Ngaba Ufanele Uhlafune Ibetel Nut?

UMNTU onobubele ohamba esitratweni kuMzantsi Asiya uyancuma kuze kuvele amazinyo amnyama namathe akhe abomvu krwe okwegazi. Emva koko uyatshica esitratweni eshiya isisihla esibomvu esenyanyekayo. Lo mntu uhlafuna ibetel nut.

Ukusuka eMpuma Afrika, ePakistan naseIndiya ukutyhubela uMzantsi-mpuma weAsiya ukusa ePapua New Guinea naseMicronesia bafikelela kumakhulu ezigidi abantu abasebenzisa ibetel-nut—malunga ne-10 ekhulwini labo bonke abemi bomhlaba. Abantu abathengisa ibetel-nut, maxa wambi bekunye nabantwana babo, badla ngokumisa iitafile zabo kwiimarike zikawonke-wonke nasezitratweni. Abanye bakhanyisa iindawo abathengisela kuzo ngezibane eziyimibalabala—kubekho neentokazi ezinxibe impahla evez’ umzimba—ukuze batsale abathengi.

Ehlabathini lonke ishishini lebetel-nut lingenisa iibhiliyoni zeerandi. Yintoni kanye le betel nut? Kutheni ihlafunwa ngabantu abaninzi kangaka? Lo mkhwa uyichaphazela njani impilo yabo? Ithini iBhayibhile ngawo? Abo bayihlafunayo banokwahlukana njani nayo?

Yintoni Ibetel Nut?

Le betel-nut sisiqhamo seareca palm (betel palm), isityalo esifumaneka kwiPasifiki nakuMzantsi-mpuma weAsiya. Igama elithi betel livela kwisityalo esahlukileyo ibetel-pepper. Abantu abahlafuna ibetel-nut basongela isiqhamo seareca kwigqabi lebetel-pepper baze bafake nentwana yekalika. Ikalika inceda ekuveliseni ialkaline kwezi zityalo. Abanye bayivanga ngezinongo, icuba okanye ezinye izinto eziyenza ibe nencasa.

Lo mxube ubatsho bavuze amathe abomvu. Ngenxa yoko, abantu bayo bahlala betshica, naxa bekhwele ezimotweni de batshicele nabantu abadlula ngendlela!

Lo Mkhwa Uyingozi!

IOral Health ithi: “Iareca kudala yasetyenziswa yaye ibisoloko iyinxalenye yenkcubeko nonqulo lwabantu. Abantu bacinga ukuba ayinabungozi yaye bathi baziva kamnandi yaye befudumele emva kokuyihlafuna . . . Noko ke, ubungqina bubonisa ukuba liyingozi.” Njani?

Amaziko alwa neziyobisi, athi esinye sezakhi zebetel nut siyakhobokisa. Eneneni, abanye abantu bahlafuna iibetel nut ezingama-50 ngosuku! Akubi kudala amazinyo agqole kulandele izifo zeentsini. IOral Health ithi umlomo weengedle ude ujike ube nebala elimdaka uze ushwabane. Zinokude zibe nesifo “sokubola . . . kweentsini” ekuthiwa yioral submucous fibrosis.

Ukuhlafuna ibetel-nut kukwanxulunyaniswa nomhlaza womlomo ekuthiwa yioral squamous cell carcinoma enokufunyanwa nakumva womqala. Ukwanda komhlaza womlomo kubantu abadala kuMzantsi-mpuma Asiya kubonakala kukungqina oku. ETaiwan abantu abamalunga nama-85 ekhulwini kwabo banomhlaza womlomo ngabo bahlafuna ibetel nut. Ukongezelela koko, iThe China Post ithi: “Inani labantu abanomhlaza womlomo eTaiwan—esinye sezifo ezilishumi eziphambili kwezibulala abantu kwelo—liye landa ngokuphindwe kane kule minyaka ingama-40 idluleyo.”

Le meko iyafana nakwezinye iindawo. IPapua New Guinea Post-Courier ithi: “Ngokutsho kwePNG Medical Society eyona nto ithanda ukuhlafunwa ngabantu basePapua New Guinea, ibetel nut ibulala ubuncinane abantu abangama-2 000 ngonyaka yaye inegalelo kwiingxaki ezininzi zezempilo.” Omnye ugqirha nokwangumbhali ngezonyango uthi: “Imiphumo yokuhlafuna ibetel nut iphantse ifane naleyo yokutshaya, iquka isifo sentliziyo.”

Ithini Yona IBhayibhile?

IBhayibhile asiyoncwadi yezonyango ibe ayithethi ngokuthe ngqo ngokuhlafuna ibetel-nut. Noko ke, inemigaqo emininzi esinceda sihlale sicocekile, sisempilweni yaye siphila ubomi obubhetele. Cinga ngezi vesi zilandelayo kunye nemibuzo eziyiphakamisayo.

“Zintanda, masizihlambulule kuko konke ukudyobheka kwenyama nokomoya, sigqibelelisa ubungcwele sisoyika uThixo.” (2 Korinte 7:1) ‘Yinikeleni imizimba yenu ingcwele, yamkelekile kuThixo.’ (Roma 12:1) Ngaba umntu unokuba ngcwele okanye acoceke emehlweni kaThixo ukuba ungcolisa umzimba wakhe ngokuhlafuna ibetel nut?

“Ngaye [uThixo] sinobomi.” (IZenzo 17:28) “Sonke isipho esilungileyo naso sonke isipho esigqibeleleyo sivela phezulu.” (Yakobi 1:17) Ubomi sisipho esixabisekileyo esivela kuThixo. Ngaba umntu onemikhwa enokumbangela izifo uyasixabisa esi sipho?

“Akukho bani unokukhonza iinkosi ezimbini.” (Mateyu 6:24) “Andiyi kuziyekela ndilawulwe nayintoni na.” (1 Korinte 6:12) Ngaba umntu ofuna ukukholisa uThixo unokuyekelela akhotyokiswe ngumkhwa ongacocekanga ulawule ubomi bakhe?

“Uze umthande ummelwane wakho njengawe siqu.” (Marko 12:31) “Uthando alusebenzi bubi kummelwane.” (Roma 13:10) Ngaba besiya kuba sibonisa uthando xa sisuka sitshice amathe angcolileyo nabomvu kwindawo ezihamba abantu?

Ekugqibeleni, ‘sivuna oko sikuhlwayelayo.’ (Galati 6:7, 8) Lo ngumthetho wendalo ongenakuphikiswa. Ukuba sihlwayela imikhwa emibi, siya kuvuna imiphumo emibi. Kodwa xa siphila ngendlela afuna ngayo uThixo equka ukuba nemikhwa emihle, asiyi kuvuna nje okulungileyo kuphela kodwa siya konwaba ngonaphakade. Ukuba uyingedle yebetel nut ube ufuna ubomi obulungileyo ngokwenza okuhle emehlweni kaThixo, unokuwoyisa njani lo mkhwa? Thandaza uze uthabathe la manyathelo mathathu asoloko eluncedo.

Amanyathelo Amathathu Okwahlukana Nalo Mkhwa

1. Zimisele. Ukuze wahlukane nomkhwa ombi kufuneka ube nento ekuqhubayo, kunokwazi nje ukuba uyingozi kwimpilo yakho. Ngapha koko, abantu abaninzi baqhubeka behlafuna ibetel-nut, betshaya yaye besebenzisa iziyobisi ngoxa besazi ukuba babeka esichengeni impilo nobomi babo. Ukuze uzimisele ngakumbi, unokufunda eBhayibhileni ngoMdali nangendlela akuthanda ngayo. EyamaHebhere 4:12 ithi: “Ilizwi likaThixo liphilile, linamandla.”

2. Cela uncedo kuThixo. UYesu wathi: “Qhubekani nicela, niya kunikwa; qhubekani nifuna, niya kufumana; qhubekani ninkqonkqoza, niya kuvulelwa. Kuba wonk’ ubani ocelayo uyamkela, nalowo ufunayo uyafumana, nalowo unkqonkqozayo uya kuvulelwa.” (Luka 11:9, 10) Xa uThixo oyinyaniso, uYehova ekubona uthandaza ngokunyaniseka, ucela uncedo namandla akayi kuzivala iindlebe zakhe. Eyoku-1 kaYohane 4:8 ithi: “UThixo uluthando.” Umpostile uPawulos ongumKristu wazibonela olo thando. Wabhala: “Ezintweni zonke ndinamandla ngenxa yalowo undomelezayo.”—Filipi 4:13.

3. Cela uncedo kwabanye. Abantu ophila nabo bangakuphembelela ekwenzeni okulungileyo okanye okubi. IMizekeliso 13:20 ithi: “Ohamba nezilumko uya kuba sisilumko naye, kodwa osebenzisana neziyatha uya kuhlelwa bububi.” Ngoko bakhethe ngobulumko abahlobo bakho! Kwabo bangamaNgqina kaYehova namhlanje baninzi ababehlafuna ibetel-nut. Kodwa ngokunxulumana nabazalwana babo nokufunda iBhayibhile atsho akwazi ukoyisa lo mkhwa ungcolileyo.

[Ibhokisi/Imifanekiso ekwiphepha 24, 25]

BAWOYISA LO MKHWA

UVukani! ukhe wancokola nabantu abahlanu ababekade behlafuna ibetel nut baza bayiyeka. Khawuve ukuba bathini.

Kwakutheni ukuze uhlafune ibetel nut?

UPauline: Ndayifundiswa ngabazali bam ndisengumntwana. Yayiqhelekile loo nto kwilali yam, ePapua New Guinea.

UBetty: Utata wandinika yona ndiseneminyaka emibini ubudala. Ndathi ndisiba kwishumi elivisayo, ndaba sendiphatha inqwaba yayo naphi na apho ndikhoyo! Ndandisele ndilikhoboka layo kangangokuba ndandixukuxa ngayo ukuvuka kwam.

UWen-Chung: Ndayiqala ndineminyaka eli-16 ubudala. Yayikwenza wamkeleke yaye uhlonelwe.

UJiao-Lian: Ndandiziphilisa ngokuthengisa yona. Ekubeni ndandifuna ishishini lam liphumelele, kwakufuneka ndiyingcamle ukuze ndiqiniseke ukuba isemagqabini. Yaqala apho ke inkathazo.

Lo mkhwa wayichaphazela njani impilo yakho?

UJiao-Lian: Umlomo, amazinyo nemilebe yam yajika yabomvu okwegazi. Ndiba neentloni xa ndijonga iifoto zelo xesha. Nangoku umlomo wam ukhe ube nezilonda.

UPauline: Ndandidla ngokuba nezilonda emlonyeni, ndicatshuzelelwe yintliziyo ndize ndihambise.

UBetty: Ndandibhitye ndingumcinga. Amazinyo am emabi, maxa wambi ndiwahlambe ngesteel wool.

USam: Ndandidla ngokuhambisa yaye ndinesifo seentsini. Ngoku ndinezinyo elinye kuphela! Kuyabonakala ukuba akuzange kundincede ukuwahlamba ngesteel wool.

Yintoni eyakunceda wahlukana nalo mkhwa?

UPauline: EBhayibhileni kweyesi-2 kwabaseKorinte 7:1 ndafunda ukuba uThixo ufuna ‘sizihlambulule kuko konke ukudyobheka kwenyama.’ Ndagqiba ekubeni ndilwe nzima ukuze ndikholise uMdali wam.

USam: Ndandifuna ukuba umoya oyingcwele kaYehova uThixo usebenze kum, ngoko ndathandaza ndicela ukuba uYehova andincede ndoyise lo mkhwa. Wayiphendula imithandazo yam. Ngoku sekudlule iminyaka emalunga nama-30 ndayekayo ukuhlafuna ibetel nut.

UJiao-Lian: Xa ndandifunda iBhayibhile ndabona amazwi athi: “Hlambululani izandla zenu, nina boni.” (Yakobi 4:8) La mazwi aba ngathi atsho kum. Ngaba yayiza kufaneleka into yokuhlafuna nokuthengisa ibetel nut, ngoxa ndisazi ukuba iyingozi? Ngoko nangoko ndagqiba ekubeni ‘ndihlambulule izandla zam’ kulo mkhwa ungcolisa inyama uze undixabanise noThixo.

Kukuncede njani ukwahlukana nalo mkhwa?

UWen-Chung: Ndaqalisa ukuhlafuna ibetel nut kuba ndandifuna ukwamkelwa ngoontanga. Ngoku ndinolwalamano olungenakuthelekiswa nanto, ndingumhlobo kaYehova kunye nabazalwana nodade endikhonza nabo.

USam: Ngoku ndingumqabaqaba—ngokwenyama nangokomoya. Ekubeni imali yam ndingasayisafazi kwimikhwa emibi ndiyakwazi ukondla intsapho yam.

UPauline: Ndakhululeka yaye ndicocekile. Amazinyo am amhlophe yaye omelele. Indlu negadi yam zicocekile akusathanga saa amaxolo ebetel-nut nezisihla zamathe abomvu.

UBetty: Ndinesazela esicocekileyo yaye ndisempilweni. Ndiyititshala esikolweni ngoxa ndishumayela iindaba ezilungileyo ngokusisigxina.

[Imifanekiso]

UBetty

UPauline

UWen-Chung

UJiao-Lian

USam

[Umzobo/Imifanekiso ekwiphepha 23]

(Ukuba ufuna inkcazelo ehlahlelwe kakuhle, yiya kwimpapasho)

Ukuba yingedle yebetel-nut kunokubangela iingxaki zempilo ezinzulu

Amazinyo agqolileyo nesifo seentsini

Isifo somlomo isubmucous fibrosis

Isifo somlomo isquamous cell carcinoma

[Umfanekiso okwiphepha 22]

Ibetel nut esongelwe ngegqabi lebetel-pepper