Ubuhle Nomtsalane Wehashe

“Ndawathanda ndiqala nje ukuwabona amahashe. Mahle yaye anomtsalane.”—UTOMASZ ONGUMFUYI WAMAHASHE.

ABANTU abaninzi bathi ihashe sesona silwanyana sihle emhlabeni ngenxa yomtsalane, amandla, nezinye iimpawu zalo. Mahle ngokwenene.

Ukutyhubela iinkulungwane abantu beendawo ezahlukahlukeneyo bebefuya iintlobo ezingafaniyo zamahashe. Uhlobo lwehashe olusulungekileyo lwaseArabhiya lugqalwa njengelona hashe lihle emhlabeni. Eli hashe lindlongondlongo, linamandla, linesantya, alikhawulezi lidinwe yaye likrelekrele nto leyo elenza lisetyenziswe kwezemidlalo.

Okubangel’ umdla kukuba ePoland, kuMbindi weYurophu kudala efuywa la mahashe. Abafuyi neengcali zala mahashe bathi awona angawodidi avela ePoland. Kutheni besitsho nje? Lo mbuzo neminye iye yabuzwa kubafuyi bamahashe nabanye abanolwazi ngawo.

Indlela Abalijonga Ngayo Abathandi Bamahashe

Makhe siqale sifunde okungakumbi ngeli hashe lisulungekileyo laseArabhiya. Bekusoloko kusithiwa eli hashe livela kuMbindi Mpuma. UTomasz ongumfuyi wamahashe uthi: “Kangangeenkulungwane abantu boMbindi Mpuma bebelondoloza ukusulungeka kweli hashe laseArabhiya. Eli hashe lavela ngenxa yokuzikhetha kwabo ngocoselelo iinkunzi namathokazi ababewadibanisa. Ngokuqhelekileyo, la mahashe aba ngwevu, abe bomvu bumdaka yaye ngamanye amaxesha aba mnyama.”

UŻaneta umfuyi wala mahashe uthi: “La mahashe mahle ngendlela engaqhelekanga, kuthiwa ngawona asulungekileyo yaye ngawona madala kwiintlobo zamahashe.” Awaziwa nje ngokuba ndlongondlongo kodwa akwaziwa ngenkalipho nangokungakhawulezi adinwe. Imiphunga nesifuba sawo esikhulu siwenza akwazi ukuhamba imigama emide.

Ukusuka EArabhiya Ukuya EPoland

Siye sabuza uTomasz, onefama yamahashe ukuba: “La mahashe afika njani ePoland?” Wathi: “Kusenokwenzeka ukuba afika nomthunywa wasebukhosini owayevela kwinkundla yabalawuli baseStambul ngenkulungwane ye-16. Kodwa into esiqiniseke ngayo kukuba la mahashe ebefuywe ePoland ukususela ngenkulungwane ye-18.” UIzabela Pawelec-Zawadzka, umfuyi ophum’ izandla wamahashe aseArabhiya uthetha ngendima eyadlalwa siSibonda uWacław Rzewuski. Njengoko wayenegunya kwinkcubeko yaseMpuma “waququzelela iphulo lokulanda amahashe eArabhiya” esizisa ali-137 eYurophu.

Inzondelelo kaRzewuski yakhokelela ekubeni kusekwe ifama yokuqala yala mahashe eJanów Podlaski, ekwiMpuma yePoland, ngonyaka we-1817. UTomasz uthi: “Ekuqaleni kwakubonakala ngathi izinto zihamba kakuhle. Abafuyi bamahashe babewanyamekela kakuhle. Kodwa iimfazwe zehlabathi ezimbini ezatshabalalisa iYurophu zaziphazamisa iifama zamahashe. Inkoliso yamahashe yafa, amanye abaleka okanye ebiwa.” Noko ke, emva kwemfazwe yehlabathi yesibini abafuyi baqala apho babeyeke khona.

Sithethanje la mahashe akho kwiifama ezingama-30 zasePoland. Indlela yokunyamekela la mahashe ebisetyenziswa kangangamakhulu amabini eminyaka iye yaphumelela. IPoland iye yaba yindawo eyaziwayo yala mahashe aseArabhiya, nto leyo eye yatsala iingcali nabathandi bala mahashe abasuka ehlabathini lonke besiza kwimiboniso yawo yaminyaka le nokuza kuwathenga.

Indlela Yokunyamekela Ihashe LaseArabhiya

Ukuze akhulise amahashe odidi nanomnombo osulungekileyo, umfama kufuneka alinyamekele kakuhle eli hashe. UMałgorzata omnye umfama uthi: “Ukunyamekela la mahashe ngumsebenzi onzima. Kufuneka siwanike ukutya okunesondlo la mahashe andlongondlongo ukuze ahlale enamandla yaye emahle. Amahashe asele eza kuzala kufuneka anyanyekelwe ngokukhethekileyo.”a Kukuphi ukutya okuwafaneleyo la mahashe?

UMałgorzata uhlabela mgama esithi: “Siqalisa usuku ngokuwanika ingca eyomileyo enesondlo nezakha-mzimba ezifunekayo. Ihabile exutywe neendiza kokona kutya kunesondlo; nerhasi nengqolowa zinesondlo. Kodwa la mahashe athanda ukutya ingca eluhlaza, iitapile, iminqathe nebeetroot. Ebusika abafuyi badla ngokuthenga ukutya okusele kuxutyiwe nokuneprotein eninzi. Amahashe aseArabhiya kukwafuneka akhothe ilitye letyuwa kuba liwanceda athomalalise ubundlongondlongo. Sekunjalo, akukho ukutya kwawo okuthengwayo okwedlula ingca yasemadlelweni. Amahashe kufuneka afumane amanzi acocekileyo ngalo lonke ixesha kuba akawaseli amanzi amdaka.”

Eli hashe kufuneka licocwe nasemzimbeni. Oku ukwenza ngokulihlamba, ngokuliphulula ngebrashi okanye ngesandla. Noko ke, uTomasz uthi kukho okongezelelekileyo: “Kubalulekile ukuzicoca yonke imihla iimpuphu zalo kuba oko kuthintela izifo ezahlukeneyo kuquka umhlaza. Kufuneka ubeke iliso ngokukhethekileyo kumehlo, impumlo, imilebe neendlebe zalo.” UŻaneta uhlabela mgama esithi: “Ukuze ihashe libe segazini lize libukeke, kufuneka libe nendawo ethe gabalala yokubaleka, isanti, udaka okanye ingca yokuziqika-qika. Xa ihashe libilile emva kokuba ligqiba kubaleka, kufuneka ligqunywe ngengubo lize licocwe.”

Iingcali zithi kubaluleka ukunyamekela iintswelo zehashe ngalinye. UMałgorzata uthi: “La mahashe ayabathanda abantu—athanda ukuphululwa nokwangiwa ngabantu. Xa umniniwo ewaphatha ngale ndlela ayamthemba. Ayadloba xa uwancumela, uwanga okanye uwapha ukutya okumnandi njengeminqathe okanye iswekile. Abathandi bamahashe bayakuvuyela ukuwanyamekela.” UTomasz uchaza indlela awathanda ngayo: “Ndawathanda ndiqala nje ukuwabona amahashe. Mahle yaye anomtsalane. Kodwa akakhawulezi akuthembe. Mna andithemba emva kweminyaka.”

Ikamva Lehashe

Ukususela mandulo, abantu bebemangaliswa bubuhle, isantya, amandla nobukrelekrele bamahashe, ingakumbi eli laseArabhiya yaye bakha ubuhlobo kunye nalo. Okubuhlungu kukuba, abantu baye babusebenzisa obo buhlobo ukuze basebenzise amahashe ezimfazweni apho kuye kwafa amakhulukhulu awo. Noko ke, xa kulawula uBukumkani bukaThixo abantu baya kuwasebenzisela injongo efanelekileyo amahashe, ukuzukisa uMdali wabo, uYehova uThixo.

[Umbhalo osemazantsi]

[Umfanekiso okwiphepha 15]

Imazi nenkonyane

[Imifanekiso ekwiphepha 16]

Ukunyamekela Ihashe LaseArabhiya Kuquka

1. Ukubrasha uboya balo

2. Ukucoca iimpuphu

3. Ukulithanda

[Umfanekiso okwiphepha 17]

Iinkunzi zamahashe zidlala ekhephini