Iinkonzo Zobuxoki Zilingcolisa Njani Igama LikaThixo?

Ukuba uThixo usifundisa ukuba masibathande abantu, kutheni ke iinkonzo ezithi zimela yena zisenza izinto ezimbi? Ngamazwi alula, ezi nkonzo zezobuxoki. Izinto ezizithethayo nezizenzayo zenza abantu bakholelwe ubuxoki ngoThixo. Ziyenze njani le nto? UYehova uziva njani? Uza kwenza ntoni ngale nto yenziwa zezi nkonzo?

1. Iinkonzo zobuxoki zilingcolisa njani igama likaThixo ngezinto ezizifundisayo?

‘Endaweni yokukholelwa inyaniso engoThixo, iinkonzo zobuxoki ziye zakhetha ubuxoki.’ (Roma 1:25) Ngokomzekelo, iinkonzo ezininzi azibafundisi abantu igama likaThixo. Kodwa iBhayibhile yona ithi igama likaThixo limele lisetyenziswe. (Roma 10:13, 14) Ezinye iinkokheli zeenkonzo zithi xa kwenzeke into embi, kuthande uThixo. Kodwa bubuxoki obo. UThixo akazenzi izinto ezimbi. (Funda uYakobi 1:13.) Into ebuhlungu kukuba ubuxoki obuthethwa ezinkonzweni bubenze abantu babhekela kuThixo.

2. Iinkonzo zobuxoki zilingcolisa njani igama likaThixo ngezinto ezizenzayo?

Iinkonzo zobuxoki azibaphathi njengoYehova abantu. IBhayibhile ithi ngazo: ‘Izono zazo ziye zanda zada zaya kufika nasezulwini.’ (ISityhilelo 18:5) Kangangeminyaka emininzi kakhulu, iinkonzo zobuxoki bezisoloko zizidibanisa neepolitiki, zixhasa iimfazwe zaza zabangela okanye zavuma nokuba kubulawe abantu abaninzi. Ezinye iinkokheli zifuna ukuba zizityebi zize zifune imali kubantu abahamba kwezo nkonzo. Zonke ezi zinto ezizenzayo zibonisa ukuba azimazi nokumazi uThixo, bezingafanelanga nokuba zizibiza ngegama lakhe.​—Funda 1 Yohane 4:8.

3. UThixo uziva njani ngeenkonzo zobuxoki?

Ukuba izinto ezenziwa ziinkonzo zobuxoki ziyakucaphukisa, ucinga ukuba uziva njani yena uYehova? Uyabathanda abantu, kodwa iinkokheli ezingcolisa igama lakhe nezibaphatha kakubi abantu bakhe ziyamcaphukisa. Uthembisa ukuba iinkonzo zobuxoki ziza kutshatyalaliswa ‘zingaphindi zifunyanwe.’ (ISityhilelo 18:21) Sele eza kuzitshabalalisa zonke.​—ISityhilelo 18:8.

FUNDA NEZINYE IZINTO

4. Ayizizo zonke iinkonzo ezimkhonza ngendlela ayifunayo uThixo

Abantu abaninzi bathi iinkonzo unokuzifanisa neendlela ezahlukeneyo, zonke zisisa kuThixo. Kodwa ke, yinyani leyo? Funda uMateyu 7:13, 14, nize nincokole ngalo mbuzo:

• Ithini iBhayibhile ngendlela eya ebomini?

Dlala IVIDIYO, nize nincokole ngalo mbuzo:

IVIDIYO: Ngaba UThixo Uzamkela Zonke Iinkonzo?​—Emfutshane (3:22)

• Ngaba iBhayibhile ithi zininzi iinkonzo ezimkhonza ngendlela ayifunayo uThixo?

5. Iinkonzo zobuxoki azimlinganisi uThixo ngokubathanda abantu

Iinkonzo zilingcolise ngeendlela ezininzi igama likaThixo. Eyona ndlela izogqitha zonke kukuzidibanisa kwazo neemfazwe. Ukuze ubone umzekelo wale nto, dlala IVIDIYO. Emva koko, nincokole ngale mibuzo:

IVIDIYO: Izinto Ezenziwa Ziinkonzo Ngexesha LeMfazwe Yehlabathi II (2:22)

• Yintoni eye yenziwa ziicawa ezininzi ngeMfazwe Yehlabathi yesibini?

• Uziva njani ngezinto ezazenzayo?

Funda uYohane 13:34, 35 no-17:16. Emva koko, nincokole ngale mibuzo:

• Ucinga ukuba uYehova uziva njani xa iinkonzo zisiba nento eziyenzayo xa kukho imfazwe?

• Zininzi izinto ezimbi ezenzeka ngenxa yeenkonzo zobuxoki. Ziintoni ezenziwa ziinkonzo ezibonisa ukuba azikhange zilinganise uThixo ngokubathanda abantu?

6. UThixo ufuna ukunceda abantu baphume kwiinkonzo zobuxoki

Funda iSityhilelo 18:4,a nize nincokole ngalo mbuzo:

• Ikwenza uzive njani into yokwazi ukuba uThixo ufuna ukunceda abantu abaqhathwe ziinkonzo zobuxoki?

7. Qhubeka ufunda ngoThixo wokwenene

Ngaba izinto ezithethwa nezenziwa ziinkonzo zobuxoki zimele ziyitshintshe indlela omjonga ngayo uThixo? Khawucinge ngonyana ongawafuniyo amacebiso anokumnceda awanikwa ngutata wakhe. Lo nyana uyemka kowabo aze aqalise ukwenza izinto ezimbi kakhulu. Utata akazithandi izinto ezenziwa ngunyana wakhe. Kutheni singenakutyhola lo tata ngendlela unyana wakhe azenza ngayo izinto?

• Ngaba simele sityhole uYehova size siyeke ukufunda ngaye ngenxa yezinto ezenziwa ziinkonzo zobuxoki?

UFUNDE NTONI?

Iinkonzo zobuxoki zingcolise igama likaThixo ngezinto ezizifundisayo nangezinto ezimbi ezizenzayo. UThixo uza kuzitshabalalisa.

Khawutsho

• Uziva njani ngezinto ezifundiswa nezenziwa ziinkonzo zobuxoki?

• UYehova uziva njani ngeenkonzo zobuxoki?

• Uza kwenza ntoni uThixo ngeenkonzo zobuxoki?

JONGA NEZI ZINTO

Funda ngeendlela ezimbini iinkonzo ezininzi ezimphoxa ngazo uThixo.

“Ngaba Zonke Iindlela Zokunqula Ziyafana Yaye Zamkelekile KuThixo?” (Inqaku eliku-jw.org/xh)

Kutheni uYehova efuna simkhonze sikunye nabanye abantu?

“Ngaba Kunyanzelekile Ukuba Ube Nenkonzo?” (Inqaku eliku-jw.org/xh)

Umfundisi wayekhathazwa yinkonzo yakhe. Kodwa le nto zange imenze ayeke ukufunda inyaniso ngoThixo.

“Isizathu Sokuba Umfundisi Ashiye Icawa Yakhe” (Vukani!, Februwari 2015)

Kangangeminyaka emininzi, iinkonzo bezisoloko zithetha ubuxoki ngoThixo. Loo nto yenze abantu bakholelwa ukuba uThixo akasikhathalelanga futhi ukhohlakele. Funda inyaniso ngezinye zezo zinto.

“Ubuxoki Obubangela Ukuba UThixo Angathandwa” (IMboniselo, Novemba 1, 2013)