Ubulumko Bokwenene Butsho Ngesikhalo Esikhulu

1. Baye bathini abantu abaninzi xa bexelelwa ngobulumko obuseBhayibhileni? (IMizekeliso 1:20, 21)

KUMAZWE amaninzi besidla ngokubona abazalwana noodade abonwabileyo bemi kwizitrato eziphithizelayo, benika abantu iincwadi. Ngaba wena wakhe washumayela ngaloo ndlela? Mhlawumbi loo nto yakwenza wacinga ngeSibhalo esikwincwadi yeMizekeliso, esithi ubulumko butsho ngesikhalo esikhulu esitratweni ukuze buviwe ngabantu. (Funda iMizekeliso 1:20, 21.) EBhayibhileni nakwiimpapasho zethu sifumana ubulumko bokwenene, ubulumko bukaYehova. Abantu bayabudinga obu bulumko ukuze bafumane ubomi obungunaphakade. Siyavuya xa abantu besamkela iimpapasho esibanika zona. Kodwa ayingabo bonke abazamkelayo. Abanye abafuni kuzazi izinto ezifundiswa yiBhayibhile. Kanti abanye bayasihleka, bacinga ukuba iBhayibhile iphelelwe lixesha. Kukho nabanye abantu abayigxekayo indlela iBhayibhile ethi masiziphathe ngayo, becinga ukuba abantu abayithobelayo abanabubele futhi bazenza iingelosi. Kodwa uYehova osithandayo uhlala enika bonke abantu ubulumko bokwenene. Njani?

2. Sinokubufumana phi ubulumko bokwenene, kodwa baye bakhethe ukwenza ntoni abantu abaninzi?

² Enye into uYehova ayisebenzisayo ukuze ancede abantu babe nobulumko bokwenene, liLizwi lakhe iBhayibhile. Phantse wonke umntu unayo le ncwadi. Iimpapasho ezithetha ngeBhayibhile zona? UYehova uzenze zafumaneka ngeelwimi ezingaphezu kweziyi-1000. Abantu abazenzayo izinto abazifunde kuzo bayancedakala. Kodwa abantu abaninzi baye bakhethe ukungammameli uYehova. Xa kufuneka benze izigqibo, bakhetha ukuthembela kwiziqu zabo okanye bamamele abanye abantu. Basenokude bacinge ukuba akukho yethu kuba sisenza izinto esizifunde eBhayibhileni. Eli nqaku liza kusibonisa ukuba kutheni becinga ngolu hlobo. Kodwa masiqale sithethe ngendlela esinokubufumana ngayo ubulumko obuvela kuYehova.

UKWAZI UYEHOVA KUSENZA SILUMKE

3. Kuthetha ukuthini ukuba nobulumko bokwenene?

³ Ubulumko busenokuthetha ukukwazi ukusebenzisa ulwazi onalo ukuze wenze izigqibo ezilungileyo. Kodwa bona ubulumko bokwenene abupheleli apho. IBhayibhile ithi: “Ubulumko buqala ngokoyika uYehova, ibe ukwazi Oyena Ungcwele kukuqonda.” (IMize. 9:10) Ngoko ngaphambi kokuba senze isigqibo esibalulekileyo, simele sizame ukuqonda ukuba uYehova ucinga ntoni ngaso. Singayenza le nto ngokufunda iBhayibhile neempapasho zethu. Loo nto iza kubonisa ukuba silumke nyhani.—IMize. 2:5-7.

4. Kutheni inguYehova kuphela onokusinika ubulumko bokwenene?

⁴ NguYehova kuphela onokukwazi ukusinika ubulumko bokwenene. (Roma 16:27) Kutheni sisithi buvela kuye? Okokuqala unguMdali, ngoko wazi yonke into ayidalileyo. (INdu. 104:24) Okwesibini, zonke izinto azenzayo zibonisa ukuba ulumkile. (Roma 11:33) Okwesithathu, amacebiso akhe obulumko asoloko ebanceda abo bawasebenzisayo. (IMize. 2:10-12) Ukuba sibufuna nyhani ubulumko bokwenene, kufuneka sizamkele ezi nyaniso kuthethwe ngazo ngasentla, size sizivumele zisincede kwizigqibo nezinto esizenzayo.

5. Kwenzeka ntoni xa abantu bengayamkeli into yokuba ubulumko bokwenene busuka kuYehova?

⁵ Abantu abaninzi esishumayela kubo bathi ziyabamangalisa izinto abazibonayo apha emhlabeni, kodwa bathi zange zidalwe, zazivelela. Kanti abanye bathi bayakholwa kuThixo, kodwa bathi iimfundiso zeBhayibhile ziphelelwe lixesha, ngoko bakhetha ukuphila ngendlela efunwa ngabo. Iye yabangela ntoni loo nto? Ngaba ukuhamba ngabayibonayo kunokuba bathobele uThixo kuzenze zabhetele izinto apha emhlabeni? Ngaba bonwabe nyhani futhi banethemba lezinto eziseza kwenzeka? Izinto esizibona zisenzeka zisenza siqiniseke ukuba ayinyani amazwi athi: “Akukho bulumko, kungekho kuqonda nacebo lilungayo xa lichasene noYehova.” (IMize. 21:30) Le nto imele isenze simcele uYehova ukuba asinike ubulumko bokwenene! Kodwa abantu abaninzi abayenzi loo nto. Kutheni?

KUTHENI ABANTU BENGABAMKELI UBULUMKO BOKWENENE?

6. Ngokutsho kweMizekeliso 1:22-25, ngoobani abangabamkeliyo ubulumko obusuka kuYehova?

⁶ Abantu abaninzi bavala iindlebe xa ubulumko bokwenene ‘busitsho ngesikhalo esikhulu esitratweni.’ IBhayibhile ibonisa ukuba zintathu iintlobo zabantu ezingabamkeliyo ubulumko: ‘ngabangenamava, abagculeli nezidenge.’ (Funda iMizekeliso 1:22-25.) Makhe sibone ukuba ziintoni ezibenza bangabamkeli ubulumko obuvela kuThixo, futhi sinokwenza ntoni thina ukuze singafani nabo.

7. Kutheni abanye bekhetha ukuhlala ‘bengenamava’?

⁷ Abo ‘bangenamava’ bakholelwa yonke into abayivayo futhi baqhatheka lula. (IMize. 14:15, umbhalo osemazantsi) Xa sishumayela sidla ngokudibana nabo ke abantu abanje. Ngokomzekelo, cinga ngeemiliyoni zabantu abaqhathwa ngabefundisi neenkokheli zepolitiki. Abanye bothuka kakhulu xa befumanisa ukuba kanti lonke eli xesha bebeqhathwa. Kodwa abantu ekuthethwa ngabo kwiMizekeliso 1:22 bazikhethela ngokwabo ukungabi namava, loo nto ibavisa kamnandi. (Yer. 5:31) Bathanda ukwenza into abayifunayo, bengafuni nokuzazi izinto ezifundiswa yiBhayibhile okanye ukuthobela imithetho ekuyo. Abaninzi baziva njengebhinqa elilikholwa eQuebec, eCanada, elathi kwelinye iNgqina, “Ukuba umfundisi wethu usiqhathile, nguye onetyala, asingeni ndawo thina.” Asifuni tu ke thina ukufana nabantu abangafuni ukuzazi izinto ezifundiswa yiBhayibhile, nabangayithobeli ngabom imithetho ekuyo.—IMize. 1:32; 27:12.

8. Yintoni enokusinceda sibe namava?

⁸ IBhayibhile isikhuthaza ukuba singahlali singabantu ‘abangenamava’ kodwa sibe “ngabakhule ngokupheleleyo emandleni okuqonda.” (1 Kor. 14:20) Ukuze sibe namava, simele siphile ngemigaqo yeBhayibhile. Kancinci kancinci, siye sizibonele ukuba le migaqo isinceda singangeni ezingxakini, size senze izigqibo zobulumko. Kuza kusinceda nyhani ukucinga ngezigqibo esele sizenzile. Ukuba kudala sifunda iBhayibhile, sisiya nakwiintlanganiso, simele sizibuze ukuba kutheni singekazinikeli kuYehova size sibhaptizwe. Ukuba sesibhaptiziwe, ngaba iya isiba bhetele indlela esishumayela nesifundisa ngayo? Ngaba izigqibo zethu zibonisa ukuba siphila ngemigaqo yeBhayibhile? Ngaba abanye sibaphatha ngendlela uYesu ebenokubaphatha ngayo? Ukuba kufuneka sitshintshe, simele sicingisise ngezinto esizifundiswa nguYehova, ‘nezimenza abe nobulumko ongenamava.’—INdu. 19:7.

9. Ziintoni abazenzayo ‘abagculeli’ ezibonisa ukuba ababamkeli ubulumko?

⁹ Uhlobo lwesibini lwabantu abangabuhoyiyo ubulumko obuvela kuThixo ‘ngabagculeli.’ Sidla ngokudibana nabo abantu abanje xa sishumayela. Kuyabavuyisa ukuhlekisa ngabanye. (INdu. 123:4) IBhayibhile yasilumkisa isithi ngemihla yokugqibela abagculeli baza kuba baninzi. (2 Pet. 3:3, 4) Abanye abantu namhlanje bayafana nabayeni beentombi zikaLote, abazihoyi izilumkiso ezivela kuThixo. (Gen. 19:14) Abaninzi bayabahleka abantu abaphila ngemigaqo yeBhayibhile. Le nto bayenza kuba befuna ukulandela “iminqweno yabo yezinto ezingafunwayo nguThixo.” (Yuda 7, 17, 18) Indlela ebachaza ngayo iBhayibhile ibonisa ukuba bafana nqwa nabawexuki nabanye abantu abangamfuniyo uYehova.

10. Ngokutsho kweNdumiso 1:1 yintoni esinokuyenza ukuze singabi ngabagculeli?

¹⁰ Yintoni esinokuyenza ukuze singabi ngabagculeli? Enye into esinokuyenza kukudlalela kude nabantu abahlala bekhalaza. (Funda iNdumiso 1:1.) Le nto ithetha ukuba asimameli okanye sifunde nantoni na esuka kubawexuki. Ukuba asilumkanga, kungalula ukuba sibe ngabantu abathanda ukukhalaza, size simthandabuze uYehova nemiyalelo esuka kwintlangano yakhe. Ukuze singayenzi loo nto, masizibuze: ‘Ngaba ndidla ngokukhalaza xa sifumana imiyalelo emitsha okanye xa kukho into ecaciswa ngendlela entsha? Ngaba ndisoloko ndijonga izinto abangazenzi kakuhle abazalwana abakhokelayo?’ Xa sikhawuleza siyeke ukwenza ezi zinto siyamvuyisa uYehova.—IMize. 3:34, 35.

11. ‘Izidenge’ ziyijonga njani indlela uYehova afuna siziphathe ngayo?

¹¹ Uhlobo lwesithathu lwabantu abangabamkeliyo ubulumko ‘zizidenge.’ Into ebenza babe zizidenge kukungafuni ukuziphatha ngendlela uThixo afuna siziphathe ngayo. Bahamba ngabayibonayo. (IMize. 12:15) Abantu abanjalo abamfuni uYehova obusuka kuye ubulumko. (INdu. 53:1) Xa sidibana nabo kumsebenzi wokushumayela baye basigxeke kakhulu kuba sithobela imithetho eseBhayibhileni. Kodwa akukho nto ibhetele banokusinika yona. IBhayibhile ithi: “Isidenge asinakukwazi tu ukufumana ubulumko bokwenene; asinanto yakuthetha ezigeyithini zesixeko.” (IMize. 24:7) Abantu abazizidenge akukho nto ibhadlileyo banokusicebisa yona. Yiloo nto uYehova esilumkisa esithi ‘hlalelani kude kumntu osisidenge’!—IMize. 14:7.

12. Yintoni enokusinceda singabi zizidenge?

¹² Thina asifani nabantu abakucaphukelayo ukucetyiswa nguThixo, kodwa sifunda ukuyithanda indlela acinga ngayo nayo yonke imithetho yakhe. Into enokusenza siye siyithanda imithetho kaThixo nendlela acinga ngayo kukujonga izinto eziye zenzeke kubantu abamthobelayo, neziye zenzeke kubantu abangamthobeliyo. Cinga ngeengxaki abazifaka kuzo abantu abathi ngobudenge bangawamkeli amacebiso kaYehova. Emva koko cinga ngendlela obuye babhetele ngayo ubomi bakho kuba uthobela uThixo.—INdu. 32:8, 10.

13. Ngaba uYehova uyasinyanzela ukuba siwasebenzise amacebiso akhe?

¹³ UYehova wenza kube lula ukuba wonke umntu afumane ubulumko, kodwa akukho mntu amnyanzelayo ukuba abamkele. Nokuba sekunjalo, uyasixelela ukuba kuza kwenzeka ntoni kubantu abangabamkeliyo ubulumko. (IMize. 1:29-32) Abo bakhetha ukungamthobeli, “baza kufumana imiphumo yeendlela zabo.” Ekuhambeni kwexesha, indlela abaphila ngayo iza kubazisela iingxaki zodwa, aze uYehova abatshabalalise ekugqibeleni. Kodwa nantsi into abathembisa yona uYehova abantu abawamamelayo amacebiso akhe baze bawasebenzise: “Umntu ondimamelayo uza kuhlala ekhuselekile, aze angaphazanyiswa kukoyika intlekele.”—IMize. 1:33.

UBULUMKO BOKWENENE BUYASINCEDA

14-15. Sifunda ntoni kwiMizekeliso 4:23?

¹⁴ Xa sibusebenzisa ubulumko bukaThixo siyancedakala. Njengokuba sesifundile, uYehova wenza kube lula ukuba sifumane amacebiso obulumko. Ngokomzekelo, kwincwadi yeMizekeliso usinika amacebiso abenza bube bhetele ubomi bethu xa siwasebenzisa. Makhe sithethe ngamane awo.

¹⁵ Khusela intliziyo yakho (oyena mntu unguye ngaphakathi). IBhayibhile ithi: “Ngaphezu kwazo zonke ezinye izinto ozikhuselayo, khusela intliziyo yakho, kuba iphuma kuyo imithombo yobomi.” (IMize. 4:23) Cinga ngezinto esimele sizenze ukuze sikhusele iintliziyo zethu. Simele sitye ukutya okusempilweni, sijime ngokwaneleyo, size siyeke ukwenza izinto ezinokusigulisa. Siye senze izinto ezifana nezi ke naxa sikhusela umntu esinguye ngaphakathi. Sizondla ngeLizwi LikaThixo yonke imihla. Silungiselela iintlanganiso, siphendule naxa sikuzo. Siwukhuthalele nomsebenzi wokushumayela. Ukuze singazenzi izinto ezimbi, sidlalela kude kuyo nantoni na enokumosha indlela esicinga ngayo, njengokuzonwabisa ngezinto ezimbi nokuba nabahlobo abangalunganga.

16. Kutheni sisithi iyasinceda into ethethwa kwiMizekeliso 23:4, 5?

¹⁶ Yonela zizinto onazo. IBhayibhile isicebisa isithi: “Sukubulalekela ukufumana ubutyebi. . . . Uza kuthi xa ukrwaqula, bube bungasekho, kuba buza kumila amaphiko njengokhozi, bubhabhe buye esibhakabhakeni.” (IMize. 23:4, 5) Ungalala namhlanje usisityebi, uvuke ngomso ingasekho yonke loo nto. Kodwa abantu namhlanje bafuna ukuba nemali eninzi, nokuba sebezizityebi okanye bayasokola. Le nto idla ngokubangela ukuba baphile ngendlela ebenza badume kakubi, bangavani nabantu, nempilo yabo ibe sengozini. (IMize. 28:20; 1 Tim. 6:9, 10) Kwelinye icala, ubulumko businceda singazikhathazi kakhulu ngemali. Loo nto isinceda singanyoluki, isenze sanele zizinto esinazo size sonwabe.—INtshu. 7:12.

17. Yintoni eza kusinceda sibe ‘nolwimi lwezilumko’ ekuthethwa ngalo kwiMizekeliso 12:18?

¹⁷ Cinga ngaphambi kokuba uthethe. Ukuba asizigadi izinto esizithethayo, singabakhathaza kakhulu abantu. IBhayibhile ithi: “Amazwi omntu othetha engacinganga ahlaba okwekrele, kodwa ulwimi lwezilumko luyaphilisa.” (IMize. 12:18) Siba seluxolweni nabantu ukuba asihambi sithetha ngezinto abangazenzi kakuhle. (IMize. 20:19) Ukuze izinto esizithethayo zibathuthuzele abantu kunokuba zibakhathaze, simele silifunde qho iLizwi LikaThixo size sicingisise ngalo. (Luka 6:45) Xa siyenza le nto, izinto esizithethayo ziza kufana ‘nomthombo wobulumko’ obathuthuzelayo abantu.—IMize. 18:4.

18. Ukwenza into ethethwa kwiMizekeliso 24:6 kungasinceda njani siwenze kakuhle umsebenzi wokushumayela nokufundisa?

¹⁸ Yithobele imiyalelo yentlangano. IBhayibhile icebisa isithi: “Xa ufumana amacebiso obulumko uza koyisa emfazweni, naxa unabacebisi abaninzi uza kuphumelela.” (IMize. 24:6) Le vesi isinceda njani siwenze kakuhle umsebenzi wokushumayela nokufundisa? Endaweni yokuwenza ngendlela esibona ngayo, sizama ukwenza izinto esizicetyiswayo. Loo macebiso siwafumana kwiintlanganiso xa abazalwana noodade abafundisa kakuhle besenza iintetho nemiboniso. Kanti intlangano kaYehova isinike iincwadi neevidiyo esinokuzisebenzisa ukuze sincede abantu bayiqonde iBhayibhile. Ngoko zama ukufunda iindlela zokuzisebenzisa kakuhle.

19. Ubulumko obuvela kuYehova bukwenza uzive njani? (IMizekeliso 3:13-18)

¹⁹ Funda iMizekeliso 3:13-18. Simbulela kakhulu uThixo ngamacebiso amahle esiwafumana kwiLizwi lakhe! Besinokuba yintoni ngaphandle kwawo! Kweli nqaku sithethe ngamacebiso aluncedo esiwafumana kwincwadi yeMizekeliso. Amacebiso asuka kuYehova sinokuwafumana kanti nakwezinye iincwadi zeBhayibhile. Masizimisele ukuwasebenzisa la macebiso uYehova asinika wona. Ayibalulekanga indlela ihlabathi elibujonga ngayo ubulumko bukaThixo; kodwa thina siqinisekile ukuba “abo babambelela nkqi kubo kuya kuthiwa bonwabile.”