Kutheni UThixo Efuna Abanquli Bakhe Batshatane Bodwa?

▪ UMthetho kaThixo owawusiya kumaSirayeli wawuquka lo myalelo mayela neentlanga ezaziwangqongile: “Uze ungendiselani nazo. Intombi yakho uze ungayiniki unyana wakhe, nentombi yakhe uze ungayithabatheli unyana wakho.” (Duteronomi 7:3, 4) Kwakutheni ukuze awalele amaSirayeli?

UYehova wayesazi ukuba uSathana wayefuna ukubonakalisa abantu bakhe, abenze banqule oothixo bobuxoki. UThixo wabalumkisa ukuba, abantu abangakholwayo ‘baya kumtyekisa unyana wakho ekundilandeleni, baze ngokuqinisekileyo bakhonze thixo bambi.’ Kuninzi okwakubandakanyekile apha. Ukuba uhlanga lwakwaSirayeli lwalunokukhonza abanye oothixo, lwaluza kuphulukana nenkoliseko kaThixo nokukhuselwa nguye, luze lube zizisulu kwiintshaba zalo. Lwaluza kumvelisa njani olu hlanga uMesiya othenjisiweyo? Kucacile, ukuba uSathana wayenesizathu sokurhwebesha amaSirayeli atshate abantu abangakholwayo.

Kwelinye icala, ukhumbule ukuba uThixo ubakhathalele ngokwabantu ngabanye abantu bakhe. Wayesazi ukuba ulonwabo nentlalo ntle yakhe ngamnye wabo yayixhomekeke ekubeni nolwalamano olusondeleyo naye njengoThixo wabo. Ngaba ukuxhalabela kukaYehova impembelelo eyingozi yeqabane elingakholwayo kwakunesizathu? Khawuqwalasele lo mzekelo kaKumkani uSolomon. Wayesazi isilumkiso sikaYehova ngabafazi abangakholwayo esithi: “Ziya kwenza intliziyo yenu ityekele ekulandeleni oothixo bazo.” Ekubeni wayelumke ngendlela engaqhelekanga, mhlawumbi wayevakalelwa kukuba isiluleko sikaYehova sasingasebenzi kuye. Akazange asinanze. Waba yintoni umphumo? “Abafazi bakhe bayityekisa intliziyo yakhe . . . ekulandeleni abanye oothixo.” Enjani intlekele! USolomon walahlwa nguYehova, yaye abantu bakhe bohlukana phakathi ngenxa yokungathembeki kwakhe.—1 Kumkani 11:2-4, 9-13.

Abanye basenokuthi zazikho imeko ezikhethekileyo. Ngokomzekelo, uMahalon ongumSirayeli watshata noRute owayenguMowabhikazi, waza waba ngumnquli obalaseleyo. Kodwa ukutshata nebhinqa elingumMowabhi yayilukhetho oluyingozi. UMahalon akanconywa ngokutshata nentombi yakwaMowabhi; wabhubha eselula, mhlawumbi ngaphambi kokuba uRute abize uYehova ngokuba nguThixo wakhe. Umntakwabo Mahalon uKiliyon, naye watshata nentombi yakwaMowabhi uOrpa, eyayibathanda “oothixo bayo.” Kwelinye icala, uBhohazi watshata noRute emva Kwexesha elithile enqula uThixo. Eneneni, amaYuda ayemgqala “njengeguquka elifanelekileyo.” Umtshato kaRute noBhohazi waba yintsikelelo kubo bobabini.—Rute 1:4, 5, 15-17; 4:13-17.

Ngaba kububulumko, ukuqiqa ngelokuba umzekelo kaMahalon noRute ubonisa ukuba isiluleko sikaYehova sokuba kutshatwe enkosini kuphela asisebenzi? Enyanisweni, ngaba ukuqiqa ngaloo ndlela bekungayi kufana nomntu oye wafumana isithonga semali ngokungcakaza aze emva koko akhuthaze abantu ukuba baphile ngokungcakaza?

IBhayibhile ibongoza amaKristu namhlanje ukuba atshate “eNkosini kuphela.” Ilumkisa nxamnye ‘nokubotshwa dyokhweninye nabangakholwayo.’ Eso silumkiso sijoliswe kumaKristu okwenyaniso afuna iqabane. Kwabo sele betshate nabantu abangakholwayo, iBhaybhile inikela isiluleko esiluncedo ngendlela yokuhlangabezana nemeko elucelomngeni. (1 Korinte 7:12-16, 39; 2 Korinte 6:14) Esi siluleko sibonisa ukuba uYehova uThixo, uMyili womtshato, ufuna sonwabe, njengabanquli bakhe—enoba asitshatanga okanye sitshatile.