Okwenzeka Ehlabathini

Ugqirha ngamnye eTanzania unyanga malunga nabantu abangama-64 000.—ITHE CITIZEN, ETANZANIA.

‘Kukho malunga nabantu abayibhiliyoni abangondlekanga yaye iUnited Nations Millennium Development Goal ayizi kukwazi ukufikelela usukelo lwayo lokunciphisa elo nani ngowama-2015.’—ISCIENCE, YASEUNITED STATES.

“Iinkampani ezili-100 ezenza izixhobo ehlabathini nezizezona zinkulu” zenze iibhiliyoni ezingama-R2 826 ngowama-2008, imali engaphezulu ngeebhiliyoni ezingama-R287 kunangowama-2007.—ISTOCKHOLM INTERNATIONAL PEACE RESEARCH INSTITUTE, YASESWEDEN.

Ngaba Ziintsholongwane Ezimbalwa?

Unjingalwazi weYunivesithi yaseNorthwest, eIllinois, eUnited States uThomas McDade uthi: “Ukukhulela kwindawo ecoceke kakhulu kunokukwenza ungenwe lula zizifo xa umdala.” Kolunye uhlolisiso olwaluthelekisa abantwana bakwiiPhilippines nabaseMerika, kwafunyaniswa ukuba abakwiiPhilippines babengenwa lula zizifo ngoxa besebancinane. Noko ke, ngokwahlukileyo koko bekulindelekile, xa sele bekhulile abantu bakwiiPhilippines baba neprotini encinane yokulwa neentsholongwane edla ngokwanda xa uhlaselwe sisifo. Sifunda nto apha? Ukukhulela kwindawo eneentsholongwane kunokukukhusela kwizifo ezibulalayo xa sele ukhulile.

Ukungakwazi Ukuziphatha Emsebenzini

Abaqeshi abaninzi baseFinland bamangaliswa lulutsha lwangoku olungayaziyo indlela yokuziphatha emsebenzini. UAnne Mikkola umphathi wendawo yokutyela wathi kudliwano-ndlebe olwenziwa yinkampani yezosasazo yaseFinland: “Olu lutsha lucinga ukuba umntu unokufika aze ahambe nanini na emsebenzini.” Kwakhona lukufumanisa kunzima ukuthobela imithetho yokuziphatha nokunxiba. Abaqashi kufuneka basoloko bekhumbuza abasebenzi ngendlela abafanele banxibe ngayo ingakumbi kwiindawo ekusetyenzwa ngabantu. Indlela ongahlonelwa ngayo umsebenzi ibonakala naxa abahlobo babasebenzi besiza kubutha emsebenzini.

Impikiswano Engomhlaba “Iyazinziswa”

Ukubangisana kweBangladesh neIndiya ngesiqithi esincinane esikuNxweme lwaseBengal ekugqibeleni kude kwaconjululwa—lulwandle. Lo mmandla ongahlali bantu obizwa ngamaIndiya ngokuba yiNew Moore Island nobizwa ngokuba yiSouth Talpatti ngabantu baseBangladesh awukho kwindawo ephakamileyo. Noko ke, imifanekiso yesatellite ibonisa ukuba kutshanje uye wagqunywa lulwandle. Unjingalwazi weUniversity School of Oceanographic Studies yaseCalcutta’s Jadavpur uSugata Hazra uthi: “Oko la mazwe angakhange akwazi ukukuphumeza kuye kwaconjululwa kukutshintsha kwemozulu.”