Moise Khaatanke Onliyala Yehova

Munnuupuwela wiira emudhi ya Yaakoobe yaahithaamela Weexiitu? Eri elapo ele, awo yaahipacera waacerereya ni yaanidhuweliwa okhala aIsarayeeli. Noomala Yaakoobe ni Yooseefe okhwa, aahipacera olamulela Farawo anaaili. Owo aahoova vawaatta noomala owoona aIsarayeeli yaacerereyaka waaxira atthu a Weexiitu. Ndho Farawo owo, aahipacera waarumeela aIsarayeeli nkhama ipottha, aavarihaka miteko dha mmatta ni wuupa itixolu. Masi waakhanyerera ovara miteko idho, khiwaakhumihenre etthu. Tivondho Farawo owo aahirumiha wiira ekaiphiwa anamwane a aIsarayeeli anaalopwana yaaya ekayariwa.

Mwaha wa nxankiho ole waakhumelenle, khamunkhupali wiira aIsarayeeli yaanoova vawaatta? Okathi-ya yoole Mwiisarayeeli mmodha aaitthaniwa Yokebeedi aahin’yara mwaana nlopwana, ooreera. Wiira mwaana owo ahiiphiwe Yokebeedi aahimpweha nseestuni arowa amwiipithiha esiisi wa nratthi Niilu mmapukuni. Nrokoriye mwaana ole aitthaniwa Miriyaamu, aaheemela waattamela vaavale wiira oone etthu aaya iye wiirihiwa mwaana ole.

Ndho, mwaana a Farawo aahirowa orapa onratthini iwe. Okathi aaphin’ye iye, aahoona eseestu ekhuneeliwe ni mwaana anlaka. Owo aahimoonela othunku vawaatta mwaana ole. Ndho Miriyaamu nrokoriye mwaana ole aahinkoha mwaana a Farawo wiira: ‘Munnitthuna wiira kimwiitthane nthiyana mmodha wiira akamwaamwiha mwaana ola mwa ndhina ninyu?’ Mwaana a Farawo aahaakhula wiira: ayo! ndho Miriyaamu aahirowa owiitthana amaama-ye, Yokebeedi. Mwaana a Farawo aahinleela Yokebeedi wiira: ‘Munkuse mwaana ola nkamwaamwiha mwandhina naka, annuwa miyo kinawoolivani.’

Nuumala mwaana ole wuunnuwa, Yokebeedi aahinroihela mwaana a Farawo. Ndho mwaana a Farawo aahinvaha ndhina na Moise ni owo aahinkhapelela mwaana ole nkhama mwane. Moise aahuiwe nkhama mwaana a mwene ni aanwerya okhalana khuta etthu aatthuna iye. Masi veene aahidhuwela wiira aari a nloko na atthu a wIsarayeeli ohiya a nloko na atthu a Weexitu, ndho aahithanla onkokhorela Yehova.

Okathi Moise aariiyena miyaakha 40, owo aahilakela waakhalihera atthu-ye. Nihiku nimodha owo aahimoona ntthu a Weexiitu ammanaka Mwiisarayeeli. Ndho mwaha wa elo, Moise aahimmana vawaatta, masi ammanne ni ikuru mpakha mweexiitu ole okhwa. Moottharelana aahinvitha mmuthakani. Ndho Farawo aahidhuwela wiira Moise khaari mweexiitu ni aahilakela omwiipha. Tivondho Moise aahithyawela elapo yaitthaniwa oMidiyaani. Yehova khaahin’ye onkhapelela Moise.