Imbono YeBhayibhile

Ngaba Kufanelekile Ukuthandaza “Kwiingcwele”?

UMarie noTheresa babezigqala “njengamaKatolika anyanisekileyo.” Babekholelwa “kwiingcwele.” UMarie wayekholelwa kwelokuba unokuthandaza kuzo xa efuna uncedo. UTheresa wayethandaza rhoqo “kwingcwele” ekhusela idolophana awayehlala kuyo. Wayethandaza “nakwingcwele” awathiywa ngegama layo.

NJENGOMARIE noTheresa, abantu abaninzi ehlabathini bathandaza “kwiingcwele” zabo ukuze bacele iintsikelelo. INew Catholic Encyclopedia ithi, “iingcwele zithethelela abantu, yaye ‘kuluncedo’ ukuzibongoza . . . ukuze zisicelele izinto kuThixo.”

Noko ke, uThixo unayiphi imbono ngalo mba? Ngaba uyayamkela into yokuba sithandaze “kwiingcwele” ukuze zisithethelele? Khawuqwalasele oko kuthethwa yiBhayibhile.

Ngaba Sifanele Sicele Uncedo “Kwiingcwele”?

Kwezinye iinguqulelo zeBhayibhile, igama lesiGrike eliguqulelwe ngokuthi “ingcwele” lithetha “ongcwele.” Kodwa ke, akakho umkhonzi othembekileyo kaThixo okhankanywe eBhayibhileni owakhe wathandaza “kwingcwele.” Ngoba? INew Catholic Encyclopedia ithi “imfundiso yokuthethelwa ziingcwele yaqalisa ngenkulungwane yesithathu.” Kwakusele kudlule iminyaka emalunga nama-200 emva kokufa kukaKristu. Ngoko ke, le mfundiso ayizange ize noYesu nababhali beBhayibhile abaphefumlelweyo abanikela ingxelo ngobulungiseleli bakhe. Sasiyintoni isizathu soko?

IBhayibhile isifundisa ngokuphindaphindiweyo ukuba sifanele sithandaze kuThixo kuphela, sithandaze egameni likaYesu Kristu. UYesu wathi: “Ndim indlela nenyaniso nobomi. Akukho bani uzayo kuBawo ngaphandle kokuza ngam.” (Yohane 14:6) Loo mazwi acace gca, ayavumelana nemfundiso kaYesu ekuMateyu 6:9-13. Xa wayebafundisa indlela yokuthandaza, uYesu wathi kubalandeli bakhe: “Ngoko ke, nina nize nithandaze ngale ndlela: Bawo wethu osemazulwini, malingcwaliswe igama lakho. . . . ” (Mateyu 6:9) Licacile elokuba, nguBawo wethu osemazulwini kuphela esimele sithandaze kuye. Oku kusekelwe kumgaqo osisiseko oseBhayibhileni.

Ukuthandaza Yenye Indlela Yokunqula

IThe World Book Encyclopedia ithi: “Umthandazo ubhekisela kumazwi neengcamango ezibhekiswa kuThixo, oothixo, oothixokazi okanye ezinye izinto ezinqulwayo. . . . Umthandazo yindlela yokunqula ebalulekileyo phantse kulo lonke unqulo ehlabathini.” (Akekeliswe sithi.) Zibuze, ‘Ngaba kufanelekile ukuguqa ngamadolo size sithandaze komnye umntu ngaphandle koMdali wethu okanye uMniki-bomi?’ (INdumiso 36:9) UYesu wathi: “Abanquli bokwenyaniso baya kumnqula uBawo ngomoya nenyaniso, kuba, eneneni, uBawo ufuna abanjalo ukumnqula.” (Yohane 4:23) Kwakhona iBhayibhile ithi, uMdali wethu ufuna “uzinikelo olupheleleyo.”—Duteronomi 4:24; 6:15.

Cinga ngomzekelo wompostile uYohane ongumKristu. Emva kokuba eboniswe imibono emangalisayo ebhalwe kwincwadi yeBhayibhile yeSityhilelo, emangalisiwe lo mpostile ‘wawa phantsi ukuba anqule phambi kweenyawo zengelosi’ eyayimbonise ezi zinto. Yathini loo ngelosi? Yathi: “Lumka! Ungakwenzi oko! Nam ndilikhoboka nje kuphela kunye nawe nabazalwana bakho . . . Nqula uThixo.” (ISityhilelo 22:8, 9) Kwakhona iBhayibhile ibethelela into yokuba sifanele sinqule uYehova uThixo kuphela.

Ngokuvisisana noko sele kukhankanyiwe, nguThixo kuphela ekuthiwa ‘nguMphulaphuli wemithandazo.’ (INdumiso 65:2) Ngaphezu koko, njengoSomandla, nguye kuphela onegunya, ulwazi namandla okuphendula nawuphi na umthandazo. (Yobhi 33:4) NoYesu Kristu wavuma ukuba zikho izinto angakwaziyo ukuzenza. (Mateyu 20:23; 24:36) Sekunjalo, uYesu Kristu unikwe igunya elikhulu, kuquka elo lokuba nguMthetheli woluntu.

Umthetheli Onovelwano

IBhayibhile ithi xa ithetha ngoYesu: “Uyakwazi kwanokubasindisa ngokupheleleyo abo basondela kuThixo ngaye, ngenxa yokuba usoloko ephila ukuze ababongozele.” (Hebhere 7:25) Ngamanye amazwi, uYesu unokuba nguMthetheli onovelwano kwabo “basondela kuThixo ngaye.” Oku akuthethi ukuba sifanele sithandaze kuYesu nokuba uza kudlulisa imithandazo yethu. Kunoko, kuthetha ukuba sithandaza kuThixo egameni likaYesu, ngaloo ndlela sibonisa ukuba siyaligqala igunya analo. Kutheni uYesu enguMthetheli ogqibeleleyo?

Esinye isizathu sikukuba, uYesu wayekhe waphila njengomntu, nto leyo emenza ukuba aziqonde kakuhle iimbandezelo abantu abatyhubela kuzo. (Yohane 11:32-35) Ukongezelela, wabonakalisa indlela abathanda ngayo abantu ngokunyanga abagulayo, ngokuvusa abafileyo nangokubanceda bafumane ulwazi ngoThixo. (Mateyu 15:29, 30; Luka 9:11-17) Wada waxolela izono zabantu. (Luka 5:24) Oku kusinik’ ithemba lokuba xa sisona, “sinaye umncedi kuBawo, uYesu Kristu, lowo ulilungisa.”—1 Yohane 2:1.

Simele sizabalazele ukuxelisa uthando novelwano lukaYesu. Liyinyaniso elokuba asinagunya lakuba ngabathetheli. Kodwa sinako ukubathandazela abanye. Eneneni, simele siqhutywe luthando ukuba senjenjalo. UYakobi wabhala: ‘Thandazelanani. Isikhungo somntu olilungisa, xa sisebenza, sinamandla amakhulu.’—Yakobi 5:16.

UMarie noTheresa bafunda loo nyaniso ixabisekileyo ngokuzihlolela ngokwabo oko kuseBhayibhileni. AmaNgqina kaYehova akucela ukuba wenze okufanayo. Kuba uYesu wathi, ‘abo banqula uThixo bamele banqule ngomoya nenyaniso.’—Yohane 4:24.

NGABA WAKHA WAZIBUZA?

● UYesu wathi ngubani esimele sithandaze kuye kuphela?—Mateyu 6:9.

● UYesu unaliphi igunya?—Hebhere 7:25.

● Ngaba sifanele sibathandazele abanye?—Yakobi 5:16.