IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w12 8/15 iphe. 3-7
  • “Ndinani”

No video available for this selection.

Sorry, there was an error loading the video.

  • “Ndinani”
  • IMboniselo Evakalisa UBukumkani BukaYehova—2012
  • Imixholwana
  • Amanqaku Afanayo
  • “ULWAZI LOKWENYANISO” LUYAFUNYANWA
  • “ABANINZI” BAMKELA “ULWAZI LOKWENYANISO”
  • “ULWAZI LOKWENYANISO” LUBA “LUNINZI”
  • ULWAZI NGOTHIXO LUYA KUZALISA UMHLABA
  • Uluntu Kufuneka Lube Nolwazi NgoThixo
    IMboniselo Evakalisa UBukumkani BukaYehova—1996
  • Ukushumayela Ekuhleni Nakwizindlu Ngezindlu
    AmaNgqina KaYehova—Abavakalisi Bobukumkani BukaThixo
  • Ukukhula Kulwazi Oluchanileyo Lwenyaniso
    AmaNgqina KaYehova—Abavakalisi Bobukumkani BukaThixo
  • UBukumkani Buyazalwa Ezulwini
    UBukumkani BukaThixo Buyalawula!
Khangela Okunye
IMboniselo Evakalisa UBukumkani BukaYehova—2012
w12 8/15 iphe. 3-7

“Ndinani”

“Abaninzi baya kuphengulula, yaye ulwazi lokwenyaniso luya kuba luninzi.”—DAN. 12:4.

UBUYA KUPHENDULA UTHINI?

“Ulwazi lokwenyaniso” luye lwaziwa njani namhlanje?

Baye baba ‘baninzi’ njani abo bamkela inyaniso?

Ulwazi lokwenyaniso luye lwenziwa ‘lwaluninzi’ ngaziphi iindlela?

1, 2. (a) Sazi njani ukuba uYesu ukunye nabalawulwa bakhe namhlanje nokuba uya kuba nabo nakwixesha elizayo? (b) Ngokutsho kukaDaniyeli 12:4, ukuzifunda ngenyameko iZibhalo kuya kuphumela entwenini?

KHAWUZIBONE useParadesi. Ntsasa nganye uvuka uhlaziyekile yaye ukulungele ukuqalisa usuku. Akubikwa hlaba. Nasiphi na isiphene obunaso asisekho. Uyabona, uyeva, uyasezela, uyabamba uze ungcamle ngokugqibeleleyo. Unamandla, uyawunandipha umsebenzi owenzayo, unabahlobo abaninzi yaye akunanto ikukhathazayo. Uya kunandipha ezo ntsikelelo xa kulawula uBukumkani bukaThixo. UKristu Yesu, uKumkani omiselweyo, uya kubasikelela aze abafundise ngoYehova bonke abalawulwa bakhe.

2 UYehova uya kubaxhasa bonke abakhonzi bakhe abathembekileyo njengoko beza kube bexakeke ngumsebenzi wokufundisa ehlabathini. Kangangeenkulungwane uThixo kunye noNyana wakhe bebesoloko bebaxhasa abo bathembekileyo. Ngaphambi kokuba anyukele ezulwini, uYesu wabaqinisekisa abafundi bakhe abathembekileyo ukuba uya kuba nabo. (Funda uMateyu 28:19, 20.) Ukuze someleze ukholo lwethu ngoko kwathethwa nguYesu, makhe sihlolisise nje isivakalisi sibe sinye kwisiprofeto esiphefumlelwe nguThixo, esabhalelwa kwiBhabhiloni yamandulo kwiminyaka engama-2 500 eyadlulayo. Ethetha ‘ngexesha lesiphelo’ esiphila kulo namhlanje, umprofeti uDaniyeli wabhala wathi: “Abaninzi baya kuphengulula, yaye ulwazi lokwenyaniso luya kuba luninzi.” (Dan. 12:4) Ngokufuziselayo nangokuvisisana nezibakala ezikhoyo namhlanje, isenzi sesiHebhere esithi ‘ukuphengulula’ sidlulisela ingcamango yokuhlolisisa ngenyameko. Ngokwenene ukuphengulula kunokuphumela kwiintsikelelo ezininzi! Abo bazifunda ngenyameko iZibhalo baya kusikelelwa ngolwazi oluyinyaniso okanye oluchanileyo lweLizwi likaThixo. Esi siprofeto sikwabonisa ukuba abantu abaninzi baya kulwamkela “ulwazi lokwenyaniso.” Ukongezelela, olo lwazi luya kuba yintabalala. Luya kudluliselwa kumntu wonke. Njengoko sihlolisisa indlela esiye sazaliseka ngayo esi siprofeto, siza kubona ukuba uYesu ukunye nabafundi bakhe namhlanje nokuba uYehova unamandla okuzalisekisa konke akuthembisileyo.

“ULWAZI LOKWENYANISO” LUYAFUNYANWA

3. Kwenzeka ntoni ‘kulwazi lokwenyaniso’ emva kokufa kwabapostile?

3 Emva kokufa kwabapostile, kwavela uwexuko ekwakuthethwe ngalo kumaKristu okwenene yaye lwanwena okomlilo wedobo. (IZe. 20:28-30; 2 Tes. 2:1-3) Kangangeenkulungwane emva koko, “ulwazi lokwenyaniso” lwalufumaneka nzima kungekuphela nje kubantu abangazi nowathwethwa ngeBhayibhile kodwa kwanakwabo bazibiza ngokuba ngamaKristu. Nangona zazisithi ziyazikholelwa iZibhalo, iinkokeli zeNgqobhoko zazifundisa ubuxoki—“iimfundiso zeedemon” ezazibonisa indelelo kuThixo. (1 Tim. 4:1) Abantu abaqhelekileyo babekubumnyama bokomoya. Kwakukho neemfundiso zabawexuki eziquka imfundiso yobuxoki yokuba, uThixo unguBathathu Emnye, umphefumlo awufi nokuba eminye imiphefumlo ingcungcuthekiswa ngonaphakade esihogweni.

4. Iqela lamaKristu leminyaka yee-1870 laqalisa njani ukuphanda ‘ngolwazi lokwenyaniso’?

4 Noko ke, ngeminyaka yee-1870—malunga namashumi amane eminyaka ngaphambi kokuqalisa ‘kwemihla yokugqibela’—iqaqobana lamaKristu anyanisekileyo ePennsylvania, eUnited States lahlanganisana ukuze lifunde iBhayibhile ngenyameko lize liphande ‘ulwazi lokwenyaniso.’ (2 Tim. 3:1) Lazibiza ngokuba ngaBafundi BeBhayibhile. Aba ‘babengezozilumko neengqondi’ uYesu awathi ngazo ziya kufihlelwa ulwazi. (Mat. 11:25) Babengabantu abathobekileyo ababekunqwenela ngokunyanisekileyo ukwenza ukuthanda kukaThixo. Befunda ngenyameko yaye bethandaza, baxubusha baza bacamngca ngeZibhalo. Kwakhona babethelekisa iindinyana zeBhayibhile baze bahlolisise imibhalo yabanye abantu abenza uphando olufanayo. Ngokuthe ngcembe, aba Bafundi BeBhayibhile bayiqonda inyaniso eyayibasithele kangangeenkulungwane.

5. Yayiyintoni injongo yongcelele lwamaphecana abizwa ngokuba yiThe Old Theology?

5 Nangona aBafundi BeBhayibhile babezivuyela izinto ezintsha ababezifunda, abazange bavumele olo lwazi lutsha lubenze bazikhukhumalise; bengazange bazizukise kuba bevakalisa into entsha. (1 Kor. 8:1) Kunoko, bapapasha ungcelele lwamaphecana abizwa ngokuba yiThe Old Theology. Injongo yawo yayikukuqhelanisa abafundi neenyaniso zeZibhalo ezibhalwe eBhayibhileni. Iphecana lokuqala kolo ngcelele lanceda “kakhulu ekufundweni kweBhayibhile, kwaba ke ngaloo ndlela kwahlukanwa nazo zonke izithethe zabantu ezibubuxoki kwaza kwabuyelwa ngokupheleleyo kwiimfundiso zakudala zeNkosi yethu nezabapostile.”—The Old Theology, No. 1, April 1889, p. 32.

6, 7. (a) Ziziphi iinyaniso esiye sancedwa ukuba siziqonde ukususela ngeminyaka yee-1870? (b) Ziziphi iinyaniso oye wakuxabisa ngokukhethekileyo ukuzifunda?

6 Zimangalisa ngokwenene iinyaniso ezatyhilwa ekuqaleni kweminyaka eli-100 eyadlulayo!a Ezi nyaniso asizozinto nje zidinayo nezintsonkothileyo ezixutyushwa ngabefundisi. Zisenza sonwabe, ziyasikhulula, zisenza sibe nenjongo ebomini bethu size sibe nethemba. Zisinceda simazi uYehova—ubuntu bakhe obuthandekayo neenjongo zakhe. Kwakhona zisichazela ngendima kaYesu, isizathu sokuba aphile aze afe noko akwenzayo ngoku. Ezi nyaniso zixabisekileyo zisityhilela isizathu sokuba uThixo avumele ubungendawo, isizathu sokuba sife, indlela esifanele sithandaze ngayo nendlela esinokonwaba ngayo ngokwenene.

7 Ngoku sinokuyazi intsingiselo yeziprofeto ebezikade ‘ziyimfihlelo’ kangangeminyaka emininzi kodwa ezisele zizaliseka kweli xesha lesiphelo. (Dan. 12:9) Ezi nyaniso ziquka ezo zikwiZibhalo, ngokukodwa ezikwiincwadi zeVangeli neyeSityhilelo. UYehova wasinceda saqonda iziganeko esasingenakuzibona ngamehlo ethu—ukubekwa kukaYesu etroneni, imfazwe eyayisezulwini nokulahlelwa kukaSathana emhlabeni. (ISityhi. 12:7-12) Kwakhona uThixo usincede saqonda noko sinokukubona—iimfazwe, iinyikima zomhlaba, iindyikitya zokufa, ukunqongophala kokutya nabantu abangenabuthixo abanegalelo kula “maxesha amanqam ekunzima ukujamelana nawo.”—2 Tim. 3:1-5; Luka 21:10, 11.

8. Ngubani esimbulelayo ngezinto esizibonileyo nesizivileyo?

8 Kulula ukukuqonda oko uYesu wakuxelela abafundi bakhe esithi: “Anoyolo amehlo abona izinto enizibonayo. Kuba ndithi kuni, abaprofeti nookumkani abaninzi babenqwenela ukuzibona izinto enizibonayo kodwa abazibona, nokuva izinto enizivayo kodwa abaziva.” (Luka 10:23, 24) Siyambulela uYehova uThixo ngokusinceda sibone size sive izinto ezinjalo. Sinombulelo kuba sithunyelelwe “umncedi,” umoya oyingcwele kaThixo ukuze njengabalandeli bakaYesu usikhokelele “kuyo yonke inyaniso”! (Funda uYohane 16:7, 13.) Ngamana singasoloko siluxabisa “ulwazi oluyinyaniso” size sabelane nabanye ngalo!

“ABANINZI” BAMKELA “ULWAZI LOKWENYANISO”

9. Kwinqaku leli phephancwadi kwahlatywa liphi ikhwelo ngoAprili 1881?

9 NgoAprili 1881, ngaphantsi kweminyaka emibini emva kokupapashwa okokuqala kweMboniselo, eli phephancwadi lahlab’ ikhwelo lokufuna abashumayeli abali-1 000. Eli nqaku lalisithi: “Kwabo banokunikela ngenxalenye yexesha labo okanye bazinikele ngokupheleleyo kumsebenzi weNkosi sineli cebiso . . . , : Yiyani kwizixeko ezikhulu okanye ezincinane, nenze oko ninokukwazi ukukwenza njengeeColporteurs okanye njengaBashumayeli beVangeli ukufuna kwindawo nganye amaKristu anyanisekileyo, uninzi lwawo olunenzondelelo kuThixo kodwa kungekhona ngokuvisisana nolwazi; aba bachazeleni ngobuncwane benceba yoBawo wethu nobuhle belizwi Lakhe.”

10. Basabela njani abantu kwikhwelo lokufunwa kwabashumayeli bexesha elizeleyo?

10 Elo khwelo libonisa ukuba aBafundi BeBhayibhile babeqonda ukuba owona msebenzi ubalulekileyo wamaKristu okwenene kukushumayela iindaba ezilungileyo. Kodwa nakuba babengamakhulu nje ambalwa abantu ababesiya kwiintlanganiso zaBafundi BeBhayibhile ngelo xesha, usukelo ababenalo lokufuna abashumayeli bexesha elizeleyo abali-1 000 babeqinisekile ngalo. Noko ke, babesithi bakufunda iphecana okanye iphephancwadi, abantu abaninzi baqonde ukuba bafumene inyaniso baze bakhawuleze basabele kweli khwelo. Ngokomzekelo ngowe-1882, emva kokufunda inqaku elikwiMboniselo kunye nencwadana eyapapashwa ngaBafundi BeBhayibhile, omnye umfundi waseLondon, eNgilani wabhala wathi: “Ndicela nindifundise indlela yokushumayela ukuze ndenze lo msebenzi usikelelwa nguThixo nanqwenela ukuba siwenze.”

11, 12. (a) Injongo esinayo ifana njani naleyo yeecolporteurs? (b) Iicolporteurs zaziseka njani “iiklasi” okanye amabandla?

11 Ngowe-1885 babemalunga nama-300 aBafundi BeBhayibhile ababeziicolporteurs. Abo balungiseleli bexesha elizeleyo babenenjongo efana nale sinayo namhlanje—ukwenza abafundi bakaYesu Kristu. Noko ke, babesenza ngendlela eyahlukileyo kweyethu. Namhlanje, sifundela umntu abe mnye ngexesha. Emva koko simmemela kwibandla elisele likho kakade. Ngaphambili iicolporteurs zazihambisa iincwadi zize zihlanganise abantu abanomdla ukuze bafunde iZibhalo njengeqela. Kunokuba zifundele umntu omnye, zaseka “iiklasi” okanye amabandla.

12 Ngokomzekelo, ngowe-1907 elinye iqela leecolporteurs laya kwesinye isixeko lisephulweni lokukhangela abo babesele beneMillennial Dawn (ekwabizwa ngokuba yiStudies in the Scriptures). Enye iMboniselo yakha yathi: “Aba [banomdla] babehlanganiselwa kwikhaya lomnye wabo. Ngayo yonke loo mini yangeCawa enye iColporteur yaxubusha nabo incwadi ethi Divine Plan of the Ages, yaye kwiCawa elandelayo yacela ukuba kubekho iintlanganiso rhoqo.” Ngowe-1911, abazalwana bayitshintsha le ndlela. Abalungiseleli abahambahambayo abakhethekileyo abangama-58 banikela iintetho zesidlangalala eUnited States nakwiKhanada yonke. Aba bazalwana babhala amagama neeadresi zabantu abanomdla ababesiza kwezi ntetho baza balungiselela ukuba baqalise ukuba neentlanganiso njengamaqela emakhayeni abantu ukuze kwenziwe “iiklasi” ezintsha. Ngowe-1914, ehlabathini lonke kwakukho amabandla aBafundi BeBhayibhile abali-1 200.

13. Yintoni ebangel’ umdla kuwe ngokusasazeka ‘kolwazi lokwenyaniso’ namhlanje?

13 Namhlanje, ehlabathini lonke kukho amabandla amalunga ne-109 400 yaye abazalwana noodade abamalunga ne-895-800 bangoovulindlela. Ngoku abantu abamalunga nezizigidi ezisibhozo bamkela “ulwazi lokwenyaniso,” bephila ngokuvisisana nalo. (Funda uIsaya 60:22.)b Oku kubangel’ umdla ekubeni uYesu waxela kwangaphambili ukuba abafundi bakhe baza “kuthiywa ngabantu bonke” ngenxa yegama lakhe. Ukongezelela wathi abalandeli bakhe baza kutshutshiswa, bavalelwe entolongweni bade babulawe. (Luka 21:12-17) Nangona bechaswa nguSathana, iidemon zakhe nabantu, abantu bakaYehova baye bawuphumeza ngendlela engathethekiyo umsebenzi wokwenza abafundi. Namhlanje bashumayela “kuwo wonke umhlaba omiweyo,” kumahlathi achumileyo, kumathafa abandayo, ezintabeni, entlango, kwizixeko nakwiilali ezikwanti. (Mat. 24:14) Bebengenakuze bakwazi ukukwenza oku bengaxhaswa nguThixo.

“ULWAZI LOKWENYANISO” LUBA “LUNINZI”

14. “Ulwazi lokwenyaniso” luye lwasasazwa njani ngokubanzi ngoncwadi oluprintiweyo?

14 “Ulwazi lokwenyaniso” lube lwaba luninzi ngenxa yabantu abaninzi abaye bavakalisa iindaba ezilungileyo. Kanti luye lwaluninzi ngenxa yoncwadi oluprintwayo. NgoJulayi 1879, aBafundi BeBhayibhile bapapasha inkupho yokuqala yeli phephancwadi, elalinomxholo othi Zion’s Watch Tower and Herald of Christ’s Presence. Bacela enye inkampani yokushicilela ukuba ibaprintele iikopi zesiNgesi ezingama-6 000 nje kuphela. Kwakhethwa uCharles Taze Russell owayeneminyaka engama-27 ubudala ukuba abe ngumhleli, nabanye aBafundi beBhayibhile abaqolileyo abahlanu ababenikela ngamanqaku rhoqo. Sithethanje, iMboniselo ipapashwa ngeelwimi ezili-195. Ilelona phephancwadi lisasazwe kakhulu ehlabathini yaye kusasazwe iikopi ezingama-42 182 000 kwinkupho nganye. Kulandela iqabane layo uVukani!, ekuye kwasasazwa iikopi zakhe ezingama-41 042 000 ngeelwimi ezingama-84. Ukongezelela, nyaka ngamnye kuprintwa iincwadi neeBhayibhile ezimalunga ne-100 lezigidi.

15. Umsebenzi wethu wokuprinta uxhaswa njani?

15 Lo msebenzi mkhulu kangaka uxhaswa ngeminikelo yokuzithandela. (Funda uMateyu 10:8.) Oko kuyabamangalisa abo baprintayo, ekubeni beziqonda kakuhle iindleko zoomatshini bokushicilela, iphepha, i-inki nezinye izinto. Omnye umzalwana osebenza ngokuthenga izinto ehlabathini lonke wathi: “Oosomashishini abatyelela iindawo zethu zokushicilela bayothuka bakufumanisa ukuba, oomatshini abaphucuke kangaka nabavelisa iimpapasho ezininzi bathengwa ngeminikelo yokuzithandela. Iyabachukumisa nento yokuba abasebenzi baseBheteli beselula yaye bonwabile.”

ULWAZI NGOTHIXO LUYA KUZALISA UMHLABA

16. Yintoni injongo yokwazisa “ulwazi lokwenyaniso?”

16 “Ulwazi lokwenyaniso” luye lwaba luninzi ngenxa yenjongo ethile. Ukuthanda kukaThixo kukuba “zonke iintlobo zabantu zisindiswe zize zifikelele elwazini oluchanileyo lwenyaniso.” (1 Tim. 2:3, 4) UYehova ufuna abantu bayazi inyaniso ukuze bamkhonze ngendlela efanelekileyo baze bafumane iintsikelelo zakhe. Ngokwazisa “ulwazi lokwenyaniso,” uYehova wahlanganisa intsalela ethembekileyo yamaKristu athanjisiweyo. “Kuzo zonke iintlanga nezizwe nezizwana neelwimi,” ukwahlanganisa “isihlwele esikhulu” esinethemba lokuphila ngonaphakade emhlabeni.—ISityhi. 7:9.

17. Kubonisa ntoni ukwanda konqulo lokwenyaniso?

17 Ukwanda konqulo lokwenyaniso ebudeni beminyaka eli-130 edluleyo kusenza sifikelele kwisigqibo sokuba uThixo noKumkani wakhe ammiseleyo, uYesu Kristu bebekunye nabakhonzi bakaYehova abasemhlabeni—bebalathisa, bebakhusela, bebalungelelanisa yaye bebafundisa. Kwakhona olu lwando lusenza siqiniseke ukuba izithembiso zikaYehova zekamva ziza kuzaliseka. “Umhlaba ngokuqinisekileyo uya kuzaliswa kukwazi uYehova njengamanzi egubungele ulwandle.” (Isa. 11:9) Uluntu luya kunandipha iintsikelelo ezingathethekiyo!

[Imibhalo esemazantsi]

a Kuya kukunceda kakhulu ukubukela iDVD ethi Jehovah’s Witnesses—Faith in Action, Part 1: Out of Darkness nethi Jehovah’s Witnesses—Faith in Action, Part 2: Let the Light Shine.

b Sicela ufunde iphepha 320 lencwadi ethi Isiprofeto SikaIsaya—Ukhanyiselo Lwalo Lonke Uluntu II

[Umfanekiso okwiphepha 6]

ABafundi BeBhayibhile bangaphambili babengabantu abathobekileyo ababekunqwenela ngokunyanisekileyo ukwenza ukuthanda kukaThixo

[Umfanekiso okwiphepha 7]

UYehova uyayixabisa imigudu oyenzayo ekusasazeni “ulwazi lokwenyaniso” lukaThixo

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share