Mwiiriirya Waapakiwe Nlima Nooseera

Okathi Farawo adhuwenle iye wiira Aisarayeeli yaahikhuma Weexiitu, veene ahimmudari palano-ye a waahiya Aisarayeeli ekhumaka Weexiitu. Ndho mwaha wa elo, aahaaleela anakhotto-ye wiira: ‘Nkocihere ikaaro-dhaaka dha ekhootto, ni nkaroowa naatthare! Khinaatthuneya waahiya eroowaka.’ Ndho Farawo ni anakhotto-ye yaahipacera waatthimakela Aisarayeeli.

Yehova aaniwoonihera Aisarayeeli ephuro yaareerrela awa otthaara. Munnidhuuwela moopora Yehova aapaka iye elo? Othaana aaruumela neeku ni ohiiyu aaruumela waarya waapatta nkhama mooro. Noovira okathi vakhani Aisarayeeli yaahiphiya nliima nooseera, ni Yehova aahaleela wiira elipelele vakhaani.

Yeemenle dhiidhale Aisarayeeli yaahimoona Farawo ni anakhotto-ye araaka ottuli. Aisarayeeli khiyoona etthu yoopaka okhala wiira ohoolo-wa nariwo nliima nooseera ni ottuli aara-wo Farawo ni anakhotto-ye, ndho Aisarayeeli yahoova vawaatta mpakha otthuna otthikela Weexiitu. Masi Moise aahinrooromela Yehova ni aahaaleela wiira: ‘Atthu ehoove! Atthu elipeleele wiira yoone moopora Yehova on’ya-iye onoopola.’

Ndho Yehova aahaaleela Aisarayeeli wiira yikocihera wiira etthiikele weetta nkhwaha ole. Ohiyu-ya yoole Yehova ahiriha neeku naawettiha Aisarayeeli, okhala variyari wa atthu a Weexiitu ni Aisarayeeli. Mphanta wa atthu a Weexiitu wariwo epiiphi masi mphanta wa Aisarayeeli waanaryawo.

Yehova aahinleela Moise wiira attukhulele matata-ye laatu waariwo nliima nne nooseera. Moottharelana Yehova ahiriha woopa ettheeku yawaatta ohiyu ole wootheene. Ndho mwaha wa ettheeku ele, nliima nne naahikawanyeya ilaatu piili ni variyari-va waahipakeya-vo ephuuro. Ndho imilyau dha atthu awaatta a Aisarayeeli yaahilapuwa eviraaka etthaya ya wuuma mpakha ekhopela ekina ya nlima.

Farawo ni anakhotto-ye yaahattharela Aisarayeeli eviiraka ephuuro yeele. Masi okathi-ya yoole Yehova aahiwiiriha anakhotto a Farawo ohiwaanana yaaworu ni ikaaro-dha dha ekhotto okhuleya maroota. Tivondho yahikhuwela yiiraaka: ‘Nkarowa nikhume opuroola! Yehova tonaakhalihera Aisarayeeli.’

Yehova aahinleela Moise wiira attukhulele-tho matata-ye laatu waariwo nliima nne nooseera. Noomala Moise opaka ele, maadhi ootheene yaahitakaiheya mpakha waamirya atthu a Weexiitu. Farawo vamodha ni anakhotto-ye ootheene, yaahuukhwa. Khaavo ooponwe.

Aisarayeeli erii ekhoopela ekina ya nlima, awo yaahiwerya woona etthu Yehova apanke-iye. Wiira yoonihere onxukhurela-wa, athiyana yaanipa ni wiina yiiraka: “Mmwiipele Yehova, okhala wiira atthu ootheene oleelo ahoona wiira owo, ookhalana oweerya. Owo ohiiriha nlima wamirya anakhotto a Weexiitu vamodha ni ikhavalo-dha.” Atthu ootheene yaari oohakalala, okhala wiira yaahiphwanya otaphuwa.