Ehasara Yookhidhera

Moise aahinlaihera Farawo wiira khaatthikela-tho olottaana. Masi ahinatthi orowa, aahinleela Farawo wiira: ‘Ohiyu eriyari, anaamwane ootheene oopacera oyariwa a Weexiitu anookhwa. Khaavo mwaana oopacera oyariwa on’ya woopowa, ata mwaaninyu ni mwaana arumeyi nnyu.’

Yehova aahaaleela Aisarayeeli wiira ekocihere eyooca ya vameekhaya ohiyu-ya yoole, Airaka: ‘Nhite eputtiputthi, aahindho epuri ya mwaakha mmodha ni nkuse ephome-ya wiira moottihere vaankhora wa empa nnyu. Enama-ya yoosiwe, ni ekhuureliwe ephawu yoohiheliwa eferamenta. Atthu yikocihere wiira erowe. Olelo ohiyu yoola atthu kinaawaakhumiha Weexiitu.’ Munniwerya woona moopora Aisarayeeli yaahakalanla awa noomala odhuwela wiira yaankhuma Weexiitu?

Ohiyu-ya yoole, nlaikha na Yehova naanivira khuta empa yaatthu a Weexiitu. Ndho mampa yaale yaaphwanya awa nkhora-ya ohittikhittheliwe ephome naanivolowa mpani ni naanimwiipha mwaana oopacera oyariwa. Masi okathi naaphwanya-wa nkhora-ya ottikhittheliwe ephome, nlaikha nno khinaavolowa. Tivondho atthu ootheene a Weexiitu, ekhale othaaciri ahindho ohaawa, yahikhweliwa ana oopacera oyariwa. Masi khaavo ntthu a Wisarayeli akhweliwe mwane.

Ata mwaana oopacera oyariwa a Farawo ahuukhwa. Mwaha awa elo Farawo khawenrye-tho ovilela, mpakha onleela Moise ni Arooni wiira: ‘Nyuwo ni atthu nnyu atthu ekhume elapo ela. Atthu eroowe yankokhorele Muluku-ya. Atthu ekuse imaana-dha dhootheene atthu eroowe!’

Ohiyu-ya yoole mweeri waaryaka, Aisarayeeli yaahikhuma Weexiitu, ootthokiheya mwa emudhi ni maloko. Yaahikhala alopwana yaaphiyera 600.000 ohaahelamo athiyana ni anaahima. Wookhidheranwa, Aisarayeeli yaahiphwanya otaaphuwa. Ata atthu awaatta yahaakhanle Aisarayeeli, yaahatthara wiira eroowe yakankokhorela Yehova!

Wiira atthu ehiliyale moopora Yehova aakhuminhe iye Weexiitu, khuta mwaakha Aisarayeli yanikocihera eyooca yoohiyu yavameekhaaya, yeelo yaitthana awa Paaskowa.