YOOSOMA YA MWAHA 19
NCIPO 6 Erimu Ennilaleya Ovuwa wa Muluku
Ntthare Ntakihero na Malaikha Oororomeleya
‘Nyuwo malaikha ootheene, munttottopele Yehova.’—ESAL. 103:20.
ETTHU NIN’YA NHU OHUDHA
Nin’ya woona etthu ninhudha nhu ni ntakihero na malaikha oororomeleya.
1-2. (a) Hiyo nivirikanne dhai ni malaikha? (b) Itthu seeni ninlikana nhu ni malaikha?
NUUMALA Yehova wookhaliherani ohudha ekhweeli, owo ohoolaleyeni wiira mwiirele mphantta emudhi yuulupale enoonihera opheta ni eninkokhorela. Emudhi elo, enaahela mpuwa anna ni arokora a olumwinku wootheene ni imilyawu dhawaatta dha malaikha. (Dan. 7:9, 10) Ndho vaavo ninuupuwelela nhu malaikha, ninniwerya woona wiira awo toovirikana ni hiyo. Mwa ntakihero, dhoovira iyaakha dhawaatta malaikha epattusiwe apinaatamu ehinatthi opattusiwe. (Yobi 38:4, 7) Moovirikana ni hiyo, malaikha aakhalana owerya wuulupale. Awo tawaarya ni taxariya waaxira apinaatamu oohimalela.—Luka 9:26.
2 Nnaamwi niri ene oovirikana ni malaikha, dhookhala itthu ninlikana nhu naawo. Mwa ntakihero, nkhama malaikha ampaka awa, hiyo ninoowerya otakiha mikhalelo dha Yehova. Nkhama malaikha, nookhalana eparakha ya opaka dhoothanla mootaphuwa. Ohiya-vo, nkhama malaikha, khuta mmodha a hiyo ookhalana ndhina, makhalelo oovirikana, ohela mpuwa miritti. Nitho nkhama malaikha, nipattusiwe wiira nikankokhorela Yehova Mpattusa nhu.—1 Ped. 1:12.
3. Ntakihero na malaikha oororomeleya nin’ya onikhalihera dhai?
3 Okhala wiira dhookhala itthu dhawaatta ninlikana nhu ni malaikha, ntakihero-na ninoowerya onilipiha ni onihudhiha itthu dhawaatta dhootepa ootthuneya. Yoosoma ela, nin’ya woona moopora nikhanle nhu otakiha wiiyeviha wa malaikha oororomeleya, moopora anoonihera awa waapheta atthu, ovilela ni moopora aniilipihera awa okhalihera muloko wa ekiristau okhala wawaarya.
MALAIKHA TAWIIYEVIHA
4. (a) Malaikha anoonihera dhai wiira tawiiyeviha? (b) Eseeni enwiiriha malaikha okhala awiiyeviha? (Esalimo 89:7)
4 Malaikha oororomeleya tawiiyeviha. Hata edhuwelaka itthu dhawaatta ni erina owerya ni akhili, awo anniiwelelela malakihero a Yehova. (Esal. 103:20) Vaavo malaikha anaakhwanihera awa miritti anvahiwa awa, khaniidhinnuwiha aahiidho wiikuserera mwaha wookhalana owerya wuulupale waaxira apinaatamu. Awo annihakalala opaka ele Yehova onaaruma iye, hata ehiromoliwaka madhina-ya.a (Maph. 32:24, 29; 2 Mam. 19:35) Nitho awo khanaakhulela waakhela ovuwa omphwanela ovahiwa Yehova. Eseeni enwiiriha opaka elo? Okhala wiira annimpheta vawaatta Yehova ni anninttittimiha ni nrima wootheene.—Nsome Esalimo 89:7.
5. Nlaikha naakhumelenle nrummwa Yoohaani noonihenre dhai wiiyeviha vaavo nanttarunsa awa? (Moone-tho efootu.)
5 Vano, nirowe nithokorerye yawiiraneya emodha enoonihera wiira malaikha tawiiyeviha. Mwaakha wa 96 Nuumala Kiriistu Ora, nlaikha nimodha nihinromoliwa ndhina-na naahinkhumelela nrummwa Yoohaani. (Wiis. 1:1) Yoohaani oonenle dhai yawoonihiwa elo? Owo aahuurama wiira akokhorele nlaikha nne. Masi mwawaakuveya nlaikha nne naahikhootta okokhoreliwa, niiraka: ‘Phoole! Nhipake elo! Miyo ka nrumeyi nkhwinnyu pahi ni ka nrumeyi aadhinninyu . . . Munkokhorele Muluku!’ (Wiis. 19:10) Voohaakanyera, moolumo a nlaikha nne annoonihera wiiyeviha wuulupale! Nlaikha nne naahikhootta ovuwihiwa ni ottottopeliwa. Ndho mwawaakuveya naahinleela Yoohaani wiira ankokhorele Yehova Muluku. Ohiya-vo, nlaikha nne khinoonihere wiira naari nootepa ootthuneya onxira Yoohaani. Nnaamwi nno naapacenre khalai onrumeela Yehova ni naarina owerya wuulupale onxira Yoohaani, mwawiiyeviha naahinleela Yoohaani wiira naari nrumeyi nkhama veene. Nuumala nlaikha nne woona wiira naanireerela onttarusa nrummwa Yoohaani, khinaapanke elo moowali. Masi naahinlottiha Yoohaani, mooreera nrima. Woonawene nno naahidhuwela wiira Yoohaani aahuurama okhala wiira aahixaka mwaha etthu oonne iye.
Nlaikha naahoonihera wiiyeviha vaavo naalotta awa ni Yoohaani (Moone ettima 5)
6. Nin’ya owerya dhai otakiha wiiyeviha wa malaikha?
6 Nin’ya owerya dhai otakiha wiiyeviha wa malaikha? Nittharaka ntakihero na malaikha, nihaana waakhwanihera dhoothanleliwa dhihu nixakaka opaka elo wiira niivuwihe aahiidho wiittottopa mwaha wa itthu nipanke nhu. (1 aKor. 4:7) Ohiya-vo, nihaana oxaka wiidhoona wiira nookhalana efaita yuulupale waaxira akina mwaha woopacera khalai onrumeela Yehova aahiidho mwaha wookhalana miritti. Ndho vaavo nintepa nhu waakhela miritti, nihaana otepa wiidhoona okhala akhaani. (Luka 9:48) Nkhama malaikha, hiyo nintthuna waarumeela atthu akina. Tivondho nixake owiiriha atthu akina wuupuwelela wiira na atthu ootepa otthuneya waaxira awo.
7. Nin’ya owerya dhai woonihera wiiyeviha vaavo nininvaha nhu ntthu miruku aahiidho onttarusa?
7 Nitho ninoowerya woonihera wiira na atthu awiiyeviha vaavo ninaattarusa nhu aahiidho waavaha miruku anna ni arokora ni anamwane. Ivaara dhikina, pooti otthuneya ovaha miruku dhooluluwanya. Masi nkhama nlaikha nne noonihera awa oreera nrima okathi nanttarusa Yoohaani, nihaana oxaka onvaha ntthu miruku aahiidho onttarusa mwa enamuna yooluluwanya ekhale onkhulumula. Akhala wiira ninawoonihera waathokorerya atthu akina okhala uulupale onixira hiyo, ninoowerya waavaha miruku dhinkhuma mbiibiliyani mooreera nrima ni mwa nttittimiho.—aKol. 4:6.
MALAIKHA ANNAAPHETA ATTHU
8. (a) Moovarihana ni Luka 15:10, malaikha anoonihera dhai wiira annaapheta atthu? (b) Malaikha annikhalihera dhai ovara nteko woolaleerya? (Moone-tho efootu ya ekaapa.)
8 Ohiya malaikha okhala ottaiwene ni waathanya apinaatamu. Awo annaapheta vawaatta atthu. Malaikha annihakalala vawaatta vaavo ntthu opanke etampi onttharuwa iye, elo tiilo, vaavo epwittipwitthi emodha yaarimenle entthikela awa wa Yehova aahiidho vaavo ntthu mmodha onrukunusa iye mweettelo-ye ni onthanla iye onrumeela Yehova. (Munsome Luka 15:10.) Nitho awo annikhalihera ni ntithi nteko woolaleerya. (Wiis. 14:6) Hata malaikha ehaalaleryaka atthu mooluluwanya, woonawene pooti onkhalihera namalaleerya mmodha omphwanya ntthu ontthuna ondhuwela Yehova. Masi elo khentaphulela wiira ivaara dhootheene anninithoonyera ntthu ontthuna ohudha ekhweeli. Okhala wiira Yehova pooti orumeela inamuna dhoovirikana, nkhama munepa-ye wawaarya wiira aakhalihere atthu antthuna ondhuwela aahiidho wiira aakhalihera arumeyi-ye waaphwanya atthu awo. (Mit. 16:6, 7) Masi hata eri dhiidho, Yehova onnirumeela malaikha wiira enikhalihere ovara nteko woolaleerya. Ndho vaavo ninlaleerya nhu ihapari dhooreera, nikhupali ni nrima wootheene wiira ninvara vamodha ni malaikha.—Moone ekwaaturu eni: “Mavekelo-ya Ahaakhuliwa.”b
Nuumala anamathelana amodha olaleerya ni ekarinya etthikelaka owaani, nrokora onnimoona mwali mmodha oriipiwe nrima. Nrokora owo onnidhuwela wiira malaikha pooti onithoonyera atthu anaadhya nikhalihero na omunepani. Owo onnoona wiira onnireerela onkhalihera mwali ole anleelaka moolumo oolipiha (Moone ettima 8)
9. Nin’ya owerya dhai woonihera wiira ninaapheta atthu nkhama malaikha?
9 Nin’ya owerya dhai woonihera wiira ninaapheta atthu nkhama malaikha? Nkhama dhiidhaale malaikha anhakalala awa nuumala epwittipwitthi emodha yaarimenle otthikela wa Yehova, nihaana ohakalala vaavo enlaleiwa awa mmulokoni wiira munna mmodha aahiidho nrokora ootthikela mmulokoni. Okathi owo, nihaana wiilipihera omwaakhela saana munna owo aahiidho nrokora ni omoonihera wiira ninnimpheta vawaatta. (Luka 15:4-7; 2 aKor. 2:6-8) Nitho ninoowerya otthara ntakihero na malaikha nipakaka itthu dhootheene ninwerya nhu wiira nivare nteko woolaleerya. (Mus. 11:6) Nkhama dhiidhaale malaikha annikhalihera awa olaleya ihapari dhooreera, nihaana waadhya inamuna dhoovirikana wiira naakhalihere anna ni arokora ovara nteko woolaleerya. Mwa ntakihero, niire mwaanwerya ompaka palanu wiira nkhume nteko woolaleerya ni namalaleerya a naanaano? Aahiidho niire mwaanwerya waakhalihera anna ni arokora awuuluvala aahiidho arina nxankiho wa ekumi ovara nteko woolaleerya?
10. Eseeni ninhudha nhu ni yawiiraneya Sara?
10 Ankhi akhala wiira makhalelo nhu khannaakhulela ovara nteko woolaleerya nkhama khalai? Hata eri dhiidho, ninoowerya ovara nteko woolaleerya vamodha ni malaikha mwa inamuna dhoovirikana. Nirowe nithokorerye etthu enkhumelenle nrokora mmodha oniithaniwa Sara,c yoowo onkhala oHíndia. Nuuvira iyaakha 20 arumeelaka nkhama piyoneera, yaahiphwanya eretta yuulupale yeelo yaamwiiriha ohiwerya okhuma vakaamani. Nuumala wiiraneya elo, owo aahiriipiwa nrima vawaatta. Masi akhaliheriwaka ni anna ni arokora mmulokoni ni okhalana yoolema ya onsoma Biibiliya khuta nihiku, vakhaani-vakhaani Sara owerya otthikela okhala oohakalala. Ndho wiira awerye ovara nteko woolaleerya moovarihana ni makhalelo-ye, owo aanitthuneya olamalela makhalelo mapheya. Okhala wiira khaawerya okilaathi wiira aatikhe iwarakha, owo aalaleerya pahi anrumeelaka telefooni. Nuumala nihiku nimodha Sara waalikarela atthu aahiyenre iye irevisiita, awo yaahinleela atthu akina yaatthuna onsoma Biibiliya. Ndho eseeni yookhumelenle moottharelana? Nuuvira miyeeri vakhaani, Sara aahikhalana dhoosoma dha Biibiliya 70 ahaawerya iye osomiha meekhe! Nuumala ahaakawela anamalaleerya akina dhoosoma idho. Nenna-va anaskola akina annirowela mithukumano. Voohaakanyera malaikha annihakalala vawaatta ovara vamodha ni anna ni arokora, nkhama nrokora Sara, yaawo ampaka itthu dhootheene anwerya awa wiira evare nteko woolaleerya!
MALAIKHA ANNOONIHERA OVILELA
11. Malaikha oororomeleya anoonihera dhai ovilela wuulupale?
11 Malaikha aavaha ntakihero nuulupale na ovilela. Awo annoonihera ovilela ohixariya ni otakhala mwa iyaakha dhawaatta. Mwa ntakihero, awo aamoona Satana vamodha ni dhoopattusiwa dhikina dha omunepani dheidho khalai dhanrumeela Yehova, ithanlaka onrukunuwela. (Maph. 3:1; 6:1, 2; Yuda 6) Biibiliya onnilotta nlaikha nimodha noororomeleya nenno naawane ni nlaikha nootakhala mwa mahiku awaatta. (Dan. 10:13) Ohiya-vo, okhuma khalai, malaikha anniwoona atthu vakhaani pahi ethanlaka onrumeela Yehova. Masi hata eri dhiidho, malaikha awo oororomeleya khanhiya onrumeela Yehova moohakalala ni nthiti. Awo annikhupali wiira okathi wooreerela, Muluku onoomaliha ohixariya wootheene.
12. Eseeni en’ya onikhalihera wiira niwerye ovilela?
12 Nin’ya owerya dha otakiha ovilela wa malaikha? Nkhama malaikha, pooti othokoreriwa voohixariya aahiidho ottharatthariwa. Masi nittharaka ntakihero na malaikha oororomeleya, ninnikhupali wiira okathi wooreerela, Muluku onoomaliha otakhala wootheene. Ohiya-vo, nkhama malaikha oororomeleya ‘nihikhulumuwe ovara miteko dhooreera’ (aGal. 6:9) Muluku onnilaihera onikhalihera wiira niwerye ovilela. (1 aKor. 10:13) Ndho nihaana onvekela Yehova munepa wawaarya wiira onikhalihere okhala atthu oopisa nrima ni oohakalala. (aGal. 5:22; aKol. 1:11) Ankhi akhala wiira nhoolo nnoottharatthariwa? Nhoove, munroromele Yehova ni nrima wootheene. Okathi wootheene, owo onawookhaliherani ni woolipihani.—aHeb. 13:6.
MALAIKHA ANNIKHALIHERA MULOKO WA EKIRISTAU OKHALA WAWAARYA
13. Yoothanleliwa seeni yavameekhaaya malaikha avahiwa awa olelo-va? (Matheyo 13:47-49)
13 Olelo-va, Yehova ohaavaha malaikha yoothanleliwa yavameekhaaya. (Munsome Matheyo 13:47-49.) Imilyawu dha atthu dhawaatta olumwinku wootheene annaakhulela ihapari dhooreera. Hata atthu akina ehitthunaka orowa vahoolo, akina annipaka marukunuso mweekumini-mwa wiira ekhale Makiristau. Malaikha aavahiwa yoothanleliwa ya “waavalaanya atakhali ni anaxariya.” Elo entaphulela wiira aavahiwa nrithi wa okhalihera muloko okhala wawaarya. Masi elo khentaphulela wiira atthu akhumihiwe mmulokoni khanaakhuleliwa otthika. Nitho khentaphulela wiira khadhinkhala-khala dhikhumelaka mixankiho mmulokoni. Tivondho, nikhupali ni nrima wootheene wiira malaikha annivara nteko muulupale wiira ekhalihere miloko okhala dhawaarya.
14-15. Nitakihaka wiilipihera wa malaikha, nin’ya owerya dhai okhalihera muloko okhala wawaarya? (Moone-tho efootu.)
14 Nitakihaka wiilipihera wa malaikha, nin’ya owerya dhai okhalihera muloko okhala wawaarya? Ninoowerya opaka elo nipakaka mphantta nhu wiira nikhalihere muloko okhala wawaarya mwa inamuna dhootheene. Hiyo ninnipaka elo, nipakaka itthu dhootheene wiira nikhapelele nrima nhu naathanlaka axirikha ooloka ni nikhootta opaka etthu ekhanle ohonona waataana wihu ni Yehova. (Esal. 101:3) Nitho ninoowerya waakhalihera anna ni arokora ohihiya okhala oororomeleya wa Yehova. Mwa ntakihero, eseeni ninreerela nhu opaka nadhuwela wiira munna mmodha aahiidho nrokora opaka etampi yuulupale? Mwaha wa ompheta ntthu owo, hiyo ninnitumererya waaleela asitokweene etampi opanke iye. Ndho akhala wiira khampaka elo, nihaana waaleela asitokweene mwaha owo. Hiyo nintthuna wiira munna awo aahiidho nrokora oottetthen’ye nkhalelo wa omunepani akhaliheriwe mwawaakuveya!—Yak. 5:14, 15.
15 Mooriipiha nrima, ivaara dhikina atthu akina ampaka itampi dhuulupale pooti okhumihiwa mmulokoni. Vaavo eniiraneya awa elo, hiyo ‘ninnihiya weetta’ naawo.d (1 aKor. 5:9-13) Ndho mareheryo ala annikhalihera muloko okhala wawaarya. Ohiya-vo, vaavo ninhiya nhu weetta na atthu okhumihiwe mmulokoni, ninnoonihera waareerela nrima. Nitho vaavo ninhiya nhu weetta naawo, woonawene elo pooti waakhalihera woona wiira annitthuneya otthikela wa Yehova. Ndho okathi ampaka awa elo, hiyo ninnihakalala vawaatta, vamodha ni Yehova ni malaikha.—Luka 15:7.
Eseeni ninreerela nhu opaka nadhuwela wiira munna mmodha aahiidho nrokora opaka etampi yuulupale? (Moone ettima 14)e
16. Mikhalelo seeni dha malaikha ninreerela nhu otakiha?
16 Eparakha yuulupale Yehova onaakhulela ohudha voohima dha malaikha ni ovara vamodha naawo! Ndho nihaana otakiha mikhalelo-dha, nkhama: Wiiyeviha, waapheta atthu, ovilela ni wiilipihera okhalihera muloko okhala wawaarya mwa inamuna dhootheene. Akhala wiira ninootthara ntakihero na malaikha oororomeleya, khaninrowa ohiya wiirela mphantta emudhi ya arumeyi a Yehova mahiku ootheene.
NCIPO 123 Nimwiiweleleke Yehova ni Mutthenkeso Awe
a Aakhala malaikha imilyawu dhawaatta, masi Biibiliya onlotta pahi madhina a malaikha maili, Mikayeeli ni Kabriyeeli.—Dan. 12:1; Luka 1:19.
b Wiira moone dhawiiraneya dhikina mmoone Índice das Publicações da Torre de Vigia muru onlotta wiira: “Anjos” mphantta oni: “Orientação angélica (exemplos).”
c Madhina makina aamotariwa.
d Nkhama enlotta awa Yoohima ya Nikhuru Noolamulela N°. 2 ya 2024, akhala wiira ntthu mmodha okhumihiwe mmulokoni onnireela woona nthukumano, arumeelaka yawuupusera ya nrima-ye ehudhihiwe ni Biibiliya munna aahiidho nrokora pooti othanla onkoha ehaali ni omwaakhela.
e OLEELIHERIWA WA EFOOTU: Nrokora mmodha antumereryaka nxirikha-ye opanke etampi yuulupale waaleela asitokweene. Nuumala nxirikha okhootta opaka elo, owo onirowa waaleela asitokweene mwaha owo.