona nto yavulel’ indlela iselfowuni, kukwenziwa kwekhompyutha encinane ngowe-1971. Sekunjalo, sinokuzibuza ukuba zaziqala na ukubakho izixhobo zobugcisa bonxibelelwano?
Esona sixhobo sonxibelelwano sidla ngokuthathwa lula lilizwi lomntu. Kukho iineuron ezingaphezu kwesiqingatha seebhiliyoni kwinwebu yobuchopho ezilawula amalungu okuthetha kunye nezihlunu ezili-100, ubuxhakaxhaka obulawula ukusebenza kolwimi, imilebe, umhlathi, umqala nesifuba sakho.
Nayo indlebe yakho iyinxalenye yenkqubo yonxibelelwano. Indlebe itshintsha isandi sibe ngamaza ombane anokuqondwa lula bubuchopho. Ubuchopho bakho buyakwazi ukuhlolisisa izandi, nto leyo ekunceda ukwazi ukwahlula abantu ngokwamazwi abo. Kanti buyakwazi ukubala ukukhawuleza kwendlebe enye ukuva isandi ngaphambi kwenye buze bazi nokuba sivele kweliphi na icala. Ezi ke zizixhobo nje ezibini ezenza ukuba uve umntu omnye ngexesha nangona besenokuba baninzi abanye abathethayo.
Ngoko unxibelelwano olungasebenzisi zintambo (olukwenza wazi umntu okufowunelayo) kudala lwabakho. Laqala labonwa kwindalo.
[Umzobo/Imifanekiso ekwiphepha 3]
(Ukuba ufuna inkcazelo ehlahlelwe kakuhle, yiya kwimpapasho)
Ngowe-1800
Ibhetri enokuthenjwa
Ngowe-1876
Ifowuni
Ngowe-1971
Ikhompyutha encinane
Ngowe-1973
UGqr. Martin Cooper wenza ifowuni ephathwayo
[Inkcazelo]
Dr. Cooper and mobile phone: © Mark Berry
[Imifanekiso ekwiphepha 2]
Ngasekunene kwiphepha 2, ukusuka phambili ukuya emva, kukho ifoto eziphinda into eyenzekayo: uGuglielmo Marconi nobuxhakaxhaka bukanomathotholo wakhe; uThomas Edison neglobhu yakhe yokukhanyisa; uGranville T. Woods, owenza izixhobo zonxibelelwano; oonyana bakwaWright neWright Flyer yowe-1903.