Kunini Apho Sifanele Siphaphe?

USENOKUVUMA ukuba kubalulekile ukuhlala uphaphile xa usesikolweni. Abanye bayozela eklasini, kodwa ukuze ufunde kufuneka uphaphe. Mhlawumbi uyaya nasezintlanganisweni apho kufundwa iBhayibhile.

Ucinga ukuba yintoni onokuyenza ukuze uhlale uphaphile?—a Enye into enokukunceda kukulala kwangethuba. Mhlawumbi nokukhe uthi qwaka emva kwemini kunokukunceda. Makhe sibone ukuba sinokufunda ntoni kwinto eyenzeka komnye umntwana owalalayo xa uPawulos wayenikela intetho. Funda incwadi yeZenzo eBhayibhileni yakho kwisahluko 20 ivesi yesi-7 ukuya kweye-12, ukuze sibone ukuba yintoni eyenzekayo.

UPawulos wayetyelele ibandla elalikwidolophu eselunxwemeni lwaseTrowa. IBhayibhile ithi uPawulos “wayeza kumka ngemini elandelayo” ngesikhephe. “Wayolula intetho yakhe de kwasezinzulwini zobusuku.” Sifunda oku: “Ehleli efestileni, umfana othile ogama linguYutiko wafikelwa bubuthongo obunzulu ngoxa uPawulos wayeqhubeka ethetha.” Kwenzeka ntoni?—

UYutiko wawa efestileni “ukusuka kumgangatho wesithathu.” UPawulos nabanye abantu behla ezitepsini bebaleka. UYutiko wayephantsi efile. Unokuyithelekelela indlela ababebuhlungu ngayo?— IBhayibhile ithi uPawulos wamthatha uYutiko waza wamanga. UPawulos wadanduluka ngovuyo wathi: ‘Ningakhathazeki uyaphila!’ UThixo wayembuyisele ebomini uYutiko.

Yintoni onokuyifunda ngoThixo ngoko kwenzeka kuYutiko?— Sifunda ukuba uYehova, uBawo wethu wasezulwini, unokubabuyisela ebomini kwakhona, kuquka nabantwana. UYehova uyakuqonda yaye uyakuthanda, nangaphezu kwabazali bakho. Xa uYesu wayelapha emhlabeni, wabonisa ukuba unjani uYise ngokuwola abantwana aze abasikelele. Wavusa nabantu abaselula kuquka intwazana eneminyaka eli-12 ubudala.

Uziva njani kukwazi ukuba uYihlo osezulwini uyakuthanda?— Ewe, kusenza simthande uYehova size sifune ukuthobela izinto azithethayo. Ngaba uyazi ukuba sinokubonisa njani ukuba siyamthanda?— Enye indlela kukuwathetha loo mazwi. UYesu wathi: “Ndiyamthanda uBawo.” Kodwa uYesu wenza okungakumbi kunokuba athi uyamthanda uThixo. Wakubonisa ngezenzo.

UYesu wamthobela uThixo. UYesu wathi: “ndisoloko ndisenza izinto ezikholekileyo kuye.” Ukuba sifuna ukukholisa uYehova noNyana wakhe uYesu siyakuzama ukuhlala siphaphile.