Ukufumana Ubuncwane Obufihliweyo
NGABA wakha wafumana ubuncwane obufihliweyo kwindawo engalindelekanga? Oku koko kwenzeka ngomhla kaMatshi 27, 2005, kuIvo Laud, ongomnye wamaNgqina kaYehova e-Estonia. UIvo wayencedisa uAlma Vardja, osele ekhulile, naye ongomnye wamaNgqina ekudilizeni ishedi endala. Njengoko babesusa udonga lwangaphandle, babona iplanga elaligqume icala lentsika. Bakuba belisusile elo planga, baphawula ukuba kukho umsantsa omalunga neesentimitha ezili-10 ububanzi, ubude obusisi-1,2, ubunzulu obuziisentimitha ezili-10, ugqunywe ngeplanga elincinane elifanayo ngombala. (1) Lowo yayinguvimba wobuncwane! Babuyintoni obu buncwane? Babufihlwe ngubani?
Kuloo vimba kwakukho imiqulu eliqela esongwe ngephepha eliqinileyo. (2) Le miqulu yayiqulethe uncwadi lwamaNgqina kaYehova, ubukhulu becala amanqaku afundwayo ephephancwadi IMboniselo, amanye esusela kunyaka we-1947. (3) Ayebhalwe ngocoselelo ngolwimi lwase-Estonia. Eminye yaloo miqulu yayinika umkhondo womntu owafihla olo ncwadi. Yayinengxelo yokugocagocwa komyeni ka-Alma, uVillem Vardja. Kwakhona kule ngxelo kwakubhalwe iminyaka uVillem awayichithayo esentolongweni. Kwakutheni ukuze abe sentolongweni?
UVillem Vardja wayenembopheleleko ebandleni, ekhonza kunye namanye amaNgqina kwiBandla laseTartu yaye kamva wakhonza kwiBandla laseOtepää, e-Estonia, indawo eyayisakuba yiRiphabliki yobuSoshiyali yaseSoviet. Kubonakala ukuba wafunda inyaniso yeBhayibhile ngaphambi kweMfazwe Yehlabathi II. Kwiminyaka embalwa kamva, ngoDisemba 24, 1948, ngaphantsi kolawulo lobuKomanisi, uMzalwan’ uVardja wabanjwa ngenxa yemisebenzi yakhe yonqulo. Wagocagocwa ephathwa kakubi ngamapolisa, njengoko ayezama ukumnyanzela ukuba achaze amagama amanye amaNgqina. Emva kokuba bemalele ithuba lokuzithethelela enkundleni, uVillem wagwetywa iminyaka elishumi entolongweni kwiinkampu zamaRashiya.
UVillem Vardja wahlala ethembekile kuYehova de kwaba sekufeni kwakhe ngoMatshi 6, 1990. Umfazi wakhe wayengazi nto ngolo ncwadi. Kusenokwenzeka ukuba, uVillem akazange amchazele ukuba uncwadi lufihlwe apho ukuze uAlma akhuseleke xa babenokumgocagoca. Kwakutheni ukuze kufuneke alufihle olo ncwadi? Kungokuba iKomiti kaRhulumente waseSoviet, iKGB yayiqhele ukugqogqa amakhaya amaNgqina kaYehova, ifuna iimpapasho zonqulo. Mhlawumbi uMzalwan’ uVardja walufihla olo ncwadi ukuze aqinisekise ukuba abazalwana basoloko benokutya kokomoya, xa olunye uncwadi lunokuthatyathwa yiKGB. Eminye imiqulu yayisele ifunyenwe kwangaphambili, ngehlobo lonyaka we-1990. Omnye umqulu wafunyanwa eTartu, kumzantsi we-Estonia. Nawo wawufihlwe nguVillem Vardja.
Kutheni sisithi le miqulu bubuncwane? Kungokuba ezi kopi zibhalwe ngesandla nezazifihlwe ngocoselelo, zibonisa indlela la maNgqina ayekuxabisa ngayo ukutya kokomoya okwakukho ngelo xesha. (Mat. 24:45) Ngaba nawe uyakuxabisa ukutya kokomoya okufumanayo ngoku kwindawo okuyo? Okunye koko kutya kokomoya liphephancwadi IMboniselo elifumaneka ngolwimi lwase-Estonia nezinye iilwimi ezingaphezu kwezili-170.