Indalo Yaba Nayo Kuqala
“Yona kanye ingwamza emazulwini—iwazi kakuhle amaxesha ayo amisiweyo.”—Yeremiya 8:7.
KWIMINYAKA engaphezu kwama-2 500 eyadlulayo, uYeremiya wabhala ngengwamza efudukayo. Nanamhlanje, abantu basamangaliswa yindlela ezifuduka ngayo izidalwa, njengeentlanzi ekuthiwa ziisalmon ezikwazi ukudada kangangamawakawaka eekhilomitha kulwandlekazi zize ziphinde zibuyele kwindawo ezazizalelwe kuyo. Kanti, kukho nofudo lwaselwandle olukwazi ukudada imigama emide nolwalubeke amaqanda eIndonesia lwalandelwa kwaza kwafunyaniswa ukuba luhambe iikhilomitha ezingama-20 000 ukuya kunxweme lwaseOregon eUnited States. Ezi mfudo zidla ngokubuyela kwindawo ekwafanayo eIndonesia ukuya kubeka amaqanda.
Ezinye izidalwa ziyakwazi ukubuyela kwiindawo ezazizalelwe kuzo, buchule obo obumangalisa nangakumbi kunobo bezidalwa ezikwaziyo ukufumana indlela. Ngokomzekelo, abaphengululi bakhwelisa iintaka iialbatross ezili-18 kwinqwelo-moya bazisusa kwisiqithana esikumbindi woLwandlekazi lwePasifiki bazisa kwiindawo ezahlukahlukeneyo ezithe qelele kangangamawakawaka eekhilomitha baza bazindulula—ezinye bazishiya kwincam esentshona yolu lwandlekazi ngoxa ezinye bazishiya kwengasempuma. Kwisithuba nje seeveki ezimbalwa, ezininzi kwezi ntaka zazisele zigodukile.
Amahobe ebekhe athunyelwe kwiindawo angaziqhelanga ezithe qelele ngaphezu kweekhilomitha ezili-150 ngoxa edonywe kanobom okanye efakwe kwimigqomo ejikelezayo, kodwa emva kokujikeleza izihlandlo ezimbalwa, ebeye akwazi ukuqikelela indawo akuyo aze ajike agoduke aye kungena apho ahlala khona.
Amabhabhathane ekuthiwa ziimonarch asuka kwimimandla emikhulu yakuMntla Merika, ahamba ngaphezu kwamawakawaka eekhilomitha ukuya kutsho kummandla omncinane waseMexico. Nangona engazange aye eMexico ngaphambili, ayafika apho aye kuhlala kwimithi abebefikele kuyo ookhokho bawo kunyaka ongaphambili. Ukuba loo nto yenzeka njani, isabadida abaphengululi.
Ngoxa iinkqubo zabantu zokukhangela indlela zinokuxhomekeka kwiisatellite, kubonakala ngathi izilwanyana ezininzi zineendlela ezahlukeneyo zokukhangela indlela—ukususela ekuphawuleni izinto ezithile, zijonge nelanga ukuze zibone ummandla ozingqongileyo, amavumba athile kwanezandi. Unjingalwazi webhayoloji uJames L. Gould ubhala athi: “Izilwanyana ezixhomekeke kubuchule bokukhangela indawo eziya kuyo zixhotyiswe ngendlela efanayo. . . . Ziba neendlela ezahlukahlukeneyo nezikwaziyo ukuzitshintshatshintsha—kuxhomekeka ukuba yiyiphi eyona inika inkcazelo echanileyo.” Ukuntsonkotha kwenkqubo yokufumana indlela yezilwanyana kusabadida abaphengululi.