Omwene Yoowo Onlattanihiwa ni Nttaiko Woottaiva

Ohiyu omodha, mwene Nabukodonosori aahiloha etthu yeelo yaamwiirinhe woova vawaatta. Ndho owo aahaavekela adhuweli-ye wiira entaphulele yooloha-ye. Masi khaavo aawenrye ontaphulela. Tivondho, mwene aahilakela olotta ni Daniyeeli.

Owo aahinleela Daniyeeli wiira: ‘Okathi kaarupaka ohiyu, kilonhe nttaikho muulupale. Nttaikho owo waahinnuwa mpakha wiirimu ni waanooneya elopo yootheene. Makukhu-ya yaari oreera ni waahima vawaatta. Inama dhaanuca vanttaikhoni vaavo ni irintta-dha apalame yaanittekamo icaaro-dha. Ndho kaahiwa nlaikha niiraka: “Nthikile nttaikho owo, muntake irintta-dha, masi nhiye esa-ya ni mitathari-dha, etthukiwe ni eyuuma ya eboronzi eriyari ya ematta vamodha ni malasi. Nrima-ye onoohiya okhala nirima wa ntthu, okhale nrima wa enama. Dhiidho atthu ootheene anoodhuwela wiira Muluku awiirimu onniruma omwene wootheene wa nlaponi ni wiira Muluku onnaavaha Omwene ale onatthuna iye.”’

Yehova aahinleela Daniyeeli ele yaataphulela awa yooloha ya mwene. Nuumala Daniyeeli wiwasasa ele yataphulela awa, owo aahoova vawaatta. Tivondho aahinleela mwene wiira: ‘Miyo, kaatthuna wiira yooloha ela ekhale ya awanani nnyu masi enoolottani nyuwo mwene. Nttaikho muulupale moonne nnyu, othikiliwaka, ti nyuwo. Nyuwo nnawaakhiwa omwene nnyu, ni mun’ya nkaca malasi vamodha ni inama mwiini. Masi okhala wiira nlaikha naalontte wiira esa-ya ni mitathari-dha ihiiwe vaavo, nnotthikiheri-wa omwene nnyu nhoolo-mwa.’

Nihiku nimodha ovinre mwaakha ntero, Nabukodonosori aahivenya aketta vadhulu va epalaasiyu-ye, akanttottopela Babilooniya airaka: ‘Moone, esidadi ela yoovuwa miyo kitenkaka, miyo ka ntthu oovuwa waxira mamwene ootheene!’ Okathiya yoole, naahiiweya ndhu nikhumaka wiirimu niiraka: ‘Nabukodonosoir! Nenna-va nyuwo nnawaakhiwa omwene nnyu.’

Okathi-ya yoole, Nabukodonosori aahithatuwa anepa akakhala nkhama nneenama. Tivondho aahikhuma owannye akakhala ni inama ntakhwani. Maihi-ye yaahaatta ni yaahinnuwa ekaphwana ni mapapho a saaka, ni makhope-ye yaalikana ni makhope a saaka.

Nuuvira iyaakha 7, Nabukodonosori aahitthikela okhala saana; ndho Yehova aahintthikihera omwene wa oBabilooniya. Nabukudonosori aahilotta wiira: ‘Avuuwihiwe Yehova, mwene awiirimu nenna-va koodhuwela wiira Yehova Namalamulela. Owo onniwiiriha atthu awidhinnuwiha okhala awiiyeviha ni onnaavaha omwene atthu yaale onaathanla iye.’