Inyaniso Inokubutshintsha Ubomi Bakho
MHLAWUMBI uye weva okanye wafundiswa obunye bobuxoki ngoThixo obebubhencwa kolu ngcelele lwamanqaku. Sekunjalo, usenokuba mathidala ukutshintsha iinkolelo zakho, ngokukodwa ukuba uye wazikholelwa ixesha elide.
Siyaqondakala isizathu sokuba ube mathidala. Ezinye iicawa azikukhuthazi ukuthelekiswa kweemfundiso zazo neBhayibhile. Ezinye zithethelela iimfundiso zazo ngokuthi iBhayibhile intsonkothile, ayinakuqondwa ngumntu wonke. Nakuba kunjalo, inkoliso yabafundi bakaYesu yayingabantu abaqhelekileyo, ababengenamfundo ibheke phi.—IZenzo 4:13.
Usenokungafuni ukuzihlalutya iinkolelo zakho kuba usoyika ukuba ukwenza loo nto kuya kubonisa ukungabi nalukholo. Kodwa ngaba isengqiqweni into yokuba uThixo ebengayi kuthanda xa uhlola iBhayibhile, isigidimi sakhe esiya ebantwini, ukuze uqonde into ayilindeleyo kuwe? Ngokwahlukileyo koko, iLizwi lakhe likukhuthaza ukuba uhlole iZibhalo, kuba lithi: “Nikungqine ngokwenu ukulunga nokwamkeleka nokugqibelela kokuthanda kukaThixo.”—Roma 12:2.
Ukufunda inyaniso ngoThixo asingombandela wokusebenzisa ingqondo kuphela—kunokutshintsha ubomi bakho. (Yohane 8:32) UDeanne, ebekuthethwe ngaye kwinqaku lokuqala, ngoku unokholo kwiLizwi likaThixo. Uthi: “Ndandingazi ukuba iZibhalo zicace kangaka de ndafunda iBhayibhile. Ngoku ndiyamazi uYehova, kungekhona njengoThixo, kodwa njengoBawo wasezulwini ondithandayo. Ndifumene injongo yokwenene ebomini.”
Mhlawumbi wakhe wayifunda iBhayibhile ngaphambili kodwa awayiqonda. Ukuba kunjalo, unganikezeli. Ukuzama ukuqonda iBhayibhile xa ubufundiswe ubuxoki kunjengokulungisa umatshini usebenzisa incwadi yokuwulungisa engeyiyo. Unokuzilungisa iinxalenye ezithile zomatshini kodwa unokukruquka uze unikezele xa ungakwazi ukuwulungisa wonke. Xa usebenzisa incwadi efanelekileyo, uya kukwazi ukuwulungisa.
Ngaba ungathanda ukusebenzisa incwadi efanelekileyo ukuze ufunde inyaniso ngoThixo? Siyakumema ukuba uqhagamshelane namaNgqina kaYehova kwindawo ohlala kuyo okanye ubhalele kwidilesi efanelekileyo kwiphepha 4 ukuze uqhutyelwe isifundo seBhayibhile.
[Amagama acatshulweyo akwiphepha 9]
“Nikungqine ngokwenu ukulunga nokwamkeleka nokugqibelela kokuthanda kukaThixo.”—ROMA 12:2.