Umabonwakude
KUTHE nje emva kokuba abantu befunde ukusasaza isandi, baqala bacinga nangokusasaza imifanekiso eshukumayo. Ukuze uluqonde ucelomngeni lokwenjenjalo, cinga nje ngendlela asebenza ngayo umabonwakude namhlanje.
Okokuqala, ikhamera ithatha umfanekiso ize iwuthumele kwisixhobo esikwaziyo “ukuwufunda,” kanye ngendlela owenza ngayo xa ufunda into ebhaliweyo. Kodwa ke, kunokuba sifunde imigca yoonobumba esephepheni, sifunda imigca yamachaphaza asemfanekisweni. Esi sixhobo sitshintsha oko sikubonayo kube yimitha yevidiyo enokuthunyelwa nakwenye indawo. Kubakho esinye isixhobo esitshintsha loo mitha ibe ngumfanekiso oshukumayo.
Kuthiwa indoda yaseSkotlani, uJohn Logie Baird yaba yeyokuqala ukubonisa indlela asebenza ngayo umabonwakude. Kwathi kwakucaca ukuba waphukelwa yimpilo, wayeka ukusebenza njengononjineli wombane waza waqalisa omnye umsebenzi awayenomdla kuwo esekwishumi elivisayo—indlela yokwenza umatshini owawuza kusasaza imifanekiso eshukumayo.
Ikhamera yalo kaBaird yayisebenzisa idisk (eyaqala yaba yibhokisi yokufaka iminqwazi) egqojozwe imingxuma emalunga nama-30. Njengoko ijikeleza le disk, le migqobo yayibona imigca elandelelanayo yemifanekiso ize ivumele ukuba ukukhanya kungene kwiseli yombane. Le seli yayivelisa imitha yevidiyo ethunyelwa kwisixhobo esithile. Kwesi sixhobo, le mitha iyandiswa ize ikhanyise enye idisk ejikelezayo evelisa umfanekiso. Olona celomngeni yayikukwenza ezi disk zihambelane. Ngoxa uBaird lo wayebil’ esoma esenza lo msebenzi, wayezixhasa ngokupolisha izihlangu.
UBaird wadlulisela imifanekiso yokuqala kamabonwakude isuka kwenye incam yegumbi lakhe eliseluphahleni ukuya kwenye ngo-Oktobha 2, 1925. Umntu wokuqala ukuvela kumabonwakude, yaba yenye inkwenkwe eyayothukile, eyayisebenza kwiofisi ekumgangatho ongezantsi neyahlawulwa imalana engephi. Ngowe-1928, uBaird wasasaza imifanekiso yokuqala kamabonwakude eyanqumla ulwandlekazi lweAtlantiki. Wathi akugaleleka eNew York, uJohn Baird, le ndoda ingazithembanga yaseSkotlani yaneentloni kukwamkelwa liqela elidlala izixhobo ekuthiwa ziibagpipe. Wayedumile ngokwenene. Kodwa ngaba wayengowokuqala ukusasaza imifanekiso eshukumayo?