Imibuzo Yabafundi
Kutheni AmaNgqina KaYehova Engayi Emfazweni?
AmaNgqina kaYehova ehlabathini lonke aziwa ngokungalwi nezinye iintlanga okanye balwe nabalwi besizwe asiso. IAustralian Encyclopædia yagqabaza yathi kwiminyaka engama-50 eyadlulayo: “AmaNgqina kaYehova akabandakanyeki tu kwaphela ezimfazweni.”
Esona sizathu sibangela ukuba amaNgqina kaYehova angathath’ icala ezimfazweni kukuba ukulwa kwezi mfazwe kuchaphazela izazela zawo. Izazela zawo ziqeqeshwe ngomyalelo nomzekelo weNkosi uYesu Kristu. Wayalela ukuba abalandeli bakhe bathande abamelwane babo. Kwakhona wabayalela wathi: “Qhubekani nizithanda iintshaba zenu, nisenza okulungileyo kwabo banithiyayo.” (Luka 6:27; Mateyu 22:39) Xa omnye umfundi wakhe wazama ukumkhusela ngekrele, uYesu wathi kuye: “Buyisela ikrele lakho endaweni yalo, kuba bonke abathabatha ikrele baya kutshabalala ngekrele.” (Mateyu 26:52) Ngaloo ndlela, ngamazwi nangomzekelo wabonisa abalandeli bakhe ukuba abamele basebenzise izixhobo zemfazwe.
Esinye isizathu sokuba amaNgqina kaYehova engayi emfazweni kukuba anamalungu onqulo ehlabathini lonke. Imfazwe ingabahlukanisa abazalwana nto leyo enxamnye nomyalelo kaYesu othi, ‘babe nothando phakathi kwabo.’—Yohane 13:35.
Le migaqo ingasentla yothando lobuthixo amaNgqina kaYehova akayithethi nje kodwa aphila ngayo. Ngokomzekelo, hlola ikhondo awalithabathayo ebudeni beMfazwe Yehlabathi Yesibini eyaqala ngowe-1939-1945. EUnited States, amaNgqina kaYehova angaphezu kwama-4 300 avalelwa ezintolongweni ngenxa yokwala kwawo ukubandakanyeka kwezomkhosi. EBritani, ngaphezu kwabali-1 500 kuquka amabhinqa angama-300 bavalelwa ezintolongweni ngenxa yokungabandakanyeki kwimisebenzi yemfazwe. KwiJamani yamaNazi amaNgqina angaphezu kwama-270 urhulumente wayalela ukuba abulawe ngenxa yokwala kwawo ukusebenzisa izixhobo. Phantsi korhulumente wamaNazi amaNgqina angaphezu kwali-10 000 avalelwa ezintolongweni okanye kwiinkampu zoxinaniso. AmaNgqina aseJapan nawo atsala nzima. Nabani na owafelwa sisalamane okanye umhlobo wakhe kwiMfazwe Yehlabathi Yesibini–okanye kwenye imfazwe eyalandelayo unokuqiniseka ukuba akukho nokuba libe linye iNgqina likaYehova elabulalayo.
Indlela amaNgqina kaYehova ayijonga ngayo imfazwe ibonakala kumazwi okugqibela kaWolfgang Kusserow. Ngowe-1942 amaNazi amnqumla intloko lo mfana womJamani uneminyaka engama-20 ubudala ngenxa yokuba wala ukuya emfazweni. (Isaya 2:4) Ngaphambi kwenkundla yomkhosi wathi: “Ndikhuliswe njengeNgqina likaYehova njengokuba lisitsho iLizwi likaThixo eliziZibhalo Ezingcwele. Umthetho omkhulu nowona ungcwele awawunika abantu uthi: ‘Uze umthande uThixo wakho ngaphezu kwezinto zonke nommelwane wakho njengawe.’ Eminye imiyalelo ifundeka ngolu hlobo: ‘Uze ungabulali.’ Ngaba uMdali wayeyibhalele imithi le miyalelo?”—Marko 12:29-31; Eksodus 20:13.
AmaNgqina kaYehova akholelwa ekubeni kuphela nguYehova, uThixo usomandla oya kuzisa uxolo lukanaphakade emhlabeni. Balindele yena ukuba azalisekise isithembiso sakhe sokuba uya ‘kuphelisa iimfazwe kuse esiphelweni somhlaba.’—INdumiso 46:9.