Abaphumelele Kwiklasi ye-131 Yesikolo SaseGiliyadi
“Vuyisa UYehova”
IINTSAPHO, abahlobo nabo bebeze kuvuyisana nabaphumelele kwiklasi ye-131 yeSikolo seBhayibhile seWatchtower saseGiliyadi bahlanganisana ngoSeptemba 10, 2011. Ekuqaleni kosuku izithethi kuquka nabafundi babenexhala ngenxa yenxaxheba ababeza kuba nayo kucwangciso. Ekuqukunjelweni kocwangciso, bonke ababekho kucwangciso abangama-9 063 zazehlile izibilini yaye bencumile ngenxa yeentetho, imiboniso nodliwano-ndlebe olwalukolo cwangciso.
UStephen Lett, weQumrhu Elilawulayo lamaNgqina kaYehova nobengusihlalo wocwangciso, wanikela intetho yokuqala. Wahlalutya iivesi zeBhayibhile ezibhekisela kuYehova uThixo njengonomzimba wokomfuziselo waza wagxininisa kwezo vesi zichaza indlela uYehova awasebenzisa ngayo amehlo akhe okomfuziselo, iindlebe, izandla neengalo zakhe.
Okokuqala isithethi saxubusha eye-2 yeziKronike 16:9, ethi: “Amehlo [kaYehova] asingasinga emhlabeni wonke ukuba ababonise amandla abo bantliziyo ziphelele kuye.” Abafundi bakhuthazwa ukuba babe nentliziyo ezinikele ngokupheleleyo kuYehova. Baxelelwa ukuba banokumxelisa uThixo ngokukhangela izinto ezintle ebantwini. Emva koko, uMzalwan’ uLett waxubusha eyoku-1 kaPetros 3:12, ethi iindlebe zikaYehova zibhekiswe kwisikhungu samalungisa. Wabongoza abafundi ukuba bahlale benxibelelana noYehova ngomthandazo bekhumbula ukuba ukufuna ngokwenene ukuphulaphula imithandazo yabo.
Saphinda sahlalutya uIsaya 41:13, apho uYehova enza esi sithembiso: “Mna, Yehova uThixo wakho, ndibamba isandla sakho sasekunene, ndithi kuwe, ‘Musa ukoyika. Mna ngokwam ndiza kukunceda.’” Ebabongoza ngokunyanisekileyo, uMzalwan’ uLett wathi: “Khawuve la mazwi achukumisayo kaYehova. Wolula isandla sakhe ukuze asibambe ngesandla.” Emva koko waxelela abafundi ukuba bamvumele uYehova abancede bangaze baxhathise xa ebanceda. Waphinda wathi abafundi nabo banokumxelisa uYehova ngokolula izandla zabo ukuze bancede abanye.
Umzalwan’ u Lett waqukumbela ngokufunda uIsaya 40:11. Wacela abaphulaphuli ukuba bazenzele umfanekiso ngqondweni wokuthantamisa kukaYehova okuchazwa kwesi sibhalo. Wahlabela mgama esithi “uYehova usiqokelela ndawonye ngeengalo zakhe.” “Usithwala ngesifuba sakhe.” Sifanele sisabele njani? Abafundi babongozwa ukuba bahlale belulamile njengetakane elincinane ukwenzela ukuba uYehova akwazi ukubathwala ngesifuba sakhe.
“Obu Buncwane Sibuphethe Ngezitya Zodongwe”
UDavid Splane weQumrhu Elilawulayo wathetha ngalo mxholo. (2 Korinte 4:7) Yintoni ubuncwane? Ngaba lulwazi okanye bubulumko? Isithethi saphendula sathi “Akunjalo,” kunoko “Ubuncwane umpostile uPawulos athetha ngabo ‘bobu bulungiseli bokwenza inyaniso ibonakale.’” (2 Korinte 4:1, 2, 5) Umzalwan’ uSplane wakhumbuza abafundi ukuba ezi nyanga zintlanu baye bazichitha befundiswa bebeqeqeshelwa isabelo esikhethekileyo kubulungiseleli. Eso sabelo simele sixatyiswe kakhulu.
Isithethi sacacisa ukuba ‘izitya zodongwe’ zibhekisela kwimizimba yethu yenyama. Wathelekisa isitya esenziwe ngodongwe nesenziwe ngegolide. Izitya zegolide azisoloko zisetyenziswa. Ngoxa izitya zodongwe zenzelwe ukusetyenziswa rhoqo. Ukuba ubuncwane sibubeka kwisitya segolide, sisenokunikela ingqalelo kwisitya eso kunokuyinikela kubuncwane. Umzalwan’ uSplane wathi: “Nina bafundi anifuni kutsalel’ ingqalelo kuni. Njengabathunywa bevangeli, nifuna ukwalathisa abantu kuYehova. Nizizitya zodongwe ezithozamileyo.”
Isithethi sahlabela mgama sathi ngamaxesha okubhalwa kweBhayibhile ezinye izitya zodongwe zazikwazi ukumelana nomlilo ezinye zazinomaleko owawuzikhusela zingaqephuki. Iyintoni ingongoma? Kwiinyanga zenu zokuqala nisesabelweni, niza kudibana nezinto eziza kunifundisa ukunyamezela. Anizukhathazeka kangako xa nigxekwa, anizukukhawuleza ukukhubeka. Umzalwan’ uSplane wathi: “Niza kufumanisa ukuba nomelele ngakumbi kunokuba benicinga.” Obu buncwane bobulungiseleli, uYehova akabuphathisanga iingelosi kodwa ubuphathise izitya zodongwe. Isithethi saqukumbela ngokuthi “oko kubonisa ukuba uYehova unentembelo kuni.”
‘Ubaleke Namadoda Ahamba Ngeenyawo . . . Ngaba, Ungalubaleka Ugqatso Namahashe?’
USamuel Herd weQumrhu Elilawulayo wabuza ukuba “ungabaleka umgama ongakanani yaye ngesantya esingakanani?” Kwakutheni ukuze ababuze lo mbuzo abafundi? Isithethi sathelekisa amava abafundi nalawo omprofeti uYeremiya. Loo ndoda ithembekileyo yayineengxaki eyayijamelene nazo. Kodwa kwakukho iimvavanyo ezingakumbi ngaphambili. Ngenxa yoko uYehova wambuza oku: “Ukuba ke ubaleke namadoda ahamba ngeenyawo, aza akudinisa, ungalubaleka njani, ngoko, ugqatso namahashe?”—Yeremiya 12:5.
Ebonisa indlela okusebenza ngayo kubafundi, uMzalwan Herd wathi: “Nisenokuvakalelwa kukuba benibaleka namahashe ngenxa yeemviwo eniye nazibhala. Kodwa eneneni benibaleka namadoda, kungekhona namahashe. Kwizabelo zenu niza kubaleka namahashe okanye niza kuqubisana neengxaki ezinkulu ngakumbi kunokuba nicinga. Niza kwenza njani? Uqeqesho lwaseGiliyadi luye lwaniqeqeshela ukuba nikwazi ukubaleka namahashe ningadinwa.” Wakhuthaza abafundi ukuba baqhubeke beziqeqesha ngokomoya, ukuze balondoloze ucwangciso lokufunda iBhayibhile nokuthandaza.
UMzalwan’ uHerd wavuma ukuba kwixa elizayo abanye kwabo bathunywa bevangeli baza kudimazeka okanye bachaswe. Abanye baza kukhathazwa yimpilo okanye bazive bengafaneleki. Kodwa wabaqinisekisa abafundi ukuba banomthombo wamandla oza kubanceda bakwazi ukumelana neemeko ezimbi baze bangadinwa. Isithethi sathi: “Enoba ubaleka namadoda ahamba ngeenyawo okanye namahashe, yiba nentembelo yokuba isandla sikaThixo esinamandla sinokukunceda ulugqibe ugqatso. Niya kwandula ke, nibe ngabathunywa bevangeli abaya kudumisa baze bazukise uYehova.”
Ezinye Iimbalasane Zocwangciso
“Zingabi Mbalwa.” UJohn Ekrann ilungu leKomiti yeSebe yaseUnited States, waxubusha ingxelo ebandakanya umprofeti uEliya nomhlolokazi owayenoonyana ababeza kuthengiswa njengamakhoboka. (2 Kumkani 4:1-7) Lo mhlolokazi wayenengqayi encinane yokugcina ioli. UElisha wamyalela ukuba aboleke izitya kubamelwane bakhe, esithi: “Zingabi mbalwa.” Esebenzisa uElisha, uYehova ngokungummangaliso wazizalisa ngeoli zonke ezo zitya zazibolekwe ngulo mhlolokazi. Lo mhlolokazi wathengisa ioli waza wafumana imali eyaneleyo ukuze akwazi ukuhlawula amatyala nokuxhasa intsapho yakhe kangangexesha elithile.
Ziziphi izifundo ezinokufundwa ngabathunywa bevangeli bexesha elizayo kule ngxelo? Xa lo mhlolokazi wayeqokelela ezi zitya, ufanele ukuba wayengakhethi. Isithethi sathi: “Ufanele ukuba wathatha nasiphi na isitya asifumanayo esasinokufaka ioli, ngokukodwa ezikhulu.” Umzalwan’ uEkrann wabongoza abafundi ukuba bathabathe nasiphi na isabelo abasinikwayo enoba sikhulu okanye sincinane. Wathi: “Ze ningakhethi.” Kwakhona wakhumbuza abafundi ukuba iintsikelelo ezafunyanwa ngulo mhlolokazi zazixhomekeke ekuphulaphuleni imiyalelo kaElisha. Yayiyintoni ingongoma yakhe? Umlinganiselo weentsikelelo esizifumanayo uxhomekeke ekuzibhokoxeni nakukholo lwethu. Isithethi saqukumbela ngokuthi: “Ningazibandezi.”
“Basisonka Sethu.” UWilliam Samuelson, umveleli weSebe leZikolo Zobulungiseleli Zobuthixo, waxubusha umxholo othatyathwe kwiNumeri 14:9. Wabalaselisa umzekelo omhle kaYoshuwa noKalebhi. Ibinzana elithi “isonka” libonisa ukuba kwakuza kubalula ukuwoyisa amaKanan yaye lo mava ayeza kuwomeleza amaSirayeli. Sisiphi isifundo esifundwa ngabafundi? Isithethi sathi: “Kwixa elizayo kumsebenzi wobulungiseleli, nalu phi na ucelomngeni zenilujonge njengento eza kunomeleza ize inigcine enkonzweni.”
“Ngaba Inqanawa Yenu Yokholo Ibanjwe Nkqi Yiankile Ukuze Imelane Neenkqwithela Ezivelayo?” USam Roberson, omnye wabahlohli, waxubusha isilumkiso sikampostile uPawulos sokuba abanye baye “baphukelwa yinqanawa mayelana nokholo.” (1 Timoti 1:19) Wabongoza abafundi ukuba bakhe ukholo olomeleleyo kwabanye olusekelwe kuYehova uThixo. Wathi: “Umsebenzi wenu, unokufaniswa nowomntu osebenza ngesinyithi.” Ngayiphi indlela? Umntu osebenza ngesinyithi udibanisa amakhonkco etyathanga elinokubamba inqanawa. Ngendlela efanayo, abathunywa bevangeli banceda izifundo zeBhayibhile zakhe iimpawu zokomoya ezifunekayo ukuze zisindiswe.
Isithethi sanxulumanisa la makhonkco amatyathanga neempawu ezisibhozo ezikweye-2 kaPetros 1:5-8. UMzalwana uRoberson wathi ukuba bayazinceda izifundo zabo zeBhayibhile zibone indlela uYehova azibonisa ngayo ezo mpawu, ezo zifundo nazo ziya kuba nolwalamano olungaqhawukiyo noYehova. Baya kukwazi ukumelana nalo naluphi na uqhwithela olunokuvavanya ukholo lwabo.
Amava Nodliwano Ndlebe
UMichael Burnett, omnye wabahlohli baseGiliyadi wacela abafundi ukuba babalise baze benze umboniso ngaloo mava. Abaphulaphuli bavuyiswa kukuva indlela abafundi abashumayela ngayo komnye ubhazabhaza wevenkile, kwsikhululo senqwelo-moya, kwindlu ngendlu kwanesefowunini kumntu owayefowunele inombolo engeyiyo.
UMichael Hansen weNtsapho yaseBheteli yaseUnited States wadlan’ indlebe namadoda amathathu angabathunywa bevangeli abanamava—Stephen McDowell ePanama, uMark Noumair eKenya noWilliam Yasovsky eParaguay. Amagqabaza abo ayebalaselisa umxholo wenxalenye ethi, “Yoliswa Kukwenza Ukuthanda KukaYehova.” (INdumiso 40:8) Ngokomzekelo uMark Noumair, uthethe ngezinto ezibonwabisayo yena nomfazi wakhe kwisabelo sabo. Ubuhlobo abaye babakha namaNgqina asekuhlaleni babangela ukuba esi sibini saneliseke. Ezinye izinto ezibavuyisa ziquka ukubona abazalwana belandela izinto abazifundiswayo, bebabona besenza utshintsho olukhulu ebomini babo nendlela uYehova awusikelela ngayo umgudu wabo. Wabaqinisekisa abafundi ukuba baza kufumana olona vuyo kwixesha elizayo.
Emva kokuba omnye wabafundi efunde ileta eluchaza kakuhle uxabiso lwabafundi, uMzalwan’ uLett waqukumbela ucwangciso ngokukhuthaza abafundi ukuba benze izinto ngobulumko. Wathi ukuba benjenjalo, ‘baya kumvuyisa uYehova.’ Ngokuqinisekileyo aba bathunywa bevangeli baza kumvuyisa uYehova njengoko bemkhonza ngokuthembeka kwizabelo zabo.—Isaya 65:19.
[Isicangca/Imaphu ekwiphepha 31]
INKCAZELO NGABAFUNDI
10 inani lamazwe abavela kuwo
34.7 umlinganiselo weminyaka yobudala
19.0 umlinganiselo weminyaka bebhaptiziwe
13.5 umlinganiselo bekwinkonzo yexesha elizeyo
[Imaphu]
(Ukuba ufuna inkcazelo ehlahlelwe kakuhle, yiya kwimpapasho)
Abafundi bathunyelwe kumazwe aboniswe ngezantsi
IZABELO ZABATHUNYWA BEVANGELI
BENIN
BRAZIL
BULGARIA
BURUNDI
CAMEROON
CANADA
CENTRAL AFRICAN REPUBLIC
GERMANY
GHANA
HONG KONG
INDONESIA
KENYA
LIBERIA
LITHUANIA
MALAYSIA
MOZAMBIQUE
NEPAL
PANAMA
PARAGUAY
SIERRA LEONE
SLOVAKIA
SOUTH AFRICA
UNITED STATES OF AMERICA
VENEZUELA
[Umfanekiso okwiphepha 30]
Abafundi baseGiliyadi bebonisa indlela ebebeshumayela ngayo
[Umfanekiso okwiphepha 31]
Abaphumeleleyo Kwiklasi Ye-131 Yesikolo SeWatchtower SaseGiliyadi
Kuludwe olungezantsi, kuqalwa ukusuka kuluhlu olungaphambili ukusa kolungasemva yaye amagama adweliswe ukusuka ekhohlo ukusa ekunene kuluhlu ngalunye.
(1) Lesch, C., Lesch, N.; Shakarjian, P., Shakarjian, T.; Budden, R.; Budden, K.; Nash, T.; Nash, L.
(2) Tremblay, E.; Tremblay, C.; Garvey, D.; Garvey, G.; Gaunt, R.; Gaunt, P.; Lau, J.; Lau, J.
(3) Davis, S.; Davis, S.; Sargeant, J.; Sargeant, J.; Fonseca, C.; Fonseca, S., E.; Thenard, A.
(4) Petratyotin, A.; Petratyotin, R.; Reyes, N.; Reyes, N.; Eisiminger, B.; Eisiminger, S.; Hacker, J.; Hacker, C.
(5) Hartman, E.; Hartman, T.; Goolia, W.; Goolia, K.; Thomas, J.; Thomas, E.; Okazaki, N.; Okazaki, M.
(6) Mills, C., A.; Benning, L.; Benning, T.; Sobiecki, S.; Sobiecki, T.; Gagnon, L.; Gagnon, E.
(7) Hansen, B.; Hansen, M., A.; Fahie, M.; Dalgaard, J.; Dalgaard, J.; Andersson, M.; Andersson, R.