Icandelo 7
Ube Yintoni Umphumo Wemvukelo?
1-3. Ixesha libonise njani ukuba uYehova wayechanile?
NGOKUPHATHELELE imbambano yelungelo likaThixo lokulawula, ube yintoni umphumo wokuzilawula kwabantu bezimele geqe kuThixo kuzo zonke ezi nkulungwane? Ngaba abantu baye bazibonakalisa bengabalawuli abalunge ngakumbi kunoThixo? Ukuba sifikelela esigqibeni ngokusebenzisa ingxelo yenkohlakalo yomntu emntwini, ngokuqinisekileyo akubanga njalo.
2 Xa abazali bethu bokuqala balubhebhethayo ulawulo lukaThixo, yehl’ intlekele. Bazizisela ukubandezeleka bona nayo yonke intsapho yabantu eyabangelwa ngabo. Yaye babengenakubeka tyala komnye umntu kodwa ngabo ababebekek’ ityala. ILizwi likaThixo lithi: “Sizonakalisile kuye—singenyana bakhe, sisiphako sabo.”—Duteronomi 32:5.
3 Imbali iye yabonisa ukuchana kwesilumkiso sikaThixo kuAdam noEva sokuba ukuba bakreqile kumalungiselelo kaThixo, umgangatho wabo wawuya kuhla baze ekugqibeleni bafe. (Genesis 2:17; 3:19) Bakreqa kulawulo lukaThixo, yaye ekuhambeni kwexesha bawohloka baza bafa.
4. Kutheni sonke sazalwa singafezekanga, sichanabeke ekuguleni nasekufeni?
4 Kamva kuyo yonke inzala yabo kwenzeka oko kucaciswe kweyabaseRoma 5:12: “Isono sangena ngamntu mnye [uAdam, intloko yentsapho yoluntu] ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke.” Ngoko xa abazali bethu bokuqala baluvukelayo ulawulo lukaThixo, baba ngaboni abanesiphako. Ngokuvisisana nemithetho yemfuza, ekuphela kwento ababenokuyidlulisela kwinzala yabo yayikukungafezeki okwaba ngumphumo. Kungenxa yoko le nto sonke sizelwe sinesiphako, sichanabeke ekuguleni nasekufeni.
5, 6. Imbali ibonise ntoni ngemigudu yabantu yokuzisa uxolo nempumelelo yokwenyaniso?
5 Kuye kwadlula iinkulungwane ezininzi. Iindidi zobukhosi zigaleleke zadlula. Kuye kwazanywa zonke iintlobo zoburhulumente ebekunokucingwa ngazo. Sekunjalo, ngokuphindaphindiweyo, kuye kwenzeka izinto ezihambis’ umzimba kwintsapho yabantu. Emva kweminyaka engamawaka amathandathu, umntu ebengacinga ukuba abantu ngebenze inkqubela ukusa kwinqanaba lokumisela uxolo, okusesikweni nempumelelo emhlabeni wonke nokuba xa kungoku ngebeyazi kakuhle imilinganiselo emihle yokuziphatha yobubele, yovelwano nentsebenziswano.
6 Noko ke, kuye kwenzeka nje okuchaseneyo noko. Alukho uhlobo lorhulumente womntu olukhe lwasekwa oluye lwazisa uxolo nempumelelo yokwenyaniso kubo bonke abantu. Kule nkulungwane yama-20 kuphela, siye sabona ukubulawa okucetyiweyo kwezigidi ebudeni bokuBulawa Kwabantu Ngenkohlakalo nokubulawa kwabangaphezu kwezigidi ezili-100 ezimfazweni. Kweli xesha lethu inyambalala engenakubalwa yabantu iye yathuthunjiswa, yabulawa, yaphoswa nasezintolongweni ngenxa yeembono ezingafaniyo nokungavisisani kwezobupolitika.
Imeko Yanamhlanje
7. Imeko yentsapho yabantu namhlanje inokuchazwa njani?
7 Ukongezelela, khawuqwalasele imeko ngokubanzi kwintsapho yabantu namhlanje. Ulwaphulo-mthetho nogonyamelo lukho kuyo yonk’ indawo. Kukho ubhubhane wokusetyenziswa kakubi kweziyobisi. Izifo ezidluliselwa ngeentlobano zesini ziyanda. Izigidi zabantu zasulelwa sisifo esoyikekayo esinguGawulayo. Nyaka ngamnye amashumi ezigidi zabantu abulawa linxele likaKhetsekile okanye zizifo, ngoxa imbinana inentabalala yobutyebi. Abantu bayawungcolisa yaye bayawudlakazelisa umhlaba. Kuyo yonke indawo ubomi bentsapho nemilinganiselo yokuziphatha iyawohloka. Enyanisweni, namhlanje ubomi bubonisa ulawulo olubi lukaSathana, ‘uthixo weli hlabathi.’ Ihlabathi ayinkosi yalo alinaluvelwano, likhohlakele yaye lonakele ngokupheleleyo.—2 Korinte 4:4.
8. Kutheni singenakuthi izinto ezifikelelwe luluntu yinkqubela yokwenyaniso?
8 UThixo uye wabanika ithuba elaneleyo abantu ukuba bafikelele incopho yenkqubela yabo kwezenzululwazi nezinto eziphathekayo. Kodwa ngaba yinkqubela yokwenene xa isaphetha nomkhonto zithatyathelw’ indawo ngoombayimbayi, iinqwelo zokulwa, iinqwelo-moya ezithwala iziqhushumbisi neentolo zenyukliya? Ngaba yinkqubela leyo xa abantu bekwazi ukuhamba emajukujukwini kodwa bengakwazi ukuhlalisana ngoxolo emhlabeni? Ngaba yinkqubela xa abantu besoyika ukuhamba ezitratweni ebusuku, okanye kwanasemini kwezinye iindawo?
Oko Kuboniswe Lixesha
9, 10. (a) Yintoni eziyenze yacaca iinkulungwane zexesha ezidluleyo? (b) Kutheni uThixo engayi kubabandeza abantu inkululeko yokuzikhethela?
9 Uvavanyo lweenkulungwane zexesha lubonise ukuba abantu abanako ukuqinisela ukunyathela kwabo ngokuphumelelayo ngaphandle kolawulo lukaThixo. Abanakukwazi ukwenza oko kanye njengokuba bengenakuphila ukuba abatyi, abaseli yaye abaphefumli. Ubungqina bucacile: Sasidalelwe ukuba sixhomekeke kukhokelo loMdali wethu kanye njengoko ngokuqinisekileyo sasidalelwe ukuba sixhomekeke ekutyeni, emanzini nasemoyeni.
10 Ngokuvumela ubungendawo, uThixo uyibonakalise ngokupheleleyo imiphumo emibi yokusebenzisa kakubi inkululeko yokuzikhethela. Yaye inkululeko yokuzikhethela isisipho esixabiseke gqitha kangangokuba kunokubabandeza yona abantu, uThixo uye wabayeka ukuze bazibonele oko kuthethwa kukuyisebenzisa kakubi. ILizwi likaThixo linyanisile xa lisithi: “Akukhona endodeni ehambayo ukuqinisela ukunyathela kwayo.” Kwakhona lichan’ ucwethe xa lisithi: “Umntu [ugunyazela] umntu, kube kubi kuye.”—Yeremiya 10:23; INtshumayeli 8:9.
11. Ngaba kukho naluphi na uhlobo lolawulo lwabantu oluye lwakuphelisa ukubandezeleka?
11 Ukuvumela kukaThixo abantu ukuba bazilawule iminyaka engamawaka amathandathu kubonisa ngokucace gca ukuba umntu akakwazi ukuphelisa ukubandezeleka. Akazange akwenze nje konke konke oko. Ngokomzekelo, ngomhla wakhe uKumkani uSolomon wakwaSirayeli, ngabo bonke ubulumko, ubutyebi namandla akhe, wayengenako ukulungisa ubugxwayiba obabangelwa lulawulo lomntu. (INtshumayeli 4:1-3) Ngokufanayo, kumhla wethu iinkokeli zehlabathi, kwanangezixhobo zakutshanje zenkqubela kwezobugcisa, azikwazi ukuphelisa ukubandezeleka. Okubi ngakumbi kukuba, imbali iye yabonisa ukuba abantu abazimele geqe kulawulo lukaThixo baye bakwandisa ukubandezeleka kunokukuphelisa.
Imbono Ethabatha Ixesha Elide KaThixo
12-14. Ziziphi iingenelo ezihlala zihleli ezibakho ngenxa yokuvumela kukaThixo ubungendawo?
12 Ukuvumela kukaThixo ukubandezeleka kuye kwathetha intlungu kuthi. Kodwa ebenembono ephangaleleyo, eyazi imiphumo emihle eza kubakho ekugqibeleni. Imbono kaThixo iya kuzisa iingenelo kwizidalwa, kungekhona nje iminyaka embalwa okanye amawaka ambalwa, kodwa kangangezigidi zeminyaka, ewe, ngonaphakade kanaphakade.
13 Ukuba nakwiliphi na ixesha elizayo kungaze kuvele umntu osebenzisa kakubi inkululeko yokuzikhethela ngokuthandabuza indlela uThixo azenza ngayo izinto, akuyi kuba yimfuneko ukumnika ixesha lokuzama ukungqinela iimbono zakhe. Ekubeni sele ebanikile kakade abavukeli iminyaka engamawaka, uThixo uye wamisela umgaqo osemthethweni nonokusetyenziswa kulo lonke iphakade naphi na endalweni.
14 Ngenxa enokuba uYehova ebuvumele ubungendawo nokubandezeleka kweli xesha, kuya kube sekuboniswe ngokwaneleyo ukuba akukho nto inokuphumelela ingavisisani naye. Kuya kube kuboniswe ngaphandle kwamathandabuzo ukuba akukho cebo lizimeleyo labantu okanye lezidalwa zomoya elinokuzisa iingenelo ezihlala zihleli. Ngenxa yoko, ngelo xesha uThixo uya kube ethetheleleka ngokupheleleyo ngokuyitshayela kuthi tu nayiphi na imvukelo. “[Uya kubatshabalalisa] abangendawo.”—INdumiso 145:20; Roma 3:4.
[Umfanekiso okwiphepha 15]
Emva kokuba abazali bethu bokuqala bakhetha ukuzimela geqe kuThixo, ekugqibeleni baluphala baza bafa
[Imifanekiso ekwiphepha 16]
Ulawulo lwabantu ngaphandle kukaThixo lungqineke lusizisa iintlekele
[Inkcazelo]
U.S. Coast Guard photo