Icandelo 3
Indlela Esinokwazi Ngayo Ukuba UThixo Ukho
1, 2. Nguwuphi umgaqo osinceda sifumanise enoba uThixo ukho?
ENYE indlela yokufumanisa enoba uThixo ukho kukusebenzisa lo mgaqo owaziwa ngokubanzi: Okwenziweyo kufuna umenzi. Okukhona into eyenziweyo isiba yentsonkothileyo, kokukhona umenzi wayo efanele ukuba nobuchule ngakumbi.
2 Ngokomzekelo, khawujonge nje kwikhaya lakho. Iitafile, izihlalo, iidesika, oomandlalo, iimbiza, iipani, iipleyiti nezinye izinto zokutya zonke zifanele zibe nomenzi, njengoko kunjalo ngeendonga, imigangatho neesilingi. Kanti, ngokwentelekiso ezo zinto kulula ukuzenza. Ekubeni izinto ekulula ukuzenza zifanele zibe nomenzi, alikho ngqiqweni na elokuba kufuneka umenzi ode wakrelekrele ngakumbi ukuze enze izinto ezintsonkothileyo?
Indalo Yethu Eyoyikekayo
3, 4. Indalo iphela isinceda njani sazi ukuba ukho uThixo?
3 Iwotshi ifanele ibe nomenzi wayo. Kuthekani ke ngenkqubo yethu enkulu gqitha yazo zonke izinto ezingqonge ilanga nentsonkothe ngakumbi, iLanga kunye nezinye izijikelezi-langa ezilijikeleza ngolungelelwano olugqithiseleyo ukutyhubela iinkulungwane? Kuthekani ngomnyele owoyikekayo esiphila kuwo, ekuthiwa nguMnyele Wezulu, neenkwenkwezi zawo ezingaphezu kwamawaka ali-100 ezigidi? Ngaba ngabusuku buthile ukhe wanqumama waza waphos’ amehlo kuMnyele Wezulu? Ngaba wawuchukumisekile? Ngoko khawucinge ngendalo iphela ephangalele ngokumangalisayo equlethe amawaka ezigidi eminye iminyele angenakubalwa anjengoMnyele wethu Wezulu! Kwakhona, ukutyhubela iinkulungwane izinto ezisesibhakabhakeni bezihamba ngendlela enokuthenjwa ngokokude zifaniswe neewotshi ezilibambayo ixesha.
4 Ukuba iwotshi, ngokwentelekiso ekulula ukuyenza, ibonisa ukuba kukho umenzi weewotshi, ngokuqinisekileyo indalo entsonkothe ngakumbi neyoyikekayo ibonisa ukuba inomyili nomenzi. Kungoko iBhayibhile isimema ukuba ‘siphakamisele amehlo ethu phezulu, sibone,’ ize yandule ibuze oku: “Ngubani na owadala ezi zinto?” Impendulo ithi: “[NguThixo] okhupha umkhosi wazo ngamaqela, uzibiza zonke ziphela ngamagama, ngenxa yobukhulu bokomelela, ekhaliphile ngamandla; akusali nanye.” (Isaya 40:26) Ngaloo ndlela, indalo ikho ngenxa yobukho bamandla angabonakaliyo, alawulayo nakrelekrele—uThixo.
Umhlaba Uyilwe Ngendlela Eyahlukileyo
5-7. Ziziphi izibakala ngomhlaba ezibonisa ukuba wawunoMyili?
5 Okukhona izazinzulu zifunda ngomhlaba, kokukhona ziya ziphawula ukuba uyilwe ngendlela eyahlukileyo ukuze abantu bahlale kuwo. Ukumgama nje ofanelekileyo ukusuka elangeni ukuze ufumane ukukhanya nobushushu obufanelekileyo. Kanye ngonyaka ujikeleza ilanga, ngomlinganiselo kanye ofanelekileyo wokuthambeka, nto leyo ebangela ukuba kubekho amaxesha onyaka kwimimandla emininzi yomhlaba. Kwakhona umhlaba ujikeleza kwiasi yawo isihlandlo ngasinye seeyure ezingama-24, ubangela kubekho ukukhanya nobumnyama rhoqo. Kukho umoya oneegesi ezixutywe kakuhle ukuze sibe nokuphefumla yaye sikhuselwe kwimitha eyingozi yelanga esuka esibhakabhakeni. Kwakhona unamanzi nomhlaba obalulekileyo nofunekayo ukuze kulinywe ukutya.
6 Ukuba bebengekho bonke abo thunywashe, nabanye, besebenzisana, ngebungekho ubomi. Ngaba konke oko kwabakho ngengozi? IScience News ithi: “Kubonakala ukuba iimeko ezilungelelene ngolo hlobo bekungenakufane kwenzeke ukuba zizivelele ngamabona-ndenzile.” Nakanye, bekungenakwenzeka. Zayilwa ngenjongo nguMyili obalaseleyo.
7 Ukuba ubungene kwindlu entle waza wafumanisa ukuba kukho intabalala yokutya, inezinto zokwenza kufudumale nezokupholisa umoya ezisemgangathweni ophakamileyo, inemibhobho yamanzi esebenza kakuhle, ubungagqiba ngelithini? Ngaba ubungagqiba ngelithi konke oko kwasuka nje kwazivelela? Akunjalo, ngokuqinisekileyo ubungagqiba ngelithi umntu okrelekrele wakuyila waza wakwenza ngocoselelo olukhulu. Nomhlaba wayilwa waza wenziwa ngocoselelo olukhulu ukuba ube noko abemi bawo bakufunayo, yaye untsonkothe ngakumbi kwaye unazo zonke izinto ukudlula nayiphi na indlu.
8. Yintoni enye ekhoyo emhlabeni ebonisa inkathalo yothando uThixo anayo ngathi?
8 Kwakhona, cinga ngentaphane yezinto ezibangela ukuba kuyolise ngakumbi ukuphila. Khawuphos’ iliso nje kwiintlobo ngeentlobo ezininzi zeentyatyambo ezinemibala eqaqambileyo nevumba lazo elimnandi elithandwayo ngabantu. Kukwakho neentlobo ezahlukahlukeneyo zokutya okuluncuthu gqitha. Kukho amahlathi, iintaba, amadike, nezinye izinto zendalo ekuluyolo ukuzijonga. Kwakhona, uthini ngokutshona kwelanga okubukekayo nokubangela uthi chatha umlinganiselo esibunandipha ngawo ubomi? Yaye xa kusiziwa kwizilwanyana, ngaba asiyoliswa zizimbo zokudlala nokuthandeka nje kwemvelo kweenjana, amantshontsho ekati, namanye amathole ezilwanyana? Ngoko emhlabeni kunyakazela izinto ezininzi ezimangalisayo ezingafuneki nganto ekuzimaseni ubomi. Ezi zibonisa ukuba umhlaba wayilwa ngenyameko yothando, kucingwa ngabantu, ukuze singapheleli nje ekuphileni kodwa sibunandiphe ubomi.
9. Ngubani owenza umhlaba, yaye kwakutheni ukuze awenze?
9 Ngoko ke, isigqibo esisengqiqweni kukumothulel’ umnqwazi uMniki wazo zonke ezi zinto, njengoko wenzayo umbhali weBhayibhile owathetha oku ngoYehova uThixo: “Wena ulenzile izulu nehlabathi.” Ngayiphi injongo? Unikela impendulo ngokuchaza uThixo ‘njengoMenzi wehlabathi, uMseki walo, yena walizinzisayo, engalidalelanga ukuba kube senyanyeni, owalibumbayo ukuba limiwe.’—Isaya 37:16; 45:18.
Iseli Ephilileyo Emangalisayo
10, 11. Kutheni iseli ephilileyo imangalisa kangaka nje?
10 Kuthekani ngezinto eziphilileyo? Ngaba zona akufuneki zibe nomenzi? Ngokomzekelo, khawuqwalasele iinkalo ezimbalwa ezimangalisayo zeseli ephilileyo. Kwincwadi yakhe ethi Evolution: A Theory in Crisis, ingcali yebhayoloji engeemolekyuli uMichael Denton ithi: “Kwaneyona nkqubo ilula yazo zonke iinkqubo eziphilileyo ezisemhlabeni namhlanje, iiseli zebhakteriya, zizinto ezintsonkothe gqitha. Nangona iiseli zeyona bhakteriya incinane zincinane ngokumangalisayo, . . . ngokungathi kunjalo nganye ingumzi-mveliso wezinto ezincinane ngokwenene onamawakawaka amasuntswana ayilwe kakuhle enkqubo enobugocigoci yeemolekyuli . . . entsonkothe ngakumbi kunawo nawuphi na umatshini owenziwe ngumntu yaye ayinakuthelekiswa nanto ngokupheleleyo kwizinto ezingaphiliyo.”
11 Ngokuphathelele inkcazelo ecwangcisiweyo yemfuza ekwiseli nganye, uthi: “Amandla eDNA okugcina inkcazelo awodlula lee amandla ayo nayiphi na enye inkqubo eyaziwayo; isebenza kakuhle gqitha kangangokuba ubunzima [weight] bayo yonke inkcazelo efunekayo ukuchaza ngokuchanileyo zonke iinkcukacha zomzimba onobugocigoci njengowomntu bungaphantsi kweegram eziliqhezu elingamawakawaka ezigidi. . . . Xa zithelekiswa nomlinganiselo wobukrelekrele nokuntsonkotha okubonakaliswa yinkqubo yeemolekyuli zobomi, nezona zinto [esizivelisileyo] zenkqubela zibonakala zikukupuca. Sizibona singento yanto.”
12. Sathini isazinzulu ngemvelaphi yeseli?
12 Lo kaDenton walek’ umsundulo ngokuthi: “Olona hlobo lulula nolwaziwayo lweseli luntsonkothe gqitha kangangokuba akunakwenzeka ukwamkela into yokuba into enjalo yasuka nje yazidibanisa ngequbuliso ngamabona-ndenzile nangendlela engakholelekiyo.” Yayimele ibe nomyili nomenzi.
Ubuchopho Bethu Obumangalisayo
13, 14. Yintoni ebangela ukuba ubuchopho bumangalise ngakumbi kuneseli ephilileyo?
13 Sandula ke esi sazinzulu sithi: “Ngokuphathelele oku kuntsonkotha, iseli enye asiyonto xa ithelekiswa nenkqubo enjengobuchopho besilwanyana sodidi lwezanyisayo. Ubuchopho bomntu buneeseli zemithambo-luvo ezimalunga namawaka alishumi ezigidi. Iseli nganye yomthambo-luvo isebenzisa imicu yothungelwano ethelekelelwa phakathi kwamawaka alishumi namawaka alikhulu ethi iqhagamshelane ngawo nezinye iiseli zemithambo-luvo ezisebuchotsheni. Zizonke iindlela zothungelwano kubuchopho bomntu zisondela . . . kwizigidi eziliwaka lezigidi.”
14 Lo kaDenton uhlabela mgama esithi: “Kwanokuba isinye ekhulwini seendlela zothungelwano olusebuchotsheni besilungelelaniswe ngokungqalileyo, oku bekusaya kuthetha ukuba kukho inkqubo entsonkothe ngakumbi yothungelwano olungqalileyo kunazo zonke iinkqubo zoqhagamshelwano eziseMhlabeni.” Wandula ke abuze oku: “Ngaba nayiphi na inkqubo yokwenzeka kwezinto ngamabona-ndenzile ibingaze ihlanganise iinkqubo ezinjalo?” Ngokucacileyo, impendulo imele ithi akunjalo. Ubuchopho bumele ukuba babunoMyili noMenzi wabo onenkathalo.
15. Bathini abanye abantu ngobuchopho?
15 Ubuchopho bomntu bubangela ukuba nezona khompyutha zihambele phambili zibonakale ngathi zezamandulo. Umbhali ngezenzululwazi uMorton Hunt wathi: “Amandla ethu okukhumbula esiwasebenzisayo agcina inkcazelo eyiphinda kangangamawaka ezigidi inkcazelo ekwikhompyutha enkulu yezi mini esetyenziswa kwezophando.” Ngaloo ndlela, ugqirha wokutyanda ubuchopho uGqr. Robert J. White wagqiba ngelithi: “Andinakwenza ngakumbi ngaphandle kokuvuma ukuba kukho uMntu Okrelekrele nOwongamileyo, owayila nowavelisa ulwalamano olumangalisayo phakathi kobuchopho nengqondo—into umntu angenamandla akuyiqonda. . . . Ndimele ndikholelwe ukuba konke oku kwaqaliswa ngumntu okrelekrele, uThile wakwenza kwabakho.” Kwakhona yayifanele ibe nguThile owayenenkathalo.
Inkqubo Yegazi Ebalulekileyo
16-18. (a) Ziziphi iindlela inkqubo yegazi ebaluleke ngazo? (b) Sifanele sifikelele kwesiphi isigqibo?
16 Kwakhona, khawucinge ngenkqubo yegazi ebalulekileyo ehambisa izondlo neoksijini nethintela izifo. Ithetha ngeeseli ezibomvu zegazi, inxalenye eyintloko yale nkqubo, incwadi ethi ABC’s of the Human Body ithi: “Ithontsi legazi lineeseli zegazi ezahlukileyo ezingaphezu kwezigidi ezingama-250 . . . Umzimba unezinokuba zizigidi ezingama-25 ezigidi, ezinokuthi, ukuba zandlalwe phantsi, zilingane namabala amane okudlala intenetya. . . . Ezonakeleyo ziyabuyiselwa, ngomlinganiselo weeseli ezizigidi ezi-3 ngomzuzwana ngamnye.”
17 Ngokuphathelele iiseli zegazi ezimhlophe, enye inxalenye yenkqubo yegazi ebalulekileyo, lo mthombo ukwamnye usixelela oku: “Ngoxa kukho uhlobo olunye kuphela lweseli ebomvu, iiseli zegazi ezimhlophe ziziintlobo ezininzi, uhlobo ngalunye lunamandla okulwa amadabi omzimba ngendlela eyahlukileyo. Ngokomzekelo, olunye uhlobo lutshabalalisa iiseli ezifileyo. Ezinye iintlobo zivelisa izinto ezilwa neentsholongwane, zibulala amandla ezinto ezingeyonxalenye yomzimba, okanye zitya zize zizicole ngokoqobo iibhakteriya.”
18 Enjani yona inkqubo ukumangalisa nelungelelaniswe kakuhle! Ngokuqinisekileyo nantoni na ehlanganiswe kakuhle kangaka nesisikhuselo esicokiseke kangaka imele ibe nomlungelelanisi okrelekrele gqitha nonenkathalo—uThixo.
Ezinye Izinto Ezimangalisayo
19. Iliso linjani xa lithelekiswa nezinye izixhobo ezenziwe ngabantu?
19 Kukho nezinye izinto ezininzi ezimangalisayo emzimbeni womntu. Enye yazo liliso, eliyilwe ngobuchule kangangokuba akukho khamera inokuze ifane nalo. Isazi ngeenkwenkwezi uRobert Jastrow sathi: “Iliso liyabonakala ukuba layilwa; akukho myili wezibonakude ungenza into ephucukileyo kunalo.” Yaye impapasho ethi Popular Photography ithi: “Amehlo abantu azibona iinkcukacha ngomlinganiselo othe kratya kunendlela ifilimu eyenza ngayo. Akwazi ukubona imigama eyahlukahlukeneyo yezinto, ummandla obanzi gqitha, ngaphandle kokuba angayiboni kakuhle loo nto akhangele kuyo, asoloko ebona . . . Ukuthelekisa ikhamera neliso lomntu kukuthelekisa izinto ezingasoze zifane konke konke. Iliso lomntu phantse lifana nekhompyutha entsonkothe nekumgangatho ophezulu ngokumangalisayo enobukrelekrele obenziweyo, amandla okulungelelanisa inkcazelo, isantya neendlela zokusebenza ezingaphezulu gqitha kunawo nawuphi na umatshini, ikhompyutha okanye ikhamera eyenziwe ngumntu.”
20. Ziziphi ezinye zeenkalo ezimangalisayo zomzimba womntu?
20 Kwakhona, khawucinge ngendlela onke amalungu antsonkothileyo omzimba asebenzisana ngayo kungekho namgudu ungakanani siwenzayo thina. Ngokomzekelo, sizalisa izisu zethu ngeentlobo ezininzi ezahlukahlukeneyo zokutya neziselo, kanti umzimba uyazicola uze uvelise amandla. Khawuzame ukugalela ezo zinto zahlukahlukeneyo kwitanki yepetroli yenqwelo-mafutha uze ubone ukuba iya kuhamba iye kuma phi na! Kukwakho nommangaliso wokuzala, ukuzalwa kosana oluthandekayo—olufana nabazali balo—kwiinyanga nje ezisithoba. Yaye kuthekani ngobuchule bomntwana oneminyaka nje embalwa ubudala bokufunda ukuthetha ngolwimi oluntsonkothileyo?
21. Xa beqwalasela imimangaliso yomzimba, abantu abaqiqayo bathini?
21 Ewe, izinto ezininzi zendalo ezimangalisayo nezintsonkothileyo emzimbeni womntu zisenza sizaliswe luloyiko. Akukho nanye ingcali kwezenjineli enokwenza izinto ezinjengezo. Ngaba zinokuba nje zabakho ngamabona-ndenzile? Ngokuqinisekileyo akunjalo. Kunoko, xa beqwalasela zonke iinkalo ezimangalisayo zomzimba womntu, njengoko watshoyo nomdumisi, abantu abaqiqayo bathi: “Ndiyabulela kuwe [Thixo] ngenxa enokuba ndenziwe ngokoyikekayo, ngokubalulekileyo; zibalulekile izenzo zakho.”—INdumiso 139:14.
Umakhi Ophakamileyo
22, 23. (a) Kutheni sifanele sibamkele ubukho boMdali? (b) Ngokufanelekileyo iBhayibhile ithini ngoThixo?
22 IBhayibhile ithi: “Kuba yonke into eyindlu inoyakhayo; ke lowo wazakhayo zonke izinto nguThixo.” (Hebhere 3:4) Ekubeni nayiphi na indlu, enoba yakhiwe ngokulula kangakanani na, imele ibe nomakhi, ngoko indalo entsonkothe gqitha, kunye neentlobo ezahlukahlukeneyo zobomi emhlabeni, nayo imele ukuba yaba nomakhi. Yaye ekubeni sibamkela ubukho babantu abayile izinto ezinjengeenqwelo-moya, oomabonwakude neekhompyutha, ngaba asifanele sibamkele nobukho baLowo wanika abantu ubuchopho bokwenza ezo zinto?
23 IBhayibhile iyabamkela, imbiza ngokuthi ‘nguThixo [wenyaniso], uYehova, odala izulu, alaneke; otwabulula umhlaba neziveliso zawo; onika abantu abaphezu komhlaba ukuphefumla.’ (Isaya 42:5) Ngokufanelekileyo ke iBhayibhile ivakalisa oku: “Ufanele, [Yehova, NW], ukwamkela uzuko, nembeko, namandla; ngokuba inguwe owadala zonke izinto, nangenxa yokuthanda kwakho zikho, zadalelwa oko.”—ISityhilelo 4:11.
24. Sinokwazi njani ukuba uThixo ukho?
24 Ewe, ngezinto azenzileyo sinokwazi ukuba uThixo ukho. “Kuba kwasekudalweni kwehlabathi, iindawo [zikaThixo] ezibe zingenakubonwa zibonwa kakuhle, ziqondeke ngezinto ezenziweyo [nguThixo].”—Roma 1:20.
25, 26. Kutheni ukusetyenziswa kakubi kwento kungathethi ukuba ayinamenzi?
25 Isibakala sokuba into eyenziweyo isetyenziswa kakubi asithethi ukuba loo nto yayingenamenzi. Inqwelo-moya inokusetyenziselwa iinjongo zoxolo, njengesithuthi esihamba emoyeni. Kodwa kwakhona inokusetyenziselwa ukutshabalalisa, njengesithuthi esithwala iziqhushumbisi. Ukusetyenziselwa kwayo ukubulala akuthethi ukuba ayizange yenziwe ngumntu.
26 Ngokufanayo, isibakala sokuba ngokufuthi abantu beguquke bababi asithethi ukuba babengenaye uMenzi, ukuba akukho Thixo. Ngenxa yoko, ngokuchanileyo iBhayibhile ithi: “Hayi, ukuphenduka kwenu! Kuya kuthiwa umbumbi unjengodongwe na? into eyenziweyo ithi na kumenzi wayo, Akandenzanga na? into ebunjiweyo ithi na kumbumbi wayo, Akaqondi?”—Isaya 29:16.
27. Kutheni sinokulindela ukuba uThixo ayiphendule imibuzo yethu engokubandezeleka?
27 UMdali uye wabubonakalisa ubulumko bakhe ngokuntsonkotha okumangalisayo koko akwenzileyo. Uye wabonisa ukuba ngokwenene usikhathalele ngokuwenza umhlaba ulungele kanye ukuba kuhlalwe kuwo, ngokwenza imizimba neengqondo zethu ngendlela emangalisa ngolo hlobo, nangokusenzela izinto ezininzi kangaka ezintle ukuze sizinandiphe. Ngokuqinisekileyo ebengabonakalisa ubulumko nenkathalo efanayo ngokusazisa iimpendulo zemibuzo enjengethi: Kutheni uThixo evumele ukubandezeleka? Uza kwenza ntoni ngako?
[Umfanekiso okwiphepha 5]
Umhlaba, nomoya wawo osikhuselayo, likhaya elahlukileyo esiliyilelwe nguThixo onenkathalo
[Umfanekiso okwiphepha 6]
Umhlaba wenziwa ngenyameko enothando ukuze sibe nokubunandipha ngokupheleleyo ubomi
[Umfanekiso okwiphepha 7]
‘Ubuchopho bomntu omnye buneenkqubo zothungelwano ezingaphezu kwazo zonke iinkqubo zoqhagamshelwano eziseMhlabeni.’—Isazi ngebhayoloji yeemolekyuli
[Umfanekiso okwiphepha 8]
“Iliso liyabonakala ukuba layilwa; akukho myili wezibonakude ungenza into ephucukileyo kunalo.”—Isazi ngeenkwenkwezi