Yeesu Atthikelaka Wiirimu

Yeesu aahikumana ni arummwa-ye oKalileeya. Ndho ahaaruma ovara nteko wootepa ootthuneya aleelaka wiira: ‘Atthu erowe yaahudhihe atthu a ilapo dhootheene wiira ekhale ahudheri aka. Atthu yaahudhihe itthu dhootheene kaahudhinha aka ni ekaapatisa, miyo kinookhala mahiku ootheene ni atthu veena.’

Nuuvira mahiku 40 Yeesu ahihimusiwe, aahaakhumelela ahudheri-ye awaatta oKalileeya ni oYerusaleemu. Owo aahaahudhiha itthu dhawaatta dhootepa otthuneya ni aahipaka miiriirya dawaatta. Nuumala-vo aahaaleela wiira: ‘Nhikhume oYerusaleemu, nlipelele wiira moone etthu Muluku olaihenre iye.’

Arummwa ale khiyaawenrye wiwasasa etthu yaataphulela awa moolumo ale. Tivondho nuumala arummwa okumana ni Yeesu evaara yookhidhera Omwaako Oliveera, yaahinkoha wiira: ‘Pwiya, niire okathi-ya ti yoola mun’ya nnyu okhala Mwene a wIsarayeeli?’ Yeesu aahiwaakhula wiira: ‘Ola kahi okathi Yehova othanlale iye wiira kikhale Mwene. Moohilekela nnawaakhela ikuru dha nnepa wawaarya ni atthu anookhala anamoona aka. Nrowe mwalaleye oYerusaleemu, oYuudeya, oSamariya ni mpaakha omalenle elapo.’

Nuumala Yeesu olotta moolumo ala, aahiwela wiirimu ni aahikhuneeliwa ni meeku. Ndho mwaha wa elo arummwa khiyaawerya omoona.

Arummwa ale yaahikhuma Omwaako Oliveera erowaka oYerusaleemu. Masi awo khiyaahin’ye othukumana ni ovekela, enlipelelaka Yeesu wiira aaleele etthu yaareerela awa opaka.