Kutheni UThixo EneNtlangano?

Eli nqaku libuza imibuzo ekusenokwenzeka ukuba ukhe wazibuza yona lize likubonise iimpendulo zayo eBhayibhileni. AmaNgqina kaYehova aya kukuvuyela ukuthetha nawe ngeempendulo zale mibuzo.

1. Kwakutheni ukuze uThixo alungelelanise amaSirayeli?

UThixo walungelelanisa inzala kasolusapho uAbraham yaluhlanga waza wayinika imithetho. Olo hlanga walubiza ngokuba nguSirayeli waza walujizeka ngelungelo lokunyamekela unqulo lokwenyaniso neLizwi lakhe, iZibhalo Ezingcwele. (INdumiso 147:19, 20) Ngaloo ndlela, abantu bazo zonke iintlanga babeza kuxhamla.—Funda iGenesis 22:18.

UThixo wakhetha amaSirayeli ukuba abe ngamangqina akhe. Xa ethobela, imithetho kaThixo ayesonwaba. (Duteronomi 4:6) Xa sifunda imbali yamaSirayeli, sinokwazi okungakumbi ngoThixo oyinyaniso.—Funda uIsaya 43:10, 12.

2. Kutheni amaKristu okwenyaniso elungelelanisiwe?

Ekuhambeni kwexesha, amaSirayeli alahlwa nguThixo, waza endaweni yawo uYehova wamisela ibandla lamaKristu. (Mateyu 21:43; 23:37, 38) Ngaphambili, amaSirayeli ayengamangqina kaThixo. Ngoku, amaKristu okwenyaniso ngawo amaNgqina kaYehova.—Funda iZenzo 15:14, 17.

UYesu walungelelanisa abalandeli bakhe ukuba bangqinele uYehova baze benze abafundi abantu bazo zonke iintlanga. (Mateyu 10:7, 11; 24:14; 28:19, 20) Lo msebenzi ufikelela encotsheni. Kuyaqala ngqa, ukuba uYehova amanyanise izigidi zabantu ezivela kuzo zonke iintlanga kunqulo olunyulu. (ISityhilelo 7:9, 10) AmaKristu okwenyaniso alungelelaniswe ukuze akwazi ukukhuthazana nokuncedana. Ehlabathini jikelele, anocwangciso lokufunda iBhayibhile olufanayo kwiintlanganiso zawo.—Funda kumaHebhere 10:24, 25.

3. Kweli xesha lethu, aqala nini amaNgqina kaYehova?

Intlangano yanamhlanje yamaNgqina kaYehova yaqala ngeminyaka ye-1870. Iqela elincinane labafundi beBhayibhile lafumanisa iinyaniso zeBhayibhile ezazingasaziwa. Ayesazi ukuba uYesu Kristu walungelelanisa ibandla lamaKristu ukuze lishumayele. Ngoko ke, aqalisa iphulo lokushumayela ngoBukumkani kwizizwe ngezizwe. Ngowe-1931 amkela igama elithi amaNgqina kaYehova.—Funda iZenzo 1:8; 2:1, 4; 5:42.

4. Alungelelaniswe njani amaNgqina kaYehova namhlanje?

Ngenkulungwane yokuqala, amabandla amakristu kumazwe amaninzi ayesonganyelwa liqumrhu elilawulayo elalimgqala uYesu njengeNtloko yebandla. (IZenzo 16:4, 5) Ngendlela efanayo namhlanje, amaNgqina kaYehova amgqala uYesu njengeNkokeli yawo. (Mateyu 23:9, 10) Kwakhona ancedwa nalukhokelo lweQumrhu Elilawulayo labadala abanamava abalungiselela ukhuthazo olungokweZibhalo nolwalathiso kumabandla angaphezulu kwe-100 000. Kwibandla ngalinye, amadoda afanelekayo akhonza njengabadala okanye abaveleli. La madoda anyamekela umhlambi kaThixo ngothando.—Funda eyoku-1 kaPetros 5:2, 3.

AmaNgqina kaYehova alungelelaniswe ukuze ashumayele iindaba ezilungileyo nokwenza abafundi. Ukuze ancede bonke abantu, aguqulela, ashicilele aze asasaze uncwadi lweBhayibhile ngeelwimi ezingaphezulu kwama-500. Njengabapostile, ashumayela kwindlu ngendlu. (IZenzo 20:20) Azenza afumaneke ukuze afunde iBhayibhile nabantu abanyanisekileyo nabathanda inyaniso. Ekubeni Abantu bakaYehova befuna ukukholisa uThixo nokunceda abanye, bayintlangano yabantu abonwabileyo.—Funda iNdumiso 33:12; iZenzo 20:35.

Ukuze ufumane inkcazelo engakumbi, funda isahluko 19 sencwadi ethi, Yintoni Ngokwenene Efundiswa YiBhayibhile?, epapashwe ngamaNgqina kaYehova.