Xelisa Ukholo Lwabo
1. Siza kufunda ntoni kwiSifundo SeBhayibhile Sebandla ukususela kwiveki eqala ngo-Oktobha 19?
1 Ukususela kwiveki eqala ngo-Oktobha 19, 2015, kwiSifundo SeBhayibhile Sebandla siza kufunda incwadi ethi Xelisa Ukholo Lwabo. Le ncwadi ixubusha ngamadoda namabhinqa okholo ayi-14 ekuthethwa ngawo eBhayibhileni. Ibhalwe ngendlela esinceda sikwazi ukuzenzela umfanekiso ngqondweni waba bantu, ukuze sibabone njengabantu abaqhelekileyo ababeneengxaki njengoko bekhonza uYehova. Le ncwadi isifundisa ngezi ngxelo ukuze sikwazi ukuzisebenzisa kubomi bethu banamhlanje.—Heb. 6:12.
2. Chaza ezinye zezinto ezikwincwadi ethi Xelisa Ukholo Lwabo.
2 Izinto Ezikule Ncwadi: Le ncwadi iquka umsinga wexesha neemaphu zokusinceda siqonde ukuba wayephila nini yaye phi lo mntu sifunda ngaye. Ngaphezu koko, isahluko ngasinye sinendawo ethi, “Khawucinge Ngoku. . . ,” eza kusinceda sicingisise ngezi ngxelo nendlela yokwenza izinto esizifundileyo. Inayo nemifanekiso emibalabala, eneenkcukacha nephandwe kakuhle, ukusinceda sizenzele umfanekiso ngqondweni.
3. Sinokwenza ntoni ukuze singenelwe ekufundeni le ncwadi?
3 Indlela Enokukunceda Ngayo: Ileta evela kwiQumrhu Elilawulayo esekuqaleni inala mazwi akhuthazayo: “Zibone ngeliso lengqondo iindawo ekuthethwa ngazo. Yiba ngathi uyaziva iimvakalelo zabo kuthethwa ngabo, ubone nezinto abazibonayo. Thelekisa indlela abenza ngayo izinto nendlela obuya kuzenza ngayo wena” Ukubona izinto ngeliso lengqondo kuthetha ukuba nomfanekiso ngqondweni wento ethethwa yiloo ngxelo iphefumlelweyo uze uvelane nabo bantu kuthethwa ngabo. Ukwenza oko kufuna ixesha nokucingisisa. (Neh. 8:8) Ukuba isifundo saloo veki siqala phakathi kwisahluko, umqhubi uya kuqala ngempinda yesifundo esidluleyo yemizuzwana eyi-30 ukuya kweyi-60. Ukuba ayikho kweso sifundo indawo ethi “Khawucinge Ngoku. . . ,” kunokubuzwa umbuzo omnye okanye emibini njengempinda yokuqukumbela.
4. Kutheni kufuneka sifunde incwadi ethi Xelisa Ukholo Lwabo?
4 Siphila kwihlabathi elifuna ukuphelisa okanye ukuthothisa ukholo lwethu ngandlela ithile yonke imihla. Le ncwadi—kuquka namanqaku akungcelele lweMboniselo esekelwe kulo—sisipho esivela kuYehova ukuze asincede siqinise ukholo lwethu. (Yak. 1:17) Masixhakamfule eli thuba lokuyifunda kunye le ncwadi ngokubakho kwiSifundo SeBhayibhile Sebandla nangokugqabaza kangangoko sinako!