“Hlalani Nilindile”—Kutheni Kubalulekile Nje?

“UYA kuba yintoni na umqondiso wobukho bakho nowokupheliswa kwenkqubo yezinto?” (Mat. 24:3) Ephendula lo mbuzo, uYesu wanika abafundi bakhe umqondiso ocacileyo, oneenkcukacha, ekulula ukuwubona nongenakuwuphazamisa nanto, obhalwe kuMateyu isahluko 24, kuMarko isahluko 13 nakuLuka isahluko 21. Wongezelela wathi: “Hlalani nilindile.”—Mat. 24:42.

Ukuba umqondiso wawuza kucaca ngolo hlobo, kwakutheni ukuze ababongoze ngokukhethekileyo? Makhe sihlole ezi zinto zimbini ekusenokwenzeka ukuba zazingunobangela. Okokuqala, iziphazamiso zazinokwenza abanye bangawunanzi umqondiso, nto leyo eyayinokubenza baphole ngokomoya baze balibale ukulinda. Okwesibini, umKristu wayesenokuziqonda ezinye iinkalo zomqondiso kodwa ngenxa yezinto ezimngqongileyo angaboni ukuba uchaphazeleka njani ngokungqalileyo. Wayesenokuqiqa ngelithi “imbandezelo enkulu,” eyincopho yesiprofeto sikaYesu, yayisathe qelele yaye ngenxa yoko kwakunganyanzelekanga ukuba ‘ahlale elindile.’—Mat. 24:21.

“Abazange Banikele Ngqalelo”

UYesu wakhumbuza abalandeli bakhe ngabantu bemihla kaNowa. Babekho xa uNowa wayeshumayela, esakha umkhombe yaye balubona nogonyamelo lwaloo mihla. Kodwa ke, abaninzi kubo “abazange banikele ngqalelo.” (Mat. 24:37-39) Nanamhlanje, abantu bazijonga ngokufanayo izilumkiso. Ngokomzekelo, iibhodi zendlela ezichaza isantya esivumelekileyo zibhalwe ngokucacileyo, kodwa abantu abaninzi abanikeli ngqalelo kuzo. Abasemagunyeni baye banyanzeleke ukuba bakhe izinto eziza kwenza abaqhubi behlise isantya. Ngokufanayo, umKristu usenokuwazi umqondiso wemihla yokugqibela kodwa abe ezixakekise ngezinto ezingabonisiyo ukuba uwugqala njengongxamisekileyo. Yakha yenzeka le nto kuArielle, intwazana yaseMpuma-Afrika.

UArielle wayekuthanda ukubukela ibhola edlalwa ngamantombazana kumabonwakude. Xa isikolo sakhe salungiselela iqela elithile, umdla awayenawo wokudlala wamenza walibala ngezinto ezinokonakalisa ubumoya bakhe. Wabhalisa njengonozinti welo qela. Yintoni eyalandelayo? Uthi: “Amanye amantombazana esasidlala nawo ayethandana nabafana abasebenzisa iziyobisi nabatshayayo. Kuba ndandahlukile ndaba yintlekisa, kodwa ndazixelela ukuba bandilingene. Ndingaqondanga, umdlalo ngokwawo waqalisa ukonakalisa ulwalamano lwam noYehova. Lo mdlalo wawusele usegazini kum. Ebudeni beentlanganiso zamaKristu, ingqondo yam yayidla ngokubhadulela ebaleni. Ubuntu bam njengomKristu batshintsha. Ukuthanda kwam ukudlala kwatshintsha kwaba kukufuna ukuphuma phambili. Ndaziqeqesha nzima ukuze ndanelise umoya endandinawo wokhuphiswano. Ndaqalisa ukuxinezeleka. Ndada ndancama nabahlobo bam ngenxa yebhola.

“Kwenzeka eyokugqibela xa sanikwa isohlwayo laza iqela esasidlala nxamnye nalo lanikwa ithuba lokufaka inqaku. Ndandizixelela ukuba alinakuze lilifumane elo nqaku. Ndazibona sele ndithandaza kuYehova ndimcela ukuba andincede ndilithintele lingangeni elo nqaku! Le nto yandenza ndaqonda indlela olwalonakele ngayo ulwalamano lwam noYehova. Ndayilungisa njani loo nto?

“Ndandisele ndiyibukele iDVD ethi Young People Ask—What Will I Do With My Life?a Ndagqiba kwelokuba ndiphinde ndiyibukele kodwa ke ngoku ndicingisise ngayo. Ngaphezu koko, ndandikwimeko efanayo neka-André, umfana ekuthethwa ngaye kuloo mdlalo. Ndaphawula ngokukhethekileyo into omnye umdala awacebisa uAndré ukuba ayenze, xa wathi: funda uze ucamngce ngeyabaseFilipi 3:8. Yandinceda loo nto. Ndalicima igama lam kwelo qela.

“Kwatsho kwathi qwenge! Umoya endandinawo wokhuphiswano noxinezeleko olwalubangelwa nguwo lwaphela. Ndaziva ndonwabile ndaza ndasondelelana nabahlobo bam abangamaKristu. Ndayixabisa ngakumbi imisebenzi yamaKristu. Ndandinikel’ ingqalelo kwiintlanganiso yaye kwakuba mnandi gqitha xa ndikuzo. Ndaphucula nasentsimini. Ngoku ndikhonza njengovulindlela ongumncedani.”

Ukuba kukho into ekuphazamisayo nekwenza ungawunanzi umqondiso esawunikwa nguYesu, thatha amanyathelo akhawulezileyo, njengoko uArielle wenzayo. Usenokuzama ezi zinto zilandelayo. Hlola iWatch Tower Publications Index, ekuthiwa yimaphu yobuncwane obufihliweyo. Uza kufumana iimbekiselo zeziluleko eziphilileyo namava endlela abantu abathile abaye bahlangabezana ngayo nezilingo. Zilungiselele kakuhle iintlanganiso uze ubhale amanqaku ukuze ungenelwe ngokuzeleyo. Abanye baye bafumanisa ukuba ukuhlala phambili kufutshane neqonga kuyanceda. Xa kuqhutywa ingxubusho nabaphulaphuli, zama ukugqabaza kuqala. Ukongezelela, ukuze uhlale uthe qwa ngokomoya zama ukuthelekisa iindaba zakutshanje kunye neenkalo zomqondiso nezinye izinto ezibonisa ukuba ‘sikwimihla yokugqibela.’—2 Tim. 3:1-5; 2 Pet. 3:3, 4; ISityhi. 6:1-8.

“Hlalani Nilungile”

Umqondiso wemihla yokugqibela ungumbandela wehlabathi lonke, yaye uchaphazela “wonke umhlaba omiweyo.” (Mat. 24:7, 14) Izigidi zabantu zihlala kwiindawo ezithwaxwa zizifo, ukunqongophala kokutya, iinyikima nezinye iziganeko ekwaprofetwa ngazo. Kanti abanye abaninzi baphila ngoxolo. Ukuba akuzange wehlelwa zezinye zeenkalo zomqondiso, ngaba umele ugqibe kwelokuba imbandezelo enkulu isekude? Akunakuba bubulumko oko.

Ngokomzekelo, cinga ngento eyaprofetwa nguYesu ngokuphathelele ‘iindyikitya zokufa nokunqongophala kokutya.’ (Luka 21:11) Okokuqala, akazange athi ezi zinto zaziya kuchaphazela zonke iindawo ngaxeshanye okanye ngomlinganiselo ofanayo. Kunoko, wathi zaziya kwenzeka “kwiindawo ngeendawo.” Ngoko asinakulindela iziganeko ezifanayo kwindawo yonke ngexesha elinye. Okwesibini, emva nje kokuba echaze ukunqongophala kokutya, uYesu wabonisa ukuba abanye babalandeli bakhe kwakuya kufuneka balumke bangazingxali ngokutya esithi: “Zilumkeleni ukuba iintliziyo zenu zingaze zisindwe kukuzingxala ngokutya” (Luka 21:34) Ngenxa yoko, wonke umKristu akamele alindele ukwehlelwa zizo zonke iinkalo zomqondiso. Kunoko, uYesu wathi: “Xa nibona ezi zinto zisenzeka, yazini ukuba ubukumkani bukaThixo bukufuphi.” (Luka 21:31) Iindlela zoqhagamshelwano zakutshanje sizinceda sizibone zonke iinkalo zomqondiso, enoba siphila kweyiphi na imeko ekuhlaleni.

Kwakhona, khumbula ukuba uYehova sele ewubekile ‘umhla nelixa’ lokuqalisa kwembandezelo enkulu. (Mat. 24:36) Iziganeko ezenzekayo emhlabeni azinako ukuwutshintsha lo mhla.

UYesu wabongoza amaKristu akuyo yonke indawo esithi: “Hlalani nilungile.” (Mat. 24:44) Sifanele sihlale silungile ngalo lonke ixesha. Kakade ke, asinakusoloko sisenza imisebenzi yokomoya kude kuzik’ ilanga yonke imihla. Ngaphezu koko, akukho mntu waziyo ukuba uya kube esenza ntoni na xa kuqalisa imbandezelo enkulu. Kusenokwenzeka ukuba abanye baya kuba besebenza entsimini okanye besenza imisebenzi yasekhaya. (Mat. 24:40, 41) Ngoko ke, yintoni esinokuyenza ukuze sihlale silungile?

UEmmanuel, uVictorine, neentombi zabo ezintandathu bahlala kwindawo eseAfrika apho bangaziboni ngokupheleleyo iziganeko zomqondiso. Ngoko bagqiba kwelokuba babe nengxubusho yeBhayibhile yonke imihla ukuze ibancede bahlale belungile. UEmmanuel uthi: “Kwakunzima ukufumana elona xesha lalilungela umntu wonke. Ekugqibeleni sakhetha imizuzu engamashumi amathathu emva kwentsimbi yesithandathu kusasa. Emva kokuxubusha itekisi yosuku, silungiselela iziqendu ezimbalwa kwezinye zeempapasho zethu ezifundwa kwisifundo sebandla veki nganye.” Ngaba olu cwangciso luye lwabanceda bahlala bephaphile? Lubancede ngokwenene! UEmmanuel ungumnxibelelanisi wequmrhu labadala ebandleni. UVictorine udla ngokuthatha inkonzo yobuvulindlela bobuncedani yaye uye wanceda abantu abaninzi bamkela inyaniso. Iintombi zabo ziqhuba kakuhle ngokomoya.

UYesu usibongoza esithi: “Hlalani nikhangele, hlalani niphaphile.” (Marko 13:33) Ungaze uvumele iziphazamiso zikwenze ube kobude ubuthongo ngokomoya. Kunoko, sisebenzise isiluleko esifumaneka kwiimpapasho zethu nakwiintlanganiso zebandla, kanye njengoko uArielle wenzayo. Njengentsapho kaEmmanuel, zama ukwenza okuthile yonke imihla ukuze uhlale ulungile yaye ‘uhlale ulindile.’

[Umbhalo osemazantsi]

[Umfanekiso okwiphepha 4]

Iingxubusho zeBhayibhile zemihla ngemihla zinceda uEmmanuel nentsapho yakhe ‘bahlale belungile’